Efeze 6 - Takarata pɛ Sɔ Mbombe Mbon

Bem hinɛ gdibafa nɛ gdinana

¹ Ɛnɛ hio bhobem, mɔ ka *Kongawan ngoya, yo nde, ɛnɛ aze nu gdibafa nɛ gdinana, hazu ɛngɛ nɛ nzeng.

² *Mbonga ka tɔ nde: «Mɛ ba bafa mɛ nɛ nana mɛ nɛ zioa», yo nê bosi mbonga ka Sɔ gɔna nɛ nu mɛ kɛ nɛ hio wi ka pam yo.

³ Gɔnanu ɛngɛ nde: «Tuka nde, mɛ akpa totɛ, nɛ nde, pata mɛ ayɛ ha zu nu.»

⁴ Nɛ ɛnɛ, hio gdibafa nɛ hio gdinana, ka ɛnɛ ayimsi sila hio bem pɛ ɛnɛ na. Ma, ɛnɛ day mbwa, ɛnɛ osi dede wal ha mbwa, nɛ ɛnɛ ha mbwa mbɔla ka lɛm nɛ wen pɛ Kongawan.

Hio bala hinɛ wan pɛ mbwa

⁵ Ɛnɛ, hio bala, dea nde, ɛnɛ aze nu hio wan pɛ ɛnɛ mɔ nzan ɛngɛ. Ɛnɛ ayu ke mbwa, nɛ tɛ ɛnɛ ayak ha li mbwa. Ɛnɛ de tom ha mbwa nɛ sila ɛnɛ fɛt mɛ ze nde, ɛnɛ de yo ha Jésus-Christ.

⁶ Lɛma nde, ka ɛnɛ ade yo nɛ peali mana hazu ki longo pɛ wi na. Ma, ɛnɛ ade yo tuka hio bala pɛ Christ ka ha sila mbwa fɛt ha dea mɔ ka Sɔ ngoya.

⁷ Ka ɛnɛ ade tom ha mbwa nɛ takaramɔ nde, ɛnɛ de yo sɔna ha hio wi, na. Ma, ɛnɛ ade yo nɛ *dede sila tuka ka ɛnɛ ha dea tom ɛngɛ ha *Kongawan.

⁸ Tazu ɛnɛ agba nde, Kongawan bekɛ wi ndang ndang fɛt lɛm nɛ tom ka wia dea. Ngase ka wia nê bala mana bele.

⁹ Yo fin gbesi nɛ ɛnɛ, hio wan-ba bala. Dea nde, ɛnɛ ade mɔ nɛ wala ha tɛ hio bala pɛ ɛnɛ. Ka ɛnɛ atubhi da ha zu mbwa na. Ɛnɛ ing nde, ɛnɛ hinɛ hio bala pɛ ɛnɛ fɛt, wan pɛ ɛnɛ ka nê ndang sɔna, ka dung ha zang ngɔn. Wɛnɛ gba pɛa soko hio wi na.

Wal mɛ gan nɛ zu * Satan

¹⁰ Kpogio wen pɔm nê ɛngɛ: Ɛnɛ ngasisi tɛ ɛnɛ ha zang dea sɔy hinɛ *Kongawan, ka ɛnɛ akpa ngatɛ ha zang gasa ziomɔ pɛa.

¹¹ Ɛnɛ kay hio mɔ-bibulo ka Sɔ ha ha ɛnɛ, tuka nde, ɛnɛ azati nɛ nɔa nging ha ngimɔ ka Satan besɛbhili ɛnɛ.

¹² Hazu bulo ka ɔ bi, ɔ bi yo sungiri nɛ hio wi mɔ zu nu na. Ma, ɔ bi yo sungiri nɛ hio sɔtɛ gan zu mɔ nɛ hio nga sɔtɛ, sungiri nɛ hio gasa wan mɔ tutum ɛngɛ sising nɛ hio gdanga sɔtɛ.

¹³ Hazu ɛngi, ɛnɛ kay hio mɔ-bibulo fɛt ka Sɔ ha ha ɛnɛ. Mɛgi, ka nga ngimɔ behɔ, ɛnɛ bezati nanga ɛnɛ nging, ɛnɛ bebi tumbɔ kanɛ kpogio, nɛ ka yo kara kari, ɛnɛ bhɔna ka yola nɛ nɔa.

¹⁴ Mɛgi, ɛnɛ dung gdungɛ-gdungɛ: Ɛnɛ ku tɛwen libhiki nɛ guntini ɛnɛ tuka pɛrɛng. Ɛnɛ ku dea nzengmɔ yol tuka koko mɔ bibulo ha mbanzi ɛnɛ.

¹⁵ Tuka nakala, ɛnɛ ku hɛl mɛ bul *Dede Wen gaamɔ pɛ Sɔ.

¹⁶ Ngimɔ fɛt, ha bhandi fɛt, ɛnɛ ku mɛkaramɔ ba ha kɔ ɛnɛ tuka kɛlɛ. Mɛgi, ka Satan bepi hio sɛ ka we ha nua, ɛnɛ beguy yo fɛt.

¹⁷ Tuka ndutu bolo, ɛnɛ yol *mɔkpasi, ka Sɔ kpasasa nɛ ɛnɛ. Ɛnɛ ku fin Wen pɛ Sɔ tuka gbapa ka *Nzɔy-Sɔtɛ ha ha ɛnɛ.

¹⁸ Ɛnɛ gɔ Sɔ ngimɔ fɛt, nɛ ɛnɛ lokitɛ ha wɛnɛ nɛ wal ngatɛ pɛ Nzɔy-Sɔtɛ. Ɛnɛ ayang la, nɛ ɛnɛ bhɔn ka ha gɔa Sɔ nɛ yikosila hazu hio wi pɛa fɛt.

¹⁹ Ɛnɛ gɔ Sɔ hazu mi fin tuka nde, Sɔ aha mi wen ka mi betɔ, nɛ nde, mi abul nɛ da goto Dede Wen, ka badung sɔngsi nɛ wuso ha li hio wi.

²⁰ Mi nê wan-nɛkasara hazu Dede Wen, ngase ka mi nê wan-zɔbhɔ. Mɛgi, ɛnɛ gɔ Sɔ nde, mi abul Dede Wen pɛa nɛ da nɛ wala.

Kpogio wen

²¹ Tishike, ya ɔ ka ɔ ngoya pentɛ, wɛnɛ nê kpasa sɔy-tom pɛ ɔ ha wal tom pɛ *Kongawan. Yo nê wɛnɛ nɛ pɛa tɛ ka betɔ ha ɛnɛ kasi tɛ mi tuka nde, ɛnɛ aing mɔ ka mi de.

²² Mɛgi mi tomsi wɛnɛ ha ɛnɛ tuka nde, ɛnɛ aing dungɔ pɛ ɔ, nɛ nde, wɛnɛ aha ngatɛ ha sila ɛnɛ.

²³ Sɔ, Bafa ɔ, hinɛ Kongawan Jésus-Christ, mbwa aha gaamɔ, ngoy, nɛ mɛkaramɔ ha ɛnɛ, hio ya ɔ fɛt.

²⁴ Sɔ ade *dede sila ha tɛ wi ndɔng fɛt ka bhɔn ka ha ngoya Kongawan pɛ ɔ, Jésus-Christ, nɛ ngoy ka kpogioa bona.