Hebro 8 - Takarata pɛ Sɔ Mbombe Mbon

Jésus, gasa wan-hasadaka pɛ ɔ

¹ Gasa mɔ ka ɔ tɔ wena, yo nde, ma gasa wan-hasadaka pɛ ɔ ndang ang. Wɛnɛ ha dungɔnu ha zang ngɔn ha wekɔ Sɔ ka dung tuka *kongapora ha zu solowan pɛa.

² Haki, a de tom pɛa ha nzɔy bhandi fɛt ha zang kpasa twa ka *Kongawan Sɔ bɛa, bo ha zang twa ɛngɛ ka kandɔ *Israel bɛa nɛ la ha kpɛnu na.

³ Sɔ gdea hio gasa wan-hasadaka fɛt ha tom haa hio haamɔ nɛ hio sadaka ha wɛnɛ. Mɛgi lɛma nde, gasa wan-hasadaka pɛ ɔ fin akpa ma mɔ mɛ ha ha Sɔ.

⁴ Ka bo se nde, Jésus adung ka hakɛ ha zu nu, ki a bo nê wan-hasadaka na, hazu hakɛ hio wan-hasadaka ang ka ha mɔ ha Sɔ lɛm nɛ *mbonga pɛ Moïse.

⁵ Hio wan-hasadaka ndɔng de tom pɛ mbwa ha zang ma twa, ka dung ka nê zizi kpasa twa Sɔ mɔ ngɔn. Yo gbesi nɛ mɔ ka hɔa ha Moïse. Ha ngimɔ ka wɛnɛ bangoy mɛ bɛ nɛ twa Sɔ nɛ la, Sɔ batɔ ha wɛnɛ: «Zɔk, mɛ abɛ mɔ fɛt lɛm nɛ mɔ ka mi osa ha mɛ ha zu ngari.»

⁶ Kpasawen, Sɔ gdea Jésus ha ma dede tom pen pɛ hio wan-hasadaka ndɔng. Hazu, wɛnɛ nê wan-bhɔngiri mbombe *mbon ha soko Sɔ hinɛ hio wi. Mbon ɛngɛ nɛ dedea pen mɔa mbon hazu hio gɔnanu pɛ Sɔ mɔ mbon ɛngɛ nɛ dedea pen hio gɔnanu mɔ mɔa mbon.

⁷ Ka bo se nde, bosi nɔa mbon alɛm wɛɛ, ki Sɔ tɛ bhɔngiri fin ma mbinga na.

⁸ Mɛgi, Sɔ sɛna wen ha kandɔ pɛa nɛ tɔa: «Kongawan tɔa: Ɛnɛ ze, ma yala betɛ ka mi benɔ ma mbombe mbon ha soko mi hinɛ hio wi mɔ Israel nɛ mɔ Juda.

⁹ Sɔngsi bhee ha ngimɔ ka mi baba kɔ hio ngbabafa mbwa gbosisi ha Ezipte, mi banɔ bosi mbon ha soko mi hinɛ mbwa. Ma, mbombe nɔa mbon lɛm dung tuka bosia na, hazu mbwa gdangsa bosi mbon ɛngɛ ka mi nɔa hinɛ mbwa. Mɛgi, mi tɛ pam fin mbwa na. Yo nê mi Kongawan ha tɔ mɛgi.

¹⁰ Mbombe mbon ka mi benɔ ha soko mi hinɛ hio wi mɔ Israel ha ngimɔ ɛngi, yo bedung tuka ɛngɛ: Mi begɔn mbonga pɔm ha takaramɔ pɛ mbwa, nɛ mi begde yo fin ha zang sila mbwa. Mi bedung nê Sɔ pɛ mbwa, nɛ mbwa bedung nê kandɔ pɔm. Yo nê mi Kongawan ha tɔ mɛgi.

¹¹ Ma wi ndang ha soko mbwa lɛm mɛ osi mɔ ha ma wa mana ha ya wa nde, wɛnɛ aing Kongawan, na. Hazu, mbwa fɛt being mi, angiri ha bebe wi hɔ ha gasaa.

¹² Kpasawen, mi bebisi kpandele pɛ mbwa yunɛ, nɛ tazu mi lɛm fin gba nɛ hio *sɛmbɔ pɛ mbwa na.»

¹³ Ka Sɔ tɔa wen mbombe mbon, yo osi nde, bosia tɛ bo nê mɔa mɔ. Mɛgi, mɔ ka tɛ bo nê mɔa nɛ ka gbɛla kari, yo tɛ bo sanga-sanga mɛ yɛmili.