Galasi 1 - Takarata pɛ Sɔ Mbombe Mbon

Fanamɔ

¹ Yo nê mi Paul ha ngɛriki takarata ɛngɛ. Yo bo nê wi ha weki mi gde *wan-nɛtom na, nɛ yo bo fin nɛ wal wi ka mi tɛa wan-nɛtom na. Ma, yo nê Jésus-Christ, ka Sɔ guo ha soko hio fiowi, hinɛ Sɔ, Bafa wa, ha weki mi.

² Mi hinɛ hio ya ha Christ hakɛ fɛt tomsi takarata ɛngɛ ha ɛnɛ, hio giliwi mɔ hio eglize ha kandɔnu Galasi.

³ Sɔ, Bafa ɔ, hinɛ *Kongawan Jésus-Christ ade *dede sila ha tɛ ɛnɛ, nɛ aha ɛnɛ gaamɔ.

⁴ Tuka Sɔ, Bafa ɔ, ngoya, Christ fea gɔn zu hio *sɛmbɔ pɛ ɔ, hazu gbosisi ɔ ha gdanga nzan ɛngɛ mɔ sising yunɛ.

⁵ *Lɛkɛ-lɛkɛmɔ adung ha kɔ Sɔ kpoo nɛ kpoo. Amen.

* Dede Wen ka nê ndang sɔna

⁶ Sɔ saa ɛnɛ nɛ wal *dede sila pɛ Jésus-Christ. Mɛgi mi yaksa pentɛ ka mi zea nde, ɛnɛ gdea gdong ha wɛnɛ nɛhasa, hazu lɛngi zala ha ma mbing Dede Wen.

⁷ Yo nê tɛwen nde, ma mbing Dede Wen ndang bona. Mi tɔ mɛgi hazu mi zɔka nde, hio ma wi ha bhunzoko sila ɛnɛ, nɛ mbwa ngoy mɛ bhabhi Dede Wen ka tɔ wen tɛ Christ.

⁸ Ka ma wi tɔ ma mbing Dede Wen ha ɛnɛ ka dung nɛtɛ nɛ ɛngɛ ka ɔ tɔa ha ɛnɛ, fomi aba wɛnɛ, ngase yo nê ɔ nɛ pɛ ɔ tɛ mana ma *telenge ka guotɛ ha ngɔn tɛnɛ.

⁹ Ɔ tɔa yo ha ɛnɛ kari, nɛ sising, mi ha putoro yo fin nde: Ka ma wi tɔ ma mbing Dede Wen ha ɛnɛ ka dung nɛtɛ nɛ ɛngɛ ka ɛnɛ zea ha nu ɔ, fomi aba wɛnɛ!

¹⁰ Mana mi ha tɔa wen mɛgi hazu kpa longo pɛ hio wi nde? Way! Mi ngoy nɛ longo pɛ Sɔ sɔna. Mana mi ha kio wal mɛ ha totɛ ha hio wi nde? Way! Ka bo se nde, mi ha kio fin wal mɛ ha totɛ ha hio wi, ki mi bo nê wan-tom pɛ Christ na.

Wal ka Paul tɛa nɛ * wan-nɛtom

¹¹ Hio ya mi, mi tɔ ha ɛnɛ nde, *Dede Wen ka mi bul ha ɛnɛ, yo tɛ nɛ wal ndɔkitɛ wi na.

¹² Ma wi ndang tɛ ha yo ha mi na, nɛ ma wi ndang tɛ osi yo ha mi na. Ma, yo nê Jésus-Christ nɛ tɛ wa ha gbasi yo ha mi.

¹³ Ɛnɛ zea wen deamɔ pɔm ha ngimɔ ka mi bhɔna ka ha dea tom Sɔ nɛ wal ndɔki deamɔ pɛ hio *zuife. Ɛnɛ ingɔ nde, mi dungɔ ha namala hio *giliwi mɔ eglize pɛ Sɔ nɛngaya. Ey, mi dungɔ ha kio wal mɛ bhondisi mbwa.

¹⁴ Mi bayambi mɔ hazu hio ndɔki deamɔ pɛ hio zuife pen hio olo zuife mɔ tanga pɔm. Nɛ mi gdea sila mi ha hio ndɔki deamɔ pɛ ngbabafa ɔ nɛkpasa pen mbwa fɛt.

¹⁵ Ma, nɛ wal *dede sila pɛa, Sɔ gdea mi nɛtɛ gde mi boka ha zang nana mi, nɛ a saa mi nde, mi ade tom pɛa.

¹⁶ A gbasa Bewei pɛa ha mi tuka nde, mi abul Dede Wen tɛ wa ha hio kandɔ ndɔng ka bo nê zuife na. Ha ngimɔ ɛngi, mi tɛ nɛ ha pɛ ma wi nde, wɛnɛ ambo mi na.

¹⁷ Nɛ mi tɛ nɛ ha Jérusalem hazu zɔk nɛ hio wi ndɔng ka tɛa wan-nɛtom sɔngsi nɛ mi, na. Ma, mi guotɛ pen nɛ ha kandɔnu Arabi, hapata ing ki mi tɛ kifiri pe ha le Damas.

¹⁸ Mi dungɔ haki lɛm bɛlɛ tar ing ki mi tɛ nɛ ha Jérusalem ha zɔka Pierre. Mi dungɔ ha pɛa haki lɛm kili dimasi bwa.

¹⁹ Nɛ ha ngimɔ ɛngi mi tɛ zɔk ma mbing wan-nɛtom fin na, bhɔn kanɛ Jacques, bebe ya mɛ *Kongawan.

²⁰ Mi tɔ ha li Sɔ nde, mɔ ka mi ngɛriki ha ɛnɛ, yo bo nê dalo na.

²¹ Hapata ɛngi, mi pena nɛ ha kandɔnu Siri nɛ kandɔnu Silisi.

²² Ha ngimɔ ɛngi fɛt, hio giliwi mɔ hio eglize pɛ Christ ha kandɔnu Judée tɛ ing ka mi na.

²³ Ma, mbwa zea sɔna nɛ lingtɛ mi nde, wi kɛ ka badung ha namala ɔ, nɛ ka baki wal mɛ bhondisi Dede Wen mɛkara Christ, wɛnɛ tɛ bo ha bulo yo.

²⁴ Mɛgi, mbwa lukoso Sɔ hazu mi.