Jacques 1 - Takarata pɛ Sɔ Mbombe Mbon

Fanamɔ

¹ Yo nê mi, Jacques, wan-tom pɛ Sɔ nɛ pɛ *Kongawan Jésus-Christ, ha ngɛriki takarata ɛngɛ ha ɛnɛ, hio kandɔ *Israel ka yambala nɛ ha zu nzan fɛt. Mi fana ɛnɛ fɛt nɛdedea.

Mɛkara Sɔ nɛ yikosila

² Hio ya mi, ka tili yeksamɔ nɛtɛ-nɛtɛ ha wea sila ɛnɛ, ɛnɛ azɔk yo tuka gasa totɛ.

³ Hazu ɛnɛ ingɔ nde, ka ɛnɛ bhɔn ha mɛkara Sɔ ha zang yeksamɔ ndɔng, yo bede nde, ɛnɛ adung nɛ yikosila ngi-ngi-ngi.

⁴ Nɛ yo lɛma nde, ɛnɛ adung nɛ yikosila kanɛ kpogio. Ka ɛnɛ de mɛgi, ɛnɛ belɛm wɛɛ, nɛ ma mɔ ndang lɛm kɔpi ɛnɛ na.

⁵ Ka ma wi ha soko ɛnɛ bo nɛ mbaramɔ na, dea nde, wɛnɛ agɔ yo ha kɔ Sɔ ka beha yo ha wɛnɛ. Hazu Sɔ ha mɔ ha wi fɛt nɛ *dede sila. Wi ka gɔ mɔ ha kɔ wa, Sɔ sɛn wen ha wɛnɛ na.

⁶ Ma, ka wɛnɛ gɔ ma mɔ ha kɔ Sɔ, lɛma nde, wɛnɛ agde tazu wa fɛt ha tɛ Sɔ. Ka wɛnɛ adung nɛ siokafɛ ha sila wa ndang na. Hazu, wi ka sikafɛ, dung tuka tongbasali, ka bok il fesi nɛtum.

⁷ Ka ma wi tuka ɛngi atakiri nde, a bekpa ma mɔ ha kɔ *Kongawan, ndang na.

⁸ Hazu wɛnɛ nɛ sila bwa, nɛ a nɛ nɔ zelem-zelem ha wal pɛa fɛt.

Wen hazu wan-kpamɔ nɛ fabha wi

⁹ Ya ha Christ, ka dung nê fabha wi, lɛma nde, wɛnɛ ade totɛ hazu Sɔ guo wɛnɛ gde ha ngɔn.

¹⁰ Nɛ ya ha Christ, ka dung nê wan-kpamɔ, lɛma nde, wɛnɛ ade totɛ hazu Sɔ hilso wɛnɛ kari. Ey, wan-kpamɔ bepen tuka do bɛlɛ.

¹¹ Ka swe baa nɛ nga gbɛngamɔ, bɛlɛ bekoti, doa betek, nɛ lɔkatɛ pɛa bekari. Yo gbesi nɛ wan-kpamɔ, a bebhondi ha kio kpaamɔ pɛa.

Wen hazu hio * sɛbhalamɔ

¹² Totɛ ha wi ka dung nɛ yikosila ha zang sɛbhalamɔ. Hazu ka Sɔ zɔka nde, sɛbhalamɔ tɛ gan zu wa na, a beha wɛnɛ *tunɔ kpoo. Ɛngɛ nê kɛamɔ ka Sɔ gɔna nu mɛ ha ha wi fɛt, ka ngoya wɛnɛ.

¹³ Ka mɔ sɛbhala ma wi, ka wɛnɛ atɔ nde, yo nê Sɔ ha sɛbhili wɛnɛ, na. Hazu ma mɔ lɛm sɛbhili Sɔ mɛ de gdangamɔ na. Nɛ Sɔ nɛ tɛ wa sɛbhili wi ndang na.

¹⁴ Yo nê gdanga golamɔ pɛ wi ndang ndang ka sɛbhili wɛnɛ hazu mbɔmbili wɛnɛ pi ha li sak.

¹⁵ Hapata gdanga golamɔ beba zang, nɛ yo bebhɛ *sɛmbɔ. Nɛ ka sɛmbɔ kpɔatɛ kari, yo bebhɛ fio.

¹⁶ Hio ya mi ka mi ngoya gdang, ka ɛnɛ aosili ɛnɛ nɛ tɛ ɛnɛ na.

¹⁷ Dedemɔ nɛ mɔ fɛt, ka lɛma wɛɛ, gutɛ ha ngɔn. Yo nê Sɔ ha tomsi yo tɛnɛ. Wɛnɛ dea swe nɛ ze nɛ hio sɔla fɛt, ka yoloa bekpali nɛ tu. Ma, pɛa yo bo mɛgi ndang na.

¹⁸ Yo nê wɛnɛ nɛ tɛ wa ha ngoy mɛ ha ɔ tunɔ kpoo. A haa yo ha ɔ nɛ wal wen pɛa ka dung nê tɛwen, tuka nde, ɔ adung hio bosi wi ha soko mɔ fɛt ka wɛnɛ dea.

Ɔ ade mɔ lɛm nɛ wen ka ɔ zea

¹⁹ Hio ya mi ka mi ngoya gdang, tazu ɛnɛ agba nde, lɛma nde, ɛnɛ adung gdungɛ-gdungɛ mɛ lɛngi zala. Ka ɛnɛ awolmɔ nɛhasa na, nɛ ka ɛnɛ ade yimsila mbalang na.

²⁰ Hazu, ha ngimɔ yimsila, wi lɛm de mɔ ka dung nzeng ha li Sɔ na.

²¹ Mɛgi, ɛnɛ lak mɔ nzing nɛ gdangamɔ fɛt gde. Ɛnɛ ze nɛ mɛndi wen ka Sɔ lesisi ha zang sila ɛnɛ. Hazu wen ɛngɛ lɛma kpasisi tunɔ pɛ ɛnɛ.

²² Ɛnɛ de mɔ lɛm nɛ wen pɛ Sɔ, ka ɛnɛ aze yo sɔna nɛ zala na! Ka ɛnɛ ze ze sɔna, ki ɛnɛ osala tɛ ɛnɛ nɛ pɛ ɛnɛ tɛ.

²³ Hazu wi ka ze wen pɛ Sɔ ze sɔna, nɛ ka de toma na, wɛnɛ gbesi tuka wi ka zɔk li wa ha mɔ-zɔk li.

²⁴ Ka wɛnɛ zɔka li wa kari, a pena, nɛ tazu wa biso nɛhasa nɛ zizi zang li wa.

²⁵ Ma, totɛ ha wi ka gɛri *mbonga pɛ Sɔ gdoo, nɛ ka de tom lɛm nɛ yo. Wɛnɛ tɛ ze yo sɔna nɛ zala na, nɛ tazu wa tɛ bisi nɛ yo na. Ma, wɛnɛ ha pama mbonga pɛ Sɔ, ka lɛma wɛɛ, nɛ ka gde ɔ sɛɛ. Mɛgi wɛnɛ bedung nɛ totɛ ha deamɔ pɛa.

²⁶ Wi ka ba nu wa na, ma, ka takiri nde, tom Sɔ pɛa nɛdedea, wɛnɛ osala tɛ wa, nɛ tom Sɔ pɛa nɛgbelea.

²⁷ Wi ka ngoy de kpasa nɛ nzeng tom ha li Sɔ, Bafa ɔ, lɛma nde, wɛnɛ apam hio begula nɛ hio nagula ha zang yeksamɔ, nɛ wɛnɛ akafi mɛ de hio gdangamɔ pɛ nzan.