Jean 16 - Takarata pɛ Sɔ Mbombe Mbon

¹ «Mi tɔ wen ndɔng bingiri ha ɛnɛ yu nde, ɛnɛ betɛ lak mɛkara mi gde.

² Hio wi bemul bin ɛnɛ pi gbo ha soko giliwi mɔ *twa gɔ Sɔ. Nɛ ma ngimɔ behɔ ka hio wan-gbɛ ɛnɛ fɛt betakiri nde, mbwa de tom Sɔ nɛ wal gbɛa ɛnɛ.

³ Mbwa bede mɛgi, hazu mbwa tɛ ing ngase Bafa mi, ngase mi na.

⁴ Ma, mi tɔ wen ndɔng ha ɛnɛ nde, ka mbwa bede mɛgi, tazu ɛnɛ agba nde, mi batɔ yo tɔ ha ɛnɛ sɔngsi kari. Mi tɛ tɔ yo ha ɛnɛ ha ngimɔ angara tom pɔm na, hazu mi bhɔna ka hinɛ ɛnɛ.»

Tom ka * Nzɔy-Sɔtɛ bede

⁵ «Sising, mi ha sioa ha pɛ wan-tomsi mi tɛnɛ. Nɛ ma wi ha soko ɛnɛ tɛ ani bhandi ka mi nɛ ang na.

⁶ Ma, sising sila ɛnɛ dona nɛ ngɔtɛ hazu mi tɔa wen mɛgi ha ɛnɛ.

⁷ Mi tɔ kpasawen ha ɛnɛ nde, ka mi sio, yo bedung nê dedemɔ hazu ɛnɛ. Hazu, ka mi si na, ki wan-gbakiri ɛnɛ lɛm tɛ ha pɛ ɛnɛ na. Ma, ka mi sio, mi betomsi wɛnɛ ha ɛnɛ.

⁸ Nɛ ka wɛnɛ tɛa, a begbasi ha hio wi mɔ nzan tɛwen hazu dea gdangamɔ, hazu nzeng mɔ, nɛ hazu kita pɛ Sɔ.

⁹ Sɔngsi a begbasi hazu wen dea gdangamɔ nde, mbwa dea gdangamɔ hazu mbwa tɛ mɛkiri mi na.

¹⁰ A begbasi hazu wen nzeng mɔ nde, Bafa mi ha mbwa wal mɛ tɛ *nzeng wi, hazu mi besi nɛ ha pɛa, ha bhandi ka ɛnɛ lɛm zɔk mi fin na.

¹¹ Nɛ a begbasi hazu wen kita pɛ Sɔ nde, Sɔ begɔn bin kita ha zu mbwa, hazu a gɔna kita ba *Satan, wan-le nzan ɛngɛ kari.

¹² «Mi fin nɛ ma dɔka mɔ mɛ tɔ ha ɛnɛ. Ma, ɛnɛ lɛm mɛ konzi yo fɛt sising na.

¹³ Ka Nzɔy-Sɔtɛ ka begbasi tɛwen hɔa, a bede nde, ɛnɛ aing tɛwen fɛt. A lɛm tɔ wen nɛ zu wa na. Ma, a betɔ nɛ hio wen fɛt ka wɛnɛ zea ha nu Bafa mi. Nɛ wɛnɛ betɔ fin hio mɔ ka behɔ ha ɛnɛ.

¹⁴ A begbasi *lɛkɛ-lɛkɛmɔ pɔm, hazu a beku nɛ hio wen nu mi tɔ ha ɛnɛ.

¹⁵ Mɔ pɛ Bafa mi fɛt, yo nê pɔm. Yo nê ɛngi, ka mi tɔa nde, Nzɔy-Sɔtɛ beku nɛ hio mɔ pɔm gbasi yo ha ɛnɛ.»

Ngɔtɛ pɛ ɛnɛ bekifiri ha totɛ

¹⁶ «Ngimɔ tikiring, ɛnɛ lɛm zɔk mi fin na. Hapata ngimɔ tikiring fin, ɛnɛ bezɔk mi fin.»

¹⁷ Mɛgi, hio ma *wan-yambimɔ pɛa ana may: «Jésus tɔa ha ɔ nde, ngimɔ tikiring, ɔ lɛm zɔk wɛnɛ fin na. Hapata ngimɔ tikiring fin, ɔ bezɔk wɛnɛ fin. Nɛ a tɔa fin nde, wɛnɛ ha sioa ha pɛ Bafa wa. Hio wen ndɔng ngoy tɔ nde ge?

¹⁸ Nɛ goto ngimɔ tikiring ka wɛnɛ tɔ nɛ kɛ, yo ngoy tɔ nde ge? Ɔ ing goto wen ka wɛnɛ ngoy mɛ tɔ na.»

¹⁹ Jésus ingɔ nde, hio wan-yambimɔ ngoy mɛ ani wɛnɛ nɛ goto wen ɛngɛ. Mɛgi, a tɔa ha mbwa: «Mi tɔa nde, ngimɔ tikiring, ɛnɛ lɛm zɔk mi fin na, nɛ hapata ngimɔ tikiring fin, ɛnɛ bezɔk mi. Yo nê ɛngi, ka ɛnɛ ani nɛ may hazua, na nde?

²⁰ Mi tɔ kpasawen ha ɛnɛ nde, ɛnɛ behe kwa nɛ ɛnɛ belokitɛ. Ma, hio wi mɔ nzan bede pɛ mbwa nɛ totɛ. Ɛnɛ bedung nɛ ngɔtɛ. Ma, ngɔtɛ pɛ ɛnɛ bekifiri ha totɛ.

²¹ Yo bedung bin tuka bhoko ka bebhɛ. Ha ngimɔ bhɛ, wɛnɛ nɛ ngɔtɛ, hazu ɛngi nê ngimɔ kpaa yimtɛ pɛa. Ma, ka wɛnɛ bhɛa bem kari, tazu wa biso nɛ yimtɛ bio bhɛ. A tɛ bo nɛ totɛ hazu bem ka wɛnɛ bhɛa gde ha nzan.

²² Yo gbesi tuka sising, ɛnɛ nɛ ngɔtɛ. Ma, ha ngimɔ ka mi bekifiri bin tɛ tɛ zɔk ɛnɛ, sila ɛnɛ bede totɛ. Nɛ ma wi ndang lɛm gu totɛ ɛngi fin ha sila ɛnɛ yunɛ na.

²³ «Ha ngimɔ ɛngi, ɛnɛ lɛm mɛ ani mi nɛ goto ma wen fin na. Nɛ mi tɔ kpasawen ha ɛnɛ nde, hio mɔ fɛt ka ɛnɛ beani ha kɔ Bafa mi nɛ ling mi, wɛnɛ beha yo ha ɛnɛ.

²⁴ Gbo ha swe mɛsɛ, ɛnɛ tɛ ani ka ma mɔ nɛ ling mi na. Ɛnɛ ani mɔ, nɛ ɛnɛ bekpa yo tuka nde, totɛ pɛ ɛnɛ alɛm wɛɛ.»

Jésus gana zu nzan

²⁵ «Mi tɔa wen mɔ ndɔng ha ɛnɛ nɛ wal towen. Ma, ma ngimɔ behɔ ka mi lɛm mɛ tɔ wen ha ɛnɛ nɛ wal towen fin na, nɛ mi betɔ wen tɛ Bafa mi ha ɛnɛ long.

²⁶ Ha ngimɔ ɛngi, ɛnɛ beani mɔ ha kɔ Bafa mi nɛ ling mi. Mi tɔ nde, mi lɛm ani fin wɛnɛ ha olo nu ɛnɛ na,

²⁷ hazu Bafa mi nɛ tɛ wa ngoya ɛnɛ. Wɛnɛ ngoya ɛnɛ hazu ngoy ka ɛnɛ ngoya nɛ mi, nɛ hazu ɛnɛ mɛkara nde, mi guotɛ ha pɛ Sɔ tɛnɛ.

²⁸ Mi guotɛ ha pɛ Bafa mi tɛnɛ ha nzan. Sising mi ha guotɛ fin ha nzan hazu kifiri si ha pɛ Bafa mi.»

²⁹ Mɛgi, hio *wan-yambimɔ pɛa tɔa ha wɛnɛ: «Mɛ zɔk, sising mɛ tɛ bo ha tɔa wen ha ɔ long. Mɛ wolmɔ nɛ wal towen fin na.

³⁰ Ɔ zɔka sising nde, mɛ ingɔ mɔ fɛt kari. Mɛ ingɔ mɔ fɛt, ka ɛ beani nɛ mɛ, bingiri ing ki ɛ tɛ ani yo. Yo nê ɛngi, ka ɔ mɛkara nɛ nde, mɛ guotɛ ha pɛ Sɔ tɛnɛ.»

³¹ Hapata Jésus ana mbwa: «Sising ɛnɛ mɛkara mi nde?

³² Ma, ma ngimɔ ha tɛa nɛ yo hɔa kari, ka ɛnɛ ndang ndang fɛt bepanziki si ha le pɛ ɛnɛ lak mi gde. Ma, mi lɛm dung gbatɛ na, hazu Bafa mi dung hinɛ mi.

³³ Mi tɔa wen ndɔng ha ɛnɛ bingiri tuka nde, ɛnɛ fɛt ka dol tɛ hinɛ mi, ɛnɛ adung nɛ gaamɔ. Ɛnɛ bekpa yeksamɔ ha kɔ wi mɔ nzan. Ma, ɛnɛ ba da hazu mi gana zu nzan kari!»