Dede Wen hazu Jésus-Christ ka Luc ngɛraka 12 - Takarata pɛ Sɔ Mbombe Mbon

Pangay nɛ gdanga dambari pɛ hio * Farizien

¹ Ha ngimɔ ɛngi, dɔka giliwi pentɛ pet wesara may zikiri Jésus, kanɛ mbwa umɔ zu nanga may. Ha angara wen, Jésus mboa hio *wan-yambimɔ pɛa: «Ɛnɛ pangay nɛ yina hasisi mampa pɛ hio Farizien. Yo tɔ nde, ɛnɛ atɛ wan-dambari tuka mbwa na.

² Mɔ fɛt ka dung ha tutum, yo begbo ha saamɔ. Nɛ mɔ wuso fɛt begbo long.

³ Mɛgi, mɔ fɛt ka ɛnɛ tɔa ha zang tutum, ɛ beze yo ha gasa swe. Nɛ mɔ ka ɛnɛ yimɔlɔ ha zang pimbi, ɛ behe mbelaa ha binsila dɛl mɔ le.»

Ɛnɛ ayu ke Sɔ ndang sɔna

⁴ «Mi tɔ ha ɛnɛ, hio dan mi, ka ɛnɛ ayu ke na-gbɛ multɛ na. Hazu mbwa lɛm de ma mɔ hapataa fin na.

⁵ Mi beosi ha ɛnɛ wi, ka ɛnɛ lɛma yu ke wa: Yo nê Sɔ. Hazu hapata fio wɛnɛ lɛma pi ɛnɛ ha bhandi we ka bisi na. Ey, mi tɔ ha ɛnɛ nde, ɛnɛ yu ke wa!

⁶ Bo nê ɛ gdongi nadɔle mɔrkɔ hazu bebe mbɔli tikiring na nde? Ma, ngase ɛngi, tazu Sɔ lɛm bisi nɛ ma ndang na.

⁷ Nɛ fin, Sɔ ingɔ dɔka bumɔzu ɛnɛ ndang ndang fɛt. Ɛnɛ ayu ke na, hazu ha li Sɔ, ɛnɛ nɛ zioa pen zugili nadɔle.»

Ke ade ɛnɛ hazu gbasi Jésus na

⁸ «Mi tɔ ha ɛnɛ, ka ma wi gbasa ha li hio wi fɛt long nde, wɛnɛ nê wi pɔm, mi, *Bewei pɛ Wi, begbasi fin ha li hio *telenge pɛ Sɔ nde, wɛnɛ nê wi pɔm.

⁹ Ma, ka ma wi tɔa ha li hio wi nde, a ing mi na, mi, Bewei pɛ Wi, betɔ fin ha li hio telenge pɛ Sɔ nde, mi ing wɛnɛ na.

¹⁰ Sɔ bebisi *sɛmbɔ pɛ wi ndɔng ka tɔ gdanga wen sungiri Bewei pɛ Wi. Ma, Sɔ lɛm bisi sɛmbɔ pɛ wan-fɛngsi *Nzɔy-Sɔtɛ na.

¹¹ Ka ɛ ku ɛnɛ nɛnɛ ha li kita ha zang *twa gɔ Sɔ, mana ha li hio wan-le, mana ha li hio nasara, ka ɛnɛ adung nɛ nɔzang hazu wal, ka ɛnɛ bekɛ nɛ wen pɛ ɛnɛ, nɛ hazu wen ka ɛnɛ betɔ, na.

¹² Hazu ha ngimɔ ɛngi Nzɔy-Sɔtɛ beosi ha ɛnɛ wen ka lɛma nde ɛnɛ atɔ.»

Ɛnɛ aki yɛbhɛ-yɛbhɛ mɔ ha nzan na

¹³ Ma wi ha soko giliwi tɔa ha Jésus: «Wan-osimɔ, mɛ tɔ ha ya mi nde, wɛnɛ akapini likɔ pɛ bafa ɔ ha soko ɔ.»

