Efeze 5 - Takarata pɛ Sɔ Mbombe Mbon

Deamɔ pɛ hio wi ndɔng ka dung ha saamɔ

¹ Sising ɛnɛ tɛ bo nê hio bem pɛ Sɔ ka wɛnɛ ngoya pentɛ. Mɛgi, ɛnɛ zɔk pata deamɔ pɛa de nɛ pɛ ɛnɛ.

² Ha zang deamɔ pɛ ɛnɛ fɛt, lɛma nde, ɛnɛ abhɔn ka ha ngoya hio ma ɛnɛ. Ɛnɛ de mɔ gbesi tuka Christ ka ngoya ɔ, nɛ ka fea gɔn zu ɔ. Fio pɛa dung tuka dede sadaka ka pɛla dung nɛ kuloa siing, nɛ ka ha totɛ ha Sɔ.

³ Ɛnɛ tɛ bo nê hio wi pɛ Sɔ. Mɛgi, dea nde, ɛ aze ha soko ɛnɛ wen dea tili wanza, mana dea mɔ foy nɛtɛ-nɛtɛ, mana dea wɔ kpaamɔ fin na.

⁴ Ka ɛnɛ atɔ wen nɛ tum, mana wen foy, mana wen gɔnali na. Mɔ ndɔng lɛm fin nɛ ɛnɛ na. Ma, dea nde, wen nu ɛnɛ adak wi mɛ tɔ oeba ha Sɔ.

⁵ Ɛnɛ ing nɛdedea nde, hio wan-de wanza, hio wan-de mɔ nyɛl, hio wan-de wɔ kpaamɔ, mbwa fɛt lɛm kpa bhandi ha Kongakandɔ pɛ Christ nɛ pɛ Sɔ ndang na. Hazu dea wɔ kpaamɔ, yo nê ndangtɛ mɔ tuka dea tom hio gbele sɔ.

⁶ Hio ma wi ha tɔa hio tum wen nde, ɛnɛ ade hio gdangamɔ ndɔng ki. Ka mbwa aosili ɛnɛ na! Yo nê hazu tili gdangamɔ ndɔng ka Sɔ de ngambi sungiri nɛ wi ndɔng ka ze nu wa na.

⁷ Mɛgi, ka ɛnɛ ade sɔy hinɛ hio tili wi ndɔng na.

⁸ Sɔngsi, ɛnɛ badung ha zang tutum. Ma, sising, nɛ wal dea sɔy hinɛ *Kongawan, ɛnɛ dung ha zang saamɔ. Mɛgi, dea nde, ɛnɛ ade mɔ tuka wi ka dung ha zang saamɔ.

⁹ Hazu wi ka dung ha zang saamɔ beway nɛ tili dedemɔ fɛt, nɛ deamɔ nzeng, nɛ fin nɛ deamɔ lɛm nɛ tɛwen pɛ Sɔ.

¹⁰ Ɛnɛ agbɛngsi tɛ mɛ ing hio mɔ ka ha totɛ ha Kongawan.

¹¹ Ka ɛnɛ ade pɛ ɛnɛ hio tum mɔ pɛ hio wi ka dung ha zang tutum, na. Ma, ɛnɛ agbasi long nde, mɔ ndɔng nê gdanga deamɔ.

¹² Wen mɔ ka hio wi ndɔng de nɛ wuso, ɛ lɛm gba gotoa na, hazu yo nê mɔ foy.

¹³ Ma, ha ngimɔ ka hio mɔ ndɔng fɛt gboa ha saamɔ long, ɛ being nde, mɔ ndɔng nê gdanga deamɔ nɛkpasa.

¹⁴ Hazu, mɔ fɛt ka ɛ gbasi long, yo tɛ bo nê saamɔ. Yo nê hazu ɛngi ka ɛ tɔa: «Mɛ ka dung ha ɔala, mɛ tun. Mɛ gutɛ ha soko hio fiowi, nɛ Christ beba tuka saamɔ ha zu mɛ.»

¹⁵ Hazu ɛngi, ɛnɛ pangay nɛ deamɔ pɛ ɛnɛ. Ka ɛnɛ ade mɔ tuka hio yerawi na, ma, ɛnɛ de mɔ tuka hio zɔma wi.

¹⁶ Ka ɛnɛ apensi ngimɔ pɛ ɛnɛ nɛgbelea na, ma, ɛnɛ de dedemɔ ang hazu ngimɔ ɛngɛ sising nɛ gdangaa.

¹⁷ Ka ɛnɛ adung tuka hio tamtum wi na. Ma, ɛnɛ ki wal hazu ing mɔ ka Kongawan ngoya nde, ɛnɛ ade.

¹⁸ Ka dɔkɔ ade ɛnɛ na, yu nde, ɛnɛ betɛ tɛ pofa wi ka de mɔ tum. Ma, ɛnɛ agde nde, *Nzɔy-Sɔtɛ adon sila ɛnɛ hɛrr.

¹⁹ Ka ɛnɛ wesara may, ɛnɛ be hio *gima pɛ David, hio gima lukisi Sɔ, nɛ hio gima ka tɛ nɛ wal Nzɔy-Sɔtɛ. Ɛnɛ be yo fɛt hazu lukisi nɛ Kongawan nɛ sila ɛnɛ fɛt.

²⁰ Ɛnɛ tɔ oeba ha Sɔ, Bafa ɔ, hazu mɔ fɛt ha ngimɔ fɛt nɛ ling Kongawan pɛ ɔ, Jésus-Christ.

Wei hinɛ bhoko

²¹ Hazu ɛnɛ ha yuo ke Christ, dea nde, ɛnɛ ahil nɛ mɛndi ha si may.

²² Ka bo nê pɛ ɛnɛ hio bhoko, dea nde, ɛnɛ ahil nɛ mɛndi ha si hio wei pɛ ɛnɛ gbesi tuka ka ɛnɛ hil nɛ mɛndi ha si *Kongawan.

²³ Hazu wei nê wan hazu ko pɛa gbesi tuka Christ nê wan hazu *giliwi mɔ eglize pɛa. Christ nê *wan-kpasisi giliwi mɔ eglize pɛa, ka dung nê kilitɛ wa.

²⁴ Mɛgi, dea nde, hio bhoko ahil nɛ mɛndi ha mɔ fɛt ha si hio wei pɛ mbwa gbesi tuka ɛngɛ ka giliwi mɔ eglize hil nɛ ha si Christ.

²⁵ Nɛ ɛnɛ, hio wei, dea nde, ɛnɛ angoy hio ko pɛ ɛnɛ nɛ ndangtɛ ngoy ka Christ ngoya nɛ giliwi mɔ eglize pɛa. Wɛnɛ fea gɔn zu mbwa,

²⁶ tuka nde, mbwa adung nɛ nzɔya. A sasasa mbwa nɛ wal li, ka ɛ gdumso mbwa ang, nɛ fin nɛ wal wen nu wa.

²⁷ A dea mɛgi hazu gde giliwi mɔ eglize pɛa nɛ lɔkaa, salimɔ bona, yigdokomɔ bona, gdangamɔ ndang bona. Ma, mbwa bedung ha li wa nɛ nzɔya, ma wen bo ha zu mbwa na.

²⁸ Yo fin gbesi nɛ hio wei. Dea nde, mbwa angoy ko pɛ mbwa tuka tɛ mbwa. Wi ka ngoy ko pɛa, yo osi nde, a ngoya tɛ wa nɛ pɛa tɛ.

²⁹ Kpasawen, ma wi tɛ sɛn tɛ wa nɛ pɛa tɛ ma swe ndang na. Ma, wɛnɛ ha pama yo, nɛ wɛnɛ ha daya yo nɛdedea. Christ ha dea gbesi nɛ ɔ, giliwi mɔ eglize pɛa,

³⁰ hazu ɔ nê hio gbakɔtɛ wa.

³¹ Hazu ɛngi, takarata pɛ Sɔ tɔa: «Dea nde, wei alak bafa wa nɛ nana wa gde hazu ndari tɛ hinɛ ko pɛa. Mɛgi, mbwa bwa fɛt bedung nê wi ndang sɔna.»

³² Ɛngɛ nê ma gasa mbaramɔ ka wi lɛm ing gotoa nɛhasa na. Mi zɔk pɔm nde, wen ɛngɛ, yo ha zu Christ hinɛ giliwi mɔ eglize pɛa.

³³ Ma, yo fin gbesi nɛ ɛnɛ. Dea nde, wei ndang ndang fɛt angoy ko pɛa tuka tɛ wa. Nɛ dea nde, bhoko ndang ndang fɛt aba wei pɛa nɛ zioa.