Filipe 1 - Takarata pɛ Sɔ Mbombe Mbon

Fanamɔ

¹ Yo nê ɔ, Paul nɛ Timothée, hio wan-tom pɛ Jésus-Christ, ka ngɛriki takarata ɛngɛ tomsi ha ɛnɛ, hio wi ndɔng mɔ le Filipe ka de sɔy hinɛ Jésus-Christ. Ɔ tomsi yo fin ha hio wi mɔ zu ɛnɛ nɛ ha hio *diakre.

² Sɔ, Bafa ɔ, hinɛ *Kongawan Jésus-Christ ade *dede sila ha tɛ ɛnɛ, nɛ ha gaamɔ ha ɛnɛ.

Paul lukoso Sɔ hazu hio wi pɛ Christ mɔ Filipe

³ Swe fɛt ka mi takiri ha ɛnɛ, mi ha oeba ha Sɔ pɔm hazu ɛnɛ.

⁴ Nɛ swe fɛt ka mi gɔ Sɔ hazu ɛnɛ, mi de yo nɛ totɛ,

⁵ hazu ɛnɛ nê hio sɔy-tom pɔm ha yɛbhasa *Dede Wen angiri ha yala ka ɛnɛ mɛkara yo, kanɛ sising.

⁶ Mi ingɔ nɛdedea fɛt nde, Sɔ ka angara dea dede tom ha tɛ ɛnɛ, a bhɔna ka ha dea yo nɛnɛ, kanɛ a lɛmsara yo ha swe ka Jésus-Christ bepe nɛ.

⁷ Yo nê dedea nde, mi atakiri mɔ hazu ɛnɛ mɛgi, hazu ɛnɛ dung ha zang sila mi. Sising mi dung ha twa zɔbhɔ, sɔngsi mi lea gdong Dede Wen nɛ bulo yo nde, hio wi amɛkiri yo nɛkpasa. Ɛnɛ bhɔna ka ha dea sɔy hinɛ mi ha zang *dede sila, ka Sɔ de ha tɛ mi ha zang mɔ ndɔng fɛt.

⁸ Sɔ nê wan-kɛwen pɔm nde, mi ngoya ɛnɛ fɛt nɛ ndangtɛ kpasa ngoy ka Jésus-Christ ngoya nɛ ɛnɛ.

⁹ Mi gɔ Sɔ hazu ɛnɛ nde, ɛnɛ angoy may pen mɔ sɔngsi, nɛ nde, ɛnɛ akpɔtɛ ha zang ingɔmɔ nɛ mbaramɔ.

¹⁰ Hazu mi ngoy nde, ɛnɛ aing mɔ ndɔng, ka dung nɛdedea nɛkpasa, tuka nde, ɛnɛ adung nɛ saa, gdangamɔ bona, kanɛ swe ka Jésus-Christ bepe nɛ.

¹¹ Ha swe ɛngi, tunɔ pɛ ɛnɛ bedon nɛ nzeng deamɔ ka Jésus-Christ dea nɛ wal ɛnɛ tuka nde, Sɔ akpa *lɛkɛ-lɛkɛmɔ nɛ lukosomɔ ang.

Wal ka * Dede Wen yɛbha

¹² Hio ya mi, mi ngoya ɛnɛ aing nde, ngase hio yeksamɔ ka kpaa mi hakɛ, yo dea nde, Dede Wen ayɛbhi.

¹³ Yo nê ɛngi, ka hio nasara pam twa pɛ gɔfɔrma nɛ hio mbing wi fɛt ingɔ nde, mi ha twa zɔbhɔ hazu mi nê wan-tom pɛ Christ.

¹⁴ Nɛ sulo ya ha *Kongawan, ka zea nde mi ha zɔbhɔ, mbwa gdea tazu mbwa ha tɛ Kongawan pen mɔ sɔngsi, nɛ mbwa baa da mɛ bul wen pɛ Sɔ, ke bona.

¹⁵ Kpasawen, hio ma ha soko mbwa ha bulo wen tɛ Christ hazu mbwa ha dea silamɔ nɛ siokafɛ sungiri nɛ mi. Ma, hio ma bul pɛ mbwa nɛ *dede sila.

¹⁶ Wi ndɔng de mɛgi hazu mbwa ngoya mi. Mbwa ingɔ nde, Sɔ gdea mi hakɛ hazu nde, mi ale gdong Dede Wen.

¹⁷ Ma, pɛ hio oloa, mbwa bul wen tɛ Christ nɛ gdanga takaramɔ ha zanga. Nɛ wal dea mɔ mɛgi, mbwa ngoy mɛ ngbangsi yeksamɔ pɔm hakɛ ha twa zɔbhɔ.

¹⁸ Ma, yo bede ge? Mana takaramɔ pɛ mbwa nɛ gdangaa mana nɛ dedea, mbwa bulo wen tɛ Christ kari, nɛ mi de totɛ hazua. Nɛ mi bebhɔn ha dea totɛ.

¹⁹ Hazu mi ingɔ nde, mɔ ndɔng fɛt bede nde, Sɔ akpasisi mi. A bede mɛgi, hazu ɛnɛ ha gɔa wɛnɛ, nɛ hazu Sɔtɛ Jésus-Christ ha gbakara mi.

²⁰ Mi gdea tazu mi fɛt ha tɛ Sɔ, nɛ mi ngoy nɛkpasa nde, mi ade ma mɔ foy ha li Sɔ ndang na. Sising nɛ swe fɛt, mi bhɔna nɛ da, nɛ mi bede mɔ fɛt nde, nɛ wal tunɔ pɔm mana nɛ wal fio pɔm, hio wi azɔk ha tɛ mi nde, Christ nɛ gasaa.

²¹ Hazu pɔm, tunɔ pɔm yo nê Christ, nɛ fio pɔm yo nê kpaamɔ pɔm.

²² Ma, ka mi bhɔna nɛ zutunɔ, mi lɛma de nɛ dede tom. Mɛgi mi ing mɔ ka mi beweki na.

²³ Hazu, mi ha soko mɔ bwa: Mi nɛ hɛl mɛ fe nde, mi adung hinɛ Christ, ɛngi nɛ dedea pentɛ pet.

²⁴ Ma, yo lɛma nde, mi abhɔn nɛ zutunɔ hazu ɛnɛ.

²⁵ Tuka mi gdea tazu mi fɛt ha mɔ mɛgi, mi ingɔ nɛdedea nde, mi bebhɔn nɛ zutunɔ. Mi bebhɔn hinɛ ɛnɛ fɛt tuka nde, ɛnɛ akpɔtɛ ha wal mɔ Sɔ, nɛ nde, ɛnɛ ade totɛ ha zang mɛkaramɔ.

²⁶ Ka mi bekifiri fin tɛ dung ha soko ɛnɛ, ɛnɛ besutɛ pen mɔ sɔngsi hazu mɔ ka Jésus-Christ dea ha tɛ mi.

²⁷ Pen fɛt, ɛnɛ ade mɔ lɛm nɛ Dede Wen pɛ Christ, mana mi benɛ ha zɔka ɛnɛ, mana mi bhɔna nɛ yɛa. Lɛma nde, mi aze nde, ɛnɛ ha dea tom nɛ kɔ may nɛ ndangtɛ takaramɔ, nɛ nde, ɛnɛ ha bio bulo nɛ sila ndang tuka nde, mɛkaramɔ nɛ Dede Wen ayɛbhi.

²⁸ Ka ɛnɛ ayu ke hio ngana pɛ ɛnɛ fin na. Ka ɛnɛ zati ha li mbwa, yo begba tazu mbwa nde, Sɔ begɔn kita ba mbwa, nɛ fin nde, Sɔ kpasasa ɛnɛ kari. Yo nê Sɔ nɛ tɛ wa ka begbasi yo ha mbwa mɛgi.

²⁹ Nɛ wal dede sila pɛa, Sɔ weka ɛnɛ bo sɔna hazu mɛkiri Christ na, ma, fin nde, ɛnɛ akpa yeksamɔ hazu ɛnɛ nê pɛa.

³⁰ Sising, ɛnɛ tɛ bo nê hio sɔy-bibulo pɔm. Bulo ɛngɛ, yo nê ndangtɛ bulo ka ɛnɛ zɔka mi ha bioa, nɛ ka ɛnɛ ze nde, mi bhɔna ha bioa sising.