¹⁴ Jésus tɔa ha wɛnɛ: «Dan mi, o ha gde mi tuka wan-gɔn kita nɛ wan-kapini mɔ ha soko ɛnɛ, o nde?»

¹⁵ Nɛ Jésus tɔa ha hio wi fɛt: «Ɛnɛ pangay nɛ dea hɛl dɔka kpaamɔ, hazu goto tunɔ pɛ wi bo nɛ kpaamɔ na, ngase ka kpaamɔ pɛa yɛbha.»

¹⁶ A tɔa fin ma towen ha mbwa: «Ha ma le, ma wan-kpamɔ ang. A gɔma gasa fɔ nɛ a gbɛa yɔng hebhe.

¹⁷ Ka wɛnɛ zɔka mɛgi, a tɔa ha sila wa nde, mi bede mɛng? Hazu mi bo nɛ bhandi pam kpalmɔ pɔm fɛt na.

¹⁸ Zɔk, mɔ ka mi bede sising, mi beyangili mɔa gulo, nɛ mi bebɛ gasaa ha bhandia hazu wesiri hio kpalmɔ nɛ kpaamɔ pɔm ang.

¹⁹ Nɛ hapata mi betɔ ha tɛ mi nɛ tɛ mi nde, sila mi, sising mɛ nɛ mɔ hebhe ka lɛm hazu dɔka bɛlɛ, mɛgi mɛ ɔmtɛ mɛ sɛm, yɔng nɛ nɔ, nɛ mɛ de totɛ!»

²⁰ «Nɛ Sɔ wanga wɛnɛ nɛ tɔ nde, yera wi! Mɛ befe mɛsɛ nɛ zɛ. Mɛgi dɔka mɔ ka mɛ wesara, o ha bedung nɛ yo, o nde?

²¹ Ey, wi ka kay kpaamɔ hazu wa, ma, ka dung nê fabha ha li Sɔ, wɛnɛ nê yera wi.»

Ɛnɛ agde tazu ɛnɛ ha tɛ Sɔ

²² Jésus tɔa ha hio *wan-yambimɔ pɛa: «Hazu ɛngi, mi gba tazu ɛnɛ nde, ka ɛnɛ adung nɛ nɔzang hazu mɔ ka ɛnɛ beyɔng nɛ la ka ɛnɛ beyol na.

²³ Tunɔ pɛ wi nɛ gasaa pen wen yɔngamɔ, nɛ tɛ wi nɛ gasaa pen wen latɛ.

²⁴ Ɛnɛ ambari hio naduagɔ: Mbwa pɛ nɛ bhi kpalmɔ na, mbwa bo nɛ bholoko mana gulo na. Ngase ɛngi Sɔ ha daya mbwa. Bo nê ɛnɛ nɛ zioa pen nɔy ndɔng pentɛ pet, na nde?

²⁵ O ha soko ɛnɛ lɛma bɔysi yala tunɔ pɛa tikiring nɛ wal nɔzang, o?

²⁶ Ka ɛnɛ lɛm de bebe mɔ tuka ɛngi ndang na, hazu ge ɛnɛ dung nɛ nɔzang hazu olo mɔ ge nde?

²⁷ Ɛnɛ mbari hio do bɛlɛ ha kpɔatɛ. Mbwa de tom na, nɛ mbwa pan la na. Ma, mi tɔ ha ɛnɛ nde, ngase Salomon ha zang yɛbhɛ-yɛbhɛ kpaamɔ pɛa, a tɛ yol lɛkɛ-lɛkɛ la lɛm nɛ do bɛlɛ ndɔng na.

²⁸ Sɔ bhɔngara la ha do bɛlɛ, ka dung ha fɔ swe mɛsɛ, nɛ ka ɛ bepi ha we bhisiri. Mɛgi Sɔ beyol la ha tɛ ɛnɛ pentɛ pet, na nde? Hazu ge ɛnɛ mɛkiri Sɔ tikiring sɔna?

²⁹ Ka ɛnɛ adung nɛ nɔzang ha kio mɔ yɔng nɛ mɔ nɔ na.

³⁰ Yo nê hio *bhilo, ka nak pata mɔ ndɔng. Ma, pɛ ɛnɛ, Bafa ɛnɛ ingɔ ka mɔ ndɔng kɔpi ɛnɛ.

³¹ Mɛgi, pen mɔ fɛt, ɛnɛ ki mɛ dung hio wi mɔ *Kongakandɔ pɛ Sɔ, nɛ Sɔ beha ɛnɛ olo mɔ ndɔng fɛt.»

Ɛnɛ awesiri mɔ gde ha zang ngɔn

³² «Ɛnɛ ka dung tuka bebe zugili sami, ɛnɛ ayu ke na! Hazu Bafa ɛnɛ weka ɛnɛ mɛ dung hio wi mɔ Kongakandɔ pɛa.

³³ Ɛnɛ gdongi kpaamɔ pɛ ɛnɛ, nɛ ha mbɔlia ha hio fabha wi! Ɛngɛ nê wal mɛ wesiri kpaamɔ pɛ ɛnɛ gde ha zang ngɔn. Nɛ ngobho mbɔli mɔ ngɔn lɛm gdɔy na. Hazu ha ngɔn, mɔ bedung nɛ dedea kpoo, wanzu lɛm zu yo na, nɛ nzɛmɛ lɛm gdangsi yo na.

³⁴ Hazu yo nê ha bhandi ka kpaamɔ pɛ ɛnɛ ang, ka sila ɛnɛ dung ang fin.»

Ɛnɛ ayang la mɛ ba Jésus, * Bewei pɛ Wi

³⁵ «Ɛnɛ dung nɛ la tom ha tɛ ɛnɛ, nɛ pam lamba nɛ baa!

³⁶ Ɛnɛ dung tuka hio wi ka keri wan pɛ mbwa ka bepe ha yenga si bhoko. Nɛ ka wɛnɛ behɔ nɛ kɔn nutwa, mbwa begbosisi yo ha wɛnɛ nɛhasa.

³⁷ Totɛ ha hio wan-tom, ka wan pɛ mbwa bepe tɛ kpa li mbwa ngɛlɛlɛ. Kpasawen, mi tɔ ha ɛnɛ nde, a beyol la tom pɛa, a begde mbwa hapɛtɛ tabolo, nɛ wɛnɛ nɛ pɛa tɛ beha yɔngamɔ ha mbwa.

³⁸ Ka wan pɛ mbwa bepe nɛ gduko zɛ, mana hapataa, tɛ kpa mbwa ha yanga la, mbwa bede totɛ nɛkpasa.

³⁹ «Ɛnɛ ze nɛdedea! Ka wan-twa ingɔ ngimɔ ka wanzu betɛ, ki a bedol wɛnɛ mɛ gba twa pɛa.

⁴⁰ Ɛnɛ fin, ɛnɛ dung gdungɛ-gdungɛ hazu mi, Bewei pɛ Wi, behɔ ha ngimɔ ka ɛnɛ takiri ang na.»

Mboazu wan-tom nɛ gdanga wan-tom

⁴¹ Pierre ana Jésus: «*Kongawan, mɛ tɔ towen ɛngɛ hazu ɔ sɔna, mana mɛ tɔ yo hazu hio wi fɛt nde?»

⁴² Kongawan kiforo wen: «Mi tɔa yo hazu wi fɛt ka dung tuka wan-tom ka dung nɛ mboazu nɛ ingɔmɔ. Wan pɛa begde wɛnɛ ha zu hio olo wan-tom, nɛ beha wɛnɛ tom mɛ kapini yɔngamɔ ha mbwa ha dede ngimɔ.

⁴³ Totɛ ha wan-tom ɛngɛ ka wan pɛa bepe tɛ kpa wɛnɛ ha dea tom pɛa.

⁴⁴ Mi tɔ ha ɛnɛ nde, a begde wan-tom ɛngɛ ha zu kpaamɔ pɛa fɛt.

⁴⁵ Ma, ka wan-tom ɛngɛ takiri ha sila wa nde, wan pɛa lɛm pe nɛhasa na, a bemɛl hio olo wan-tom mɔ wei nɛ mɔ bhoko, nɛ a beyɔng nɛ nɔ, nɛ fe dɔkɔ.

⁴⁶ Mɛgi, wan pɛa ka behɔ ngboto nɛ ngbuma, bendulsi wɛnɛ nɛ nyalɔ, nɛ bepi wɛnɛ ha bhandi pɛ hio wi ka kafi Sɔ.»

⁴⁷ «Wan-tom ka ingɔ mɔ ka wan pɛa ngoya, nɛ ka kafi mɛ bhɔngiri nɛ de yo, ɛ bemɛl wɛnɛ nɛkpasa.

⁴⁸ Ma, wan-tom ka tɛ ing mɔ ka wan pɛa ngoya na, nɛ ka dea mɔ ka lɛma nɛ mɛli, ɛ bemɛl wɛnɛ tikiring sɔna. Ka ɛ haa dɔka mɔ ha ma wi, ɛ beani dɔka mɔ ha kɔ wa. Nɛ ka ɛ gdea dɔka mɔ ha kɔ ma wi, ɛ beani mɔ pen zua ha kɔ wa.»

Hio wi besungiri may hazu Jésus

⁴⁹ «Mi tɛa hazu pi we ha nzan. Nɛ mi ngoya nde, we ɛngɛ abesisi kari!

⁵⁰ Ɛ begdumsi mi ha zang gasa yeksamɔ tuka ɛ gdumsi wi ha zang li. Mi nɛ kobhe nɛ ngɔtɛ pentɛ hazua kanɛ yo belɛmsiri tɛ.

⁵¹ Ɛnɛ takiri pɛ ɛnɛ nde, mi tɛa ha gdea gaamɔ ha nu nde? Dalo, mi tɛa tuka nde, hio wi agba soko may.

⁵² Angiri sising, wi mɔrkɔ ka dung ha zang twa ndang begba soko. Wi tar besungiri wi bwa, nɛ wi bwa besungiri wi tar.

⁵³ Bafa besungiri bewei pɛa, nɛ bewei besungiri bafa wa. Nana besungiri bebhoko pɛa, nɛ bebhoko besungiri nana wa. Gdikoko besungiri ko pɛ bem pɛa, nɛ ko pɛ bem besungiri koko wa.»

Jésus mboa zugiliwi hazu ing ngimɔ

⁵⁴ Nɛ Jésus tɔa fin ha zugiliwi: «Ka ɛnɛ zɔka tutum kolo ha guotɛ ha wal ɔnu swe, ɛnɛ ingɔ nɛhasa nde, kolo beɔl. Nɛ mɔ behɔ mɛgi.

⁵⁵ Nɛ ka ɛnɛ zɔka bok ha guotɛ ha wal gdɔk, ɛnɛ tɔ nde, mɔ begbɛng mɛsɛ. Nɛ mɔ behɔ mɛgi.

⁵⁶ Ɛnɛ hio wan-dambari! Ɛnɛ ingɔ mɔ ha liswe nɛ ha zu nu, ka osi nde kolo beɔl mana mɔ begbɛng. Ma, hazu ge ɛnɛ ing goto ngimɔ ɛngɛ na, ge nde?»

Mɛ abhɔngiri mɔ ha soko mɛ nɛ ngana pɛ mɛ

⁵⁷ «Hazu ge ɛnɛ nɛ tɛ ɛnɛ lɛm gba soko mɔ ka dung nzeng na, ge nde?

⁵⁸ Ka ngana pɛ mɛ dak mɛ nɛnɛ ha kita, mɛ ki mɛ ze may hinɛ wɛnɛ ha liwal. Yu nde, a betɛ gde mɛ ha li kita, nɛ wan-gɔn kita betɛ gde mɛ ha kɔ nasara, ka bepi mɛ ha zɔbhɔ.

⁵⁹ Mi tɔ ha mɛ nde, mɛ begbo haki sɔna, ka mɛ kpea yamando kanɛ kpogio pata fɛt.»