Deamɔ 22 - Takarata pɛ Sɔ Mbombe Mbon

¹ «Hio ya mi, hio bafa mi, ɛnɛ ze mɔ ka mi betɔ hazu kɛ nɛ wen pɔm sising.»

² Ka mbwa zea wɛnɛ ha wolamɔ nɛ nu Hebro, mbwa kara selele pen mɔ sɔngsi. Nɛ Paul tɔa:

³ «Mi nê zuife, ɛ bhɛa mi ha gasa le Tarse ha kandɔnu Silisi. Ma, mi kpɔatɛ hakɛ ha Jérusalem. Wan-osimɔ pɔm nê Gamaliel, ka osa ha mi *mbonga pɛ hio ngbabafa ɔ nɛdedea nzeng. Mi dungɔ nɛ lululu sila hazu Sɔ gbesi tuka ɛnɛ fɛt swe mɛsɛ.

⁴ Mi namala hio wi ka ndara wal pɛ *Kongawan Jésus kanɛ mi gbɛa hio ma. Mi baa hio wei nɛ hio bhoko sang nɛ pɛl pi ha twa zɔbhɔ.

⁵ *Wan-zu hio wan-hasadaka nɛ hio kotowi mɔ Jérusalem lɛma mɛkiri nde, wena nê tɛwen. Ka mi nɛa ha gasa le Damas, mbwa haa mi takarata ka osa ha hio wan-zu *twa gɔ Sɔ haki nde, mi nɛ ziomɔ mɛ sang hio wi pɛ Christ sinɛ ha Jérusalem hazu ndulsi mbwa.»

Paul tɔa wen kiforo sila pɛa

⁶ «Ka mi boka ha liwal sanga nɛ Damas, ka swe tɛ bo ha sila zu, ma gasa saamɔ zilo nɛhasa ha ngɔn tɛ, tