Hebro 12 - Takarata pɛ Sɔ Mbombe Mbon

Sɔ, Bafa ɔ

¹ Ka bo nê pɛ ɔ, dɔka giliwi ha zikoro ɔ. Yo nê ɛ ndɔng fɛt ka bade mɔ nɛ wal mɛkara Sɔ. Hazu ɛngi, ɔ ail hio zio toy fɛt ka dolsi ɔ ha wal mɔ Sɔ pi ha nu, ɔ alak fin gdangamɔ ka hɛl sila ɔ nɛhasa gde, nɛ ɔ asɔwi nɛ nɔa ha kpakpay ka Sɔ gdea ɔ ang, hɔ ha kpogioa.

² Ɔ azɔk kanɛ Jésus, wɛnɛ ka dung nê nanga mɛkaramɔ pɛ ɔ, nɛ fin wi ka lɛmsiri yo wɛɛ. A baa sila wa nɛ kɔ ha zang fio ha getakate. A zɔka foy mɔ fio ɛngɛ tuka gbelemɔ, hazu a gdea li wa ha totɛ ka wɛnɛ bekpa nɛ pata. Nɛ sising, wɛnɛ ha dungɔnu ha wekɔ Sɔ, hapɛtɛ solowan pɛ Sɔ.

³ Ɛnɛ takiri mɔ hazu Jésus, ha wal ka wɛnɛ kpaa yimtɛ ha kɔ hio *wan-de gdangamɔ ka kafa wɛnɛ. Mɛgi, tɛ ɛnɛ akati na, nɛ sila ɛnɛ amɔk na.

⁴ Hazu, ha bio bulo pɛ ɛnɛ sungiri nɛ gdangamɔ, ɛnɛ tɛ zati ka hɔ ha fio na.

⁵ Sɔ mboa ɛnɛ tuka hio bewei, tazu ɛnɛ biso nɛ mbɔla ɛngɛ kari nde? A batɔ: «Bewei pɔm, ka *Kongawan ndulsi mɛ, ka mɛ azɔk yo tuka gbelemɔ na. Nɛ ka wɛnɛ sɛn wen ha mɛ, ka sila mɛ anɔ tɔk na.

⁶ Hazu Kongawan ndulsi nɛ wi ka wɛnɛ ngoy. A zuri nɛ wi ndang ndang fɛt ka wɛnɛ baa tuka bewei pɛa.»

⁷ Mɛgi, ɛnɛ aba sila ɛnɛ ha zang ngamɔ ndɔng, hazu yo dung tuka ndulsomɔ ka bafa ndulsi nɛ bewei pɛa. Ndulsomɔ ndɔng osi nde, ɛnɛ tɛ bo nê hio *bewei pɛ Sɔ. Hazu, yo nê nge bewei ka bafa wa ndulsi na, ge nde?

⁸ Sɔ ha ndulso hio bewei pɛa fɛt mɛgi. Nɛ ka wɛnɛ ndulsi ɛnɛ na, ki ɛnɛ bo nê hio ngbak bewei pɛa na, ma, ɛnɛ nê bekɔ sɔna.

⁹ Tazu ɔ agba nɛ hio bafa ɔ mɔ multɛ. Mbwa bandulsi ɔ, nɛ ɔ baa mbwa nɛ zioa. Tuka mɔ dung mɛgi, lɛma ka lɛm nde, ɔ ahil nɛ mɛndi ha si Bafa ɔ mɔ sɔtɛ tuka nde, ɔ adung nɛ zutunɔ.

¹⁰ Hio bafa ɔ mɔ multɛ dungɔ ha ndulso ɔ ha ma bebe ngimɔ tuka yo lɛma ha li mbwa. Ma, pɛ Bafa ɔ mɔ sɔtɛ, a ndulsi ɔ hazu gbakiri nɛ ɔ nde, ka ɔ adung nɛ nzɔya tuka wɛnɛ.

¹¹ Ha ngimɔ ka ɛ ha ndulso ɔ, yo nê mɔ ngɔtɛ ha li ɔ, yo bo nê mɔ totɛ ha li ɔ na. Ma, ha pataa, wi ɛngɛ ka yamba mɔ ha zang ndulsomɔ, wɛnɛ bekpa hio dede waya ang, yo nde, wɛnɛ bedung nê wi ka de nzengmɔ ha zang gaamɔ.

Hio mbɔla nɛ wen gbaa tazu may

¹² Hazu ɛngi, ɛnɛ angasisi hio kata kɔ ɛnɛ, ɛnɛ angasisi hio mɔka zigolo ɛnɛ.

¹³ Ɛnɛ ayolsi mbango ka ɛnɛ nɛ nɔ ang tuka nde, wi ka nanga wa sɛkara, alunsiri yo na, ma, a bekpasi.

¹⁴ Ɛnɛ aki wal mɛ dung nɛ gaa hinɛ hio wi fɛt, nɛ ɛnɛ aki wal mɛ dung nɛ nzɔya ha li Sɔ. Hazu, wi ka de mɛgi na, lɛm zɔk *Kongawan na.

¹⁵ Ɛnɛ pangay yu nde, ma wi betɛ kɔpi *dede sila ka Sɔ de ha tɛ hio wi. Nɛ ɛnɛ pangay fin yu nde, ma wi ha soko ɛnɛ betɛ dung tuka panga te, ka kpɔtɛ nɛ bhunziki sila hio dɔka wi nɛ wal gdanga yina pɛa.

¹⁶ Ɛnɛ pangay yu nde, ma wi ha soko ɛnɛ betɛ tɛ wan-de wanza mana wan-bhɛsiri mɔ Sɔ tuka Ezau. A bagdongi bhandi kay wi pɛa ha bebe ya wa hazu tasi yɔngamɔ ndang.

¹⁷ Ɛnɛ ingɔ nde, ha pataa, wɛnɛ ngoya nde, bafa wa awol dede wen ha zu wa. Ma, bafa wa kafa, hazu wal mɛ kifiri sila wa bo fin na, ngase ka Ezau kio yo nɛ hea kwa.

¹⁸ Ha ngimɔ ka ɛnɛ tiko hapɛtɛ Sɔ, ɛnɛ tɛ de mɔ tuka kandɔ *Israel na. Mbwa tiko nɛ hapɛtɛ ngari Sinai, ka mbwa lɛma ndɔ nɛ kɔ. Mbwa zɔka gasa we, ngɛ-ngɛ-ngɛ tutum, nɛ gbabok.

¹⁹ Mbwa zea gɛl dɔma mbia nɛ ma ngagɛl ha gdɔra. Ka mbwa zea gɛl Sɔ mɛgi, ke baa mbwa nɛ mbwa gɔa nde, ka wɛnɛ atɔ fin ma wen ndang ha mbwa na.

²⁰ Hazu mbwa tɛ lɛm ba sila nɛ haanu pɛa na. A haa nu nde: «Wi fɛt ngase ma sari ka ndɔ ngari ɛngɛ, ɛ alo wɛnɛ nɛ ta gbɛ.»

²¹ Hio mɔ ka mbwa zɔka haki, yo dungɔ nê gasa mɔ ke. Ngase Moïse nɛ pɛa tɛ tɔa: «Ke ha dea mi, nɛ tɛ mi ha yaka tututu.»

²² Ma, pɛ ɛnɛ, yo nɛtɛ. Ɛnɛ tiko nɛ hapɛtɛ ngari *Sion, ha Jérusalem mɔ ngɔn, le pɛ tunɔ Sɔ, ka hio *telenge zemyeke dung ang.

²³ Ɛnɛ tiko nɛ hapɛtɛ wesara may yenga pɛ hio kay bem pɛ Sɔ, ka ling mbwa ha zang takarata ha ngɔn. Ɛnɛ tiko nɛ hapɛtɛ Sɔ ka gɔn kita ha zu hio wi fɛt, nɛ fin hapɛtɛ sɔtɛ hio *nzeng wi ka Sɔ lɛmsara mbwa wɛɛ kari.

²⁴ Ɛnɛ tiko nɛ hapɛtɛ Jésus, wan-bhɔngiri mbombe *mbon ha soko Sɔ hinɛ hio wi. Ɛnɛ tiko nɛ hapɛtɛ tɔktɛ Jésus ka sɛa hazu sasisi wi. Mɛgi tɔktɛ Jésus kuo ma dede kasi tɛnɛ, bo tuka pɛ Abel na.

²⁵ Ɛnɛ pangay yu nde, ɛnɛ betɛ kafi zea wi ɛngɛ ka tɔ wen ha ɛnɛ. Hio wi mɔ Israel bakafi zea wi ka gbaa tazu mbwa nɛ wen pɛ Sɔ hakɛ ha zu nu, nɛ mbwa tɛ kpɔy ha ndulsomɔ na. Mɛgi, ka ɔ kafi zea wi ka guotɛ ha ngɔn tɛnɛ, ɔ lɛm kpɔy ha ndulsomɔ ndang na.

²⁶ Sɔngsi bhee gɛl Sɔ bafesi nu, nɛ sising, Sɔ gɔna nu ha ɔ nde: «Ze ndang fin, mi befesi nu, nɛ bo sɔna nê nu na, ma, ngɔn nɛ nu fɛt.»

²⁷ Hio wen ndɔng, ka tɔ «Ze ndang fin», yo gbasa long nde, hio mɔ fɛt ka Sɔ dea, beyak nɛ yo beyɛmili. Mɛgi, hio mɔ ka bebhɔn, yo bedung sɔna nê hio mɔ ka ɛ lɛm mɛ fesi yo na.

²⁸ Nɛ Sɔ haa ɔ wal mɛ le ha kongakandɔ ɛngɛ ka ɛ lɛm mɛ fesi na. Mɛgi, ɔ aha oeba ha wɛnɛ nɛ wal dea dede tom ha wɛnɛ nɛ mɛndi nɛ ke.

²⁹ Hazu Sɔ pɛ ɔ dung tuka we ka besisi mɔ fɛt.