Jacques 3 - Takarata pɛ Sɔ Mbombe Mbon

Lembe wi

¹ Hio ya mi, ka dɔka wi ha soko ɛnɛ aki wal mɛ dung wan-osimɔ ha wal mɔ Sɔ na. Hazu ɛnɛ ingɔ nde, Sɔ begɔn kita ha zu ɔ, hio wan-osimɔ, nɛngaya pen pɛ hio mbingwi.

² Ɔ hinɛ ɛnɛ fɛt ha yɔa mɔ nɛdɔka. Ka ma wi yɔ mɔ nɛ wal wen nu wa na, wɛnɛ lɛma wɛɛ, nɛ a ingɔ gana zu tɛ wa fɛt.

³ Ɔ pi lakamba ha nu hio yanga nde, ka mbwa aze nu ɔ. Mɛgi ɔ ngbɔsi olo tɛ mbwa fɛt.

⁴ Ɛnɛ zɔk fin hio gasa kuga. Ngase ka kuga heang, nɛ ka gbabok ha ilo yo, wi ngbɔsi yo nɛ bebe yenda ha wal ka wan-ba kuga ngoya.

⁵ Lembe wi ka fin mɛgi. Ngase ka lembe nɛ bebea ha soko hio gbakɔtɛ, wɛnɛ ha suotɛ hazu hio gasa wen. Nɛ fin gbesi, bebe we tikiring lɛma gde we ha gasa kombɔ gbukup.

⁶ Mɛgi, lembe wi gbesi tuka we. Tili gdangamɔ mɔ nzan fɛt ha zanga. Wɛnɛ nê ma gbakɔtɛ wi, nɛ a gdangsi kilitɛ fɛt. Angiri nɛ bhɛ gbo ha fio, a ku we ha bhandi we ka bisi na, hazu lɛ ha tɛ wi.

⁷ Wi lɛma gan zu tili sari fɛt: Hio sari bɛlɛ, hio nɔy, hio sari ka hay nɛ nu, nɛ hio kɔyɔ. Ey, wi gana zu mbwa fɛt kari.

⁸ Ma, ka bo nê pɛ lembe, ma wi ka lɛma gan zu wa bona. Wɛnɛ nê ma gdangamɔ ka wi lɛm dol na. A dona nɛ gdanga yina gbɛ wi.

⁹ Nɛ lembe ɛngɛ, ɔ ha lukoso *Kongawan, Bafa ɔ. Nɛ ndangtɛ lembe ɛngɛ fin, ɔ ha foma hio wi ka Sɔ dea ba nɛ may hinɛ wɛnɛ.

¹⁰ Lukosomɔ nɛ fomi ha gboa ha ndangtɛ nu wi. Hio ya mi, ka ɔ ade mɔ mɛgi ndang na.

¹¹ Dede li nɛ gdanga li lɛma gbo ha ndangtɛ nzɔngɛ nde?

¹² Hio ya mi, te fige lɛm way waya olive na. Nɛ te vigne lɛm way waya fige na. Mɛgi, li mɛ nɔ, nɛ li mɔ ngongele lɛm gbo ha ndangtɛ nzɔngɛ na.

Mbaramɔ ka gutɛ ha pɛ Sɔ tɛnɛ

¹³ Ka ma wi ha soko ɛnɛ zɔk tɛ wa tuka wi ka dung nɛ mbaramɔ nɛ ingɔmɔ, lɛma nde, wɛnɛ agbasi yo nɛ wal dede mɔ, ka wɛnɛ de nɛ mɛndi nɛ mbaramɔ.

¹⁴ Ma, ka ɛnɛ de nga sila nɛ ɛnɛ ha kio wen sungiri nɛ may, ka ɛnɛ asutɛ na. Ɛngi tɛ bo nê kiforo tɛwen ha dalo.

¹⁵ Tili mbaramɔ mɛgi gutɛ ha pɛ Sɔ tɛnɛ na. Yo nê mɔ nzan nɛ mɔ multɛ, nɛ yo tɛ nɛ wal *Satan.

¹⁶ Hazu, ha bhandi ka nga sila nɛ kio wen dung ang, tukolomɔ nɛ tili gdangamɔ nɛtɛ-nɛtɛ dung ang fin.

¹⁷ Ma, wi ka dung nɛ mbaramɔ ka gutɛ ha pɛ Sɔ tɛnɛ, wia dung pɛa nɛ saa nɛ gaa, wɛnɛ de ngay, wɛnɛ nɛ mɛndi, wɛnɛ de kobhe tɛ wi, nɛ wɛnɛ de dedemɔ swe fɛt. A gba soko wi na, nɛ a bo nɛ gdanga dambari na.

¹⁸ Hio wi ndɔng ka gde gaamɔ ha soko hio wi, mbwa dung tuka wan-pɛ kpalmɔ. Nɛ waya ka mbwa bebhi, yo nê nzeng deamɔ.