Hebro 2 - Takarata pɛ Sɔ Mbombe Mbon

Gasa * mɔkpasi ka Sɔ kpasisi nɛ ɔ

¹ Tuka ɛngi, lɛma nde, ɔ akonzi wen ka ɔ zea nɛkpasa yu nde, ɔ betɛ yɔsisi wal.

² Wen *mbonga pɛ Moïse ka hio *telenge baku tɛnɛ, yo nê tɛwen. Mɛgi, hio wi ndɔng ka kafa zea yo, nɛ ka dea kpandele sungiri nɛ yo, Sɔ ndulso mbwa lɛm nɛ deamɔ pɛ mbwa.

³ Mɛgi, ka ɔ bhɛsiri gasa mɔkpasi ka Sɔ ngoy kpasisi nɛ ɔ, ɔ bekpɔy ha ndulsomɔ mɛng? Yo nê *Kongawan nɛ pɛa tɛ ka angara bulo wen mɔkpasi ɛngɛ, nɛ hio wi ndɔng ka zea wena, mbwa tɔa ha ɔ nde, yo nê tɛwen.

⁴ Ha ndangtɛ ngimɔ, Sɔ fin osa nde, wen ɛngɛ nê tɛwen, nɛ wal hio *mɔweka, hio *mɔkifi, hio tili *mɔbhana nɛtɛ-nɛtɛ, nɛ fin nɛ wal hio ngatɛ pɛ *Nzɔy-Sɔtɛ, ka wɛnɛ haa ha hio wi tuka sila wa ngoya.

Jésus ha wal ha hio wi mɛ kpasi

⁵ Kpasawen, mbombe nzan ka behɔ bin nɛ ka ɔ ha tɔa wena, Sɔ tɛ gde yo ha si hio *telenge na.

⁶ Ma, ha zang takarata pɛ Sɔ, ma wi tɔa ha Sɔ: «Wi nê nge tɛ mɔ ka mɛ ha takara mɔ hazu wa, ge nde? *Bewei pɛ wi nê nge tɛ mɔ ka mɛ ha pama wɛnɛ, ge nde?

⁷ Mɛ gdea wɛnɛ ha si hio telenge ma bengimɔ, Hapata, mɛ haa wɛnɛ *lɛkɛ-lɛkɛmɔ nɛ lukosomɔ.

⁸ Mɛ gdea hio mɔ fɛt ha si nanga wa.» Ka ɛ tɔ nde, Sɔ gdea mɔ fɛt ha si wa, ɛngɛ tɔ nde, ma mɔ ndang ka bo ha si wa na, bona. Tangere, ha ngimɔ ɛngɛ sising, ɔ tɛ zɔk ka nde, mɔ fɛt ha si wa, na.

⁹ Ma, mɔ ka ɔ zɔka, yo nê ɛngɛ: Sɔ bagde Jésus ha si hio telenge ma bengimɔ, nɛ a haa wɛnɛ lɛkɛ-lɛkɛmɔ nɛ lukosomɔ, hazu wɛnɛ kpaa yimtɛ fio. Ey, Sɔ ngoya nɛ wal *dede sila pɛa nde, wɛnɛ afe gɔn nɛ zu hio wi fɛt.

¹⁰ Sɔ ka dea mɔ nzan fɛt nɛ ka mɔ nzan fɛt ha wen zu wa, ngoya mɛ lesisi hio dɔka wi ha lɛkɛ-lɛkɛ bhandi pɛa. Hazu ɛngi, yo nɛ wala ha li Sɔ nde, Jésus akpa yimtɛ hazu nde, wɛnɛ atɛ wi ɛngɛ ka lɛma wɛɛ mɛ kpasisi mbwa.

¹¹ Jésus ka gde wi nɛ nzɔya, hinɛ hio wi ka wɛnɛ gdea nɛ nzɔya kari, mbwa fɛt nɛ ndangtɛ gdibafa sɔna. Mɛgi Jésus bo nɛ foy hazu sa mbwa nde, hio ya wa, na.

¹² A tɔa ha Sɔ: «Mi betɔ wen ling mɛ ha hio ya mi, Mi bebe gima lukisi mɛ ha soko giliwi pɛ mɛ.»

¹³ A tɔa fin: «Pɔm, mi begde tazu mi ha tɛ Sɔ.» Nɛ a tɔa fin: «Zɔk, mi ga, ɔ hinɛ hio bem ka Sɔ haa ha mi.»

¹⁴ Wɛnɛ yola tɛ wi ka ba may nɛ pɛ hio bem ndɔng, hazu mbwa fɛt nê wi nɛ multɛ nɛ tɔktɛ. A dea mɛgi tuka nde, nɛ wal fio pɛa, wɛnɛ ayangili *Satan ka dung nɛ ngatɛ hazu gde wi ha fio.

¹⁵ A fea hazu yangi hio wi ka dung nê bala ha si ke fio ha ngimɔ tunɔ pɛ mbwa fɛt.

¹⁶ Kpasawen, Jésus tɛa bo hazu gbakiri hio telenge na, ma, a tɛa hazu gbakiri nɛ hio bezang pɛ Abraham.

¹⁷ Hazu ɛngi, lɛma ka se nde, wɛnɛ atɛ gbesi tuka hio ya wa ha hio mɔ fɛt. Mɛgi wɛnɛ tɛ bo nê gasa wan-hasadaka ka dung nɛ mboazu ha tom Sɔ, ka de kobhe tɛ hio wi, nɛ ka bisi *sɛmbɔ pɛ mbwa yunɛ.

¹⁸ Sising, wɛnɛ lɛma mɛ gbakiri hio wi ka ma mɔ we sila mbwa, hazu wɛnɛ fin bakpa yimtɛ nɛ mɔ bawe sila wa gbesi.