Galasi 6 - Takarata pɛ Sɔ Mbombe Mbon

Ɔ zati ha dea dedemɔ

¹ Hio ya mi, *Nzɔy-Sɔtɛ ang ha tɛ ɛnɛ. Mɛgi, ka ɛnɛ kpa ma wi ha dea gdangamɔ, ɛnɛ yolsi wɛnɛ nɛ gaa sila. Nɛ ɛnɛ pangay nɛ tɛ ɛnɛ fin yu nde, ɛnɛ betɛ tek ha zang gdangamɔ tuka wɛnɛ.

² Ɛnɛ agbakiri may ha zang hio ngamɔ. Ka ɛnɛ de mɛgi, ɛnɛ belɛmsiri *mbonga pɛ Christ.

³ Ka ma wi zɔk tɛ wa tuka zio wi, ma, wɛnɛ nê gele wi sɔna, a osala tɛ wa nɛ pɛa tɛ.

⁴ Dea nde, wi ndang ndang azɔk deamɔ pɛa nɛ pɛa tɛ. Ka wɛnɛ aweki deamɔ pɛa nɛ pɛ ma wi na. Mɛgi, ka wɛnɛ kpaa nɛ tɛ wa nde, deamɔ pɛa nɛ dedea, wɛnɛ lɛma lukisi tɛ hazua.

⁵ Kpasawen, wen deamɔ pɛ wi ndang ndang ha zu wa nɛ pɛa tɛ.

⁶ Wan-yambi wen pɛ Sɔ, dea nde, wɛnɛ akapini soko kpaamɔ pɛa hinɛ wan-osi yo ha wɛnɛ.

⁷ Ka ɛnɛ aosili tɛ ɛnɛ na: Ma wi lɛm mam Sɔ na, wi bebhi nɛ waya mɔ ka wɛnɛ gunɔ.

⁸ Wi ka gun ka sɔna nɛ mɔ ka ndɔkitɛ wa ngoya, wɛnɛ bebhi fin waya ka tɛ nɛ ndɔkitɛ wa. Nɛ wayaa yo nê fio. Ma, wi ka gun mɔ ka Nzɔy-Sɔtɛ ngoya, wɛnɛ bebhi fin waya ka tɛ nɛ Nzɔy-Sɔtɛ. Nɛ wayaa yo nê *tunɔ kpoo.

⁹ Hazu ɛngi, ɔ azati ha dea dedemɔ kpoo nɛ kpoo. Hazu, ka tɛ ɔ kati na, ɔ bebhi bin wayaa ha dede ngimɔ.

¹⁰ Mɛgi, ha ngimɔ pɛ ɔ fɛt, ɔ ade dedemɔ ha tɛ hio wi fɛt mburr, pen fɛt ha tɛ hio ya ɔ ha zang mɛkara Christ.

Kpogio wen nɛ fani

¹¹ Hio ngbengele-ngbengele nanga takarata ndɔng, ka ɛnɛ zɔk sising, osi nde, mi ngɛriki yo nɛ tɛ kɔ mi.

¹² Hio wi ndɔng fɛt ka nɔsisi ɛnɛ mɛ gɔn sɔru ɛnɛ, mbwa ngoya sɔna nde, hio wi alukisi nɛ mbwa. Mbwa de tuka ɛngi yu sɔna nde, hio wi betɛ namili mbwa hazu wen fio pɛ Christ ha getakate.

¹³ Hazu, ngase ka mbwa ha gɔna sɔru mbwa, mbwa bo ha dea mɔ lɛm nɛ *mbonga na. Mbwa ngoy mɛ gɔn sɔru ɛnɛ tuka nde, mbwa aba salia tuka mɔ sutɛ.

¹⁴ Ma, pɔm, mi sutɛ sɔna hazu wen fio ka *Kongawan pɛ ɔ, Jésus-Christ, fea nɛ ha getakate. Hazu, nɛ wal fio pɛa, hio mɔ nzan fɛt tɛ bo nê fea mɔ ha li mi. Nɛ mi fin, mi tɛ bo nê fiowi ha li nzan.

¹⁵ Mana ma wi nê wan-gɔn sɔru, mana wɛnɛ nê wan-sɔru, yo de mɔ na. Gasa mɔ sɔna nde, wɛnɛ tɛ bo nê mbombe wi ha li Sɔ.

¹⁶ Hio wi ndɔng ka de mɔ lɛm nɛ osamɔ ɛngɛ, gaamɔ pɛ Sɔ nɛ *dede sila pɛa adung hinɛ mbwa, nɛ fin hinɛ hio wi mɔ kandɔ pɛa fɛt.

¹⁷ Kpasawen, hio sali dalɛ ka dung ha tɛ mi osi long nde, mi nê pɛ Jésus. Mɛgi, angiri sising, ka ma wi ayeksi fin mi na.

¹⁸ Hio ya mi, Kongawan pɛ ɔ, Jésus-Christ, ade dede sila ha tɛ ɛnɛ fɛt. Amen.