Jean 17 - Takarata pɛ Sɔ Mbombe Mbon

Jésus gɔa Sɔ hazu hio * wan-yambimɔ pɛa

¹ Ka Jésus tɔa wen ndɔng fɛt kari, a guo li ha ngɔn nɛ a tɔa: «Bafa mi, ngimɔ lɛma kari. Mɛ gbasi *lɛkɛ-lɛkɛmɔ pɔm, Bewei pɛ mɛ, ha hio wi tuka nde, mi agbasi lɛkɛ-lɛkɛmɔ pɛ mɛ ha mbwa fin.

² Mɛ haa mi ziomɔ ha zu hio wi fɛt tuka nde, mi aha *tunɔ kpoo ha hio wi ndɔng ka mɛ gdea ha kɔ mi.

³ Nɛ tunɔ kpoo, yo nê ingɔ mɛ, ndanga kpasa Sɔ, nɛ ingɔ mi, Jésus-Christ ka mɛ tomsa.

⁴ Ha ngimɔ ka mi dungɔ ha nzan, mi osa lɛkɛ-lɛkɛmɔ pɛ mɛ ha hio wi nɛ wal dea tom ka mɛ haa mi mɛ de.

⁵ Nɛ sising, Bafa mi, mɛ gu mi gde hapɛtɛ mɛ ha zang lɛkɛ-lɛkɛmɔ, ka mi badung nɛ yo hapɛtɛ mɛ sɔngsi, ha ngimɔ ka mɛ tɛ de ka nzan na.

⁶ «Mi osa mɛ ha hio wi ndɔng, ka mɛ weka ha soko hio wi mɔ nzan gde ha kɔ mi. Mbwa badung hio wi pɛ mɛ, nɛ mɛ haa mbwa ha mi, nɛ mbwa pama hio wen pɛ mɛ.

⁷ Sising, mbwa ingɔ nde, hio mɔ fɛt ka mi kpaa, yo nê mɛ ka haa yo ha mi.

⁸ Hazu mi tɔa ha mbwa hio wen ndɔng ka mɛ batɔ ha mi, nɛ mbwa mɛkara yo. Mbwa ingɔ nɛkpasa nde, mi guotɛ ha pɛ mɛ tɛnɛ. Nɛ mbwa mɛkara nde, yo nê mɛ ka tomsa mi tɛnɛ.

⁹ «Mi gɔ mɛ hazu mbwa. Mi gɔ mɛ hazu hio wi mɔ nzan na, ma, mi gɔ mɛ hazu wi ndɔng ka mɛ gdea ha kɔ mi, hazu mbwa nê hio wi pɛ mɛ.

¹⁰ Hio wi pɔm fɛt nê pɛ mɛ, nɛ hio wi pɛ mɛ fɛt nê pɔm. Yo nê mbwa ka gbasi lɛkɛ-lɛkɛmɔ pɔm ha hio olo wi.

¹¹ Sising, mi lɛm dung fin hakɛ ha nzan na. Mi ha kiforoa si ha pɛ mɛ. Ma, mbwa bebhɔn pɛ mbwa ha nzan. Nzɔy Bafa mi, mɛ haa ziomɔ pɛ ling mɛ ha mi. Mɛgi, mɛ pam hio wi pɔm nɛ wal ziomɔ ɛngɛ tuka nde, mbwa adung tɛ ndang gbesi tuka ka ɔ hinɛ mɛ, ɔ dung tɛ ndang.

¹² Ha ngimɔ ka mi dungɔ hakɛ ha nzan, mi pama mbwa nɛ wal ziomɔ pɛ ling mɛ ka mɛ haa ha mi. Mi pama mbwa, nɛ ma ndang tɛ yɔ mɔ na, kanɛ wi kɛ ka ɛ bangɛriki se wen pɛa ha zang takarata pɛ mɛ nde, a beyɔmɔ. Mɛgi, wen ɛngi lɛmsara tɛ.

¹³ Ma, sising, mi ha kiforo si ha pɛ mɛ. Mi tɔ wen ndɔng ha mbwa ha ngimɔ ka mi bhɔna ka hakɛ ha nzan, tuka nde, ndangtɛ totɛ ka dung ha sila mi, yo adung ha sila mbwa fin, nɛ tuka nde, totɛ pɛ mbwa alɛm wɛɛ.

¹⁴ Mi osa wen pɛ mɛ ha mbwa, nɛ hio wi mɔ nzan sɛna mbwa, hazu mbwa bo fin nê wi mɔ nzan na, gbesi tuka mi bo nê wi mɔ nzan na.

¹⁵ Mi tɛ gɔ mɛ hazu nde, mɛ agu mbwa ha nzan yunɛ na. Ma, mi gɔ mɛ nde, mɛ apam mbwa, yu nde, *Satan betɛ de gdangamɔ ha tɛ mbwa.

¹⁶ Gbesi tuka mi bo nê wi mɔ nzan ɛngɛ na, mbwa fin, mbwa bo nê hio wi mɔ nzan ɛngɛ na.

¹⁷ Wen pɛ mɛ nê tɛwen. Mɛ gde mbwa atɛ nɛ nzɔya nɛ wal tɛwen.

¹⁸ Gbesi tuka mɛ tomsa mi tɛnɛ ha nzan, mi fin, mi tomsa mbwa ha nzan.

¹⁹ Mɛgi, mi gdea tɛ mi nɛ nzɔya hazu mbwa tuka nde, mbwa fin atɛ nɛ nzɔya nɛ wal tɛwen.

²⁰ «Mi gɔ mɛ hazu mbwa sɔna na, ma, mi gɔ mɛ fin hazu wi ndɔng fɛt ka bemɛkiri mi nɛ wal bulowen pɛ mbwa.

²¹ Mi gɔ mɛ nde, mbwa fɛt adung tɛ ndang gbesi tuka ɔ hinɛ mɛ, Bafa mi, ɔ dung tɛ ndang. Nɛ nde, mbwa fɛt adung tɛ ndang hinɛ ɔ, tuka nde, hio wi mɔ nzan amɛkiri nde, yo nê mɛ ka tomsa mi.

²² Lɛkɛ-lɛkɛmɔ ka mɛ baha ha mi, mi ha yo fin ha mbwa tuka nde, mbwa adung tɛ ndang gbesi tuka ɔ hinɛ mɛ,

²³ mi ang ha tɛ mbwa, nɛ mɛ ang ha tɛ mi. Mɛgi, mbwa bedung tɛ ndang nɛkpasa, tuka nde, hio wi mɔ nzan aing nde, yo nê mɛ ka tomsa mi, nɛ nde, mi ngoya mbwa gbesi tuka ka mɛ ngoya nɛ mi.

²⁴ «Bafa mi, mɛ gdea wi ndɔng ha kɔ mi. Nɛ mi ngoya nde, mbwa adung hinɛ mi ha bhandi ka mi bedung ang, tuka nde, mbwa azɔk lɛkɛ-lɛkɛmɔ pɔm ka mɛ haa ha mi. Mɛ haa yo ha mi, hazu mɛ bangoy mi gde mɛ tɛ de ka nzan na.

²⁵ Bafa mi, mɛ nɛ nzeng. Hio wi mɔ nzan ing mɛ na, ma, mi ingɔ mɛ, nɛ wi ndɔng hakɛ ingɔ nde, yo nê mɛ ka tomsa mi tɛnɛ.

²⁶ Mi osa mɛ ha mbwa, nɛ mi beosi fin mɛ ha mbwa pen mɔ sɔngsi tuka nde, ngoy ka mɛ ngoya nɛ mi adung ha sila mbwa, nɛ mi adung ang ha tɛ mbwa.»