Filipe 3 - Takarata pɛ Sɔ Mbombe Mbon

Kpasa wal mɛ dung nzeng ha li Sɔ

¹ Olo wen pɔm, hio ya mi, yo nde, ɛnɛ ade totɛ hazu ɛnɛ ha dea sɔy hinɛ *Kongawan. Mi putiri ndangtɛ wen ka mi ngɛraka ha ɛnɛ sɔngsi. Ɛngɛ bo nê yeksamɔ hazu mi na, hazu yo bengasisi ɛnɛ.

² Ɛnɛ pangay nɛ hio gdanga wan-tom ndɔng, ka dung tuka hio tolo. Mbwa ha nɔsasa hio wi mɛ gɔn sɔru.

³ Ma, yo nê ɔ ka dung hio kpasa wan-gɔn sɔru, hazu ɔ ha dea tom Sɔ nɛ wal ngatɛ pɛ *Nzɔy-Sɔtɛ. Ɔ takiri nde, deamɔ pɛ ɔ lɛm gde ɔ nzeng ha li Sɔ na, ma, ɔ sutɛ hazu mɔ ka Jésus-Christ dea ha tɛ ɔ.

⁴ Tangere, mi lɛma takiri fin nde, deamɔ pɔm gde mi nzeng ha li Sɔ. Hio ma wi ang ka sutɛ nde, mbwa nɛ nzeng ha li Sɔ hazu ndɔki deamɔ pɛ mbwa. Pɔm, mi lɛma de mɛgi pen pɛ mbwa.

⁵ Hazu, ɛ gɔna sɔru mi dimasi ndang hapata bhɛ pɔm. Mi nê wi mɔ kandɔ *Israel, wi mɔ nugala pɛ Benjamin. Mi nê tɛ kpasa *zuife, hio ngbabafa mi fɛt nê zuife. Mi dungɔ ha soko zugili *Farizien, zugili ndɔng ka pam *mbonga pɛ hio zuife nɛngaya pen hio olo wi fɛt.

⁶ Mi namala *giliwi mɔ eglize nɛ lululu sila. Deamɔ pɔm fɛt dungɔ nzeng ha li mbonga, nɛ ma wen bo ha zu mi na.

⁷ Sɔngsi, mi zɔka deamɔ pɔm ndɔng tuka kpaamɔ, ma, sising, mi tɛ bo ha zɔka yo tuka gbelemɔ, hazu mɔ ka Jésus-Christ dea ha tɛ mi.

⁸ Kpasa kpaamɔ pɔm, yo nde, mi ingɔ Jésus-Christ, Kongawan pɔm. Ha li kpaamɔ ɛngɛ, hio olo mɔ fɛt tɛ bo nê gbelemɔ. Mi zɔka hio mɔ pɔm fɛt tuka ngbundu mɔ, nɛ mi laka yo gde tuka nde, mi ade sɔy hinɛ Christ,

⁹ nɛ dung tɛ ndang hinɛ wɛnɛ. Mi bo nzeng ha li Sɔ hazu mi ha pama mbonga na, ma, mi tɛ bo nzeng hazu mi mɛkara Christ. Yo nɛ wal mɛkara Christ, ka Sɔ gde wi nzeng ha li wa.

¹⁰ Mɔ ka mi ngoy pentɛ, yo nde, mi aing Christ, nɛ nde, ngatɛ ka guo wɛnɛ ha soko hio fiowi ade tom ha tɛ mi fin. Yo tɔ nde, mi ngoy kpa ndangtɛ yimtɛ, ka wɛnɛ kpaa, nɛ fe tuka wɛnɛ fea.

¹¹ Mɛgi, mi gde tazu mi ha tɛ Sɔ nde, wɛnɛ begu mi fin ha soko hio fiowi.

Ɔ gbɛngsi tɛ ɔ kanɛ kpogio

¹² Mi tɛ lɛmsiri ka mɔ ndɔng soya na, nɛ mi tɛ lɛm ka wɛɛ na. Ma, mi bhɔna ha gbɛngsa tɛ mi mɛ lɛmsiri mɔ ndɔng, hazu Jésus-Christ lɛmsara mɔ fɛt nde, mi atɛ wi pɛa.

¹³ Hio ya mi, mi tɛ takiri nde, mi lɛmsara yo kari, na. Ma, mɔ ka mi de, yo nê ɛngɛ: Mi takiri ha mɔ ha gdong mi fin na, nɛ mi ha gbɛngsa tɛ mi mɛ kpa mɔ ka dung ha li mi.

¹⁴ Mɛgi, mi ha gbɛngsa tɛ mi kanɛ kpogio hazu kpa kɛamɔ pɔm. Sɔ saa ɔ mɛ kpa kɛamɔ ɛngɛ ha ngɔn nɛ wal Jésus-Christ.

¹⁵ Ɔ fɛt, ka tɛ bo nê zɔma wi ha wal mɔ Sɔ, dea nde, ɔ adung nɛ ndangtɛ takaramɔ mɛgi. Ka takaramɔ pɛ ɛnɛ nɛtɛ hazu ma mɔ, Sɔ begbasi yo fin ha ɛnɛ.

¹⁶ Ngase mɔ fɛt, ɔ bhɔn ha dede liwal ka ɔ ndara gbo sising.

¹⁷ Hio ya mi, ɛnɛ zɔk pata deamɔ pɔm de nɛ pɛ ɛnɛ. Ɛnɛ zɔk fin pata wi ka de mɔ tuka ɔ, de nɛ pɛ ɛnɛ.

¹⁸ Mɔ ka mi bagba tazu ɛnɛ ze nɛdɔka kari, mi putiri fin yo sising nɛ milikwa ha li mi nde, hio dɔka wi ang, ka deamɔ pɛ mbwa osi nde, mbwa nê hio ngana pɛ getakate pɛ Christ.

¹⁹ Sɔ bebhondisi mbwa ha kpogio ngimɔ. Zang mbwa tɛ bo nê sɔ pɛ mbwa, mbwa ha suotɛ hazu deamɔ foy pɛ mbwa, nɛ mbwa takiri mɔ sɔna ha zu hio mɔ nzan.

²⁰ Ma, pɛ ɔ, le pɛ ɔ ha zang ngɔn. Nɛ ɔ ha kera nde, *Wan-kpasisi ɔ, *Kongawan Jésus-Christ, begutɛ haki tɛnɛ.

²¹ A bekifiri hio mɔka kilitɛ ɔ gde nɛ lɛkɛ-lɛkɛa tuka kilitɛ wa. A bede yo nɛ wal ndangtɛ ziomɔ ɛngɛ ka de nde, wɛnɛ agan zu mɔ fɛt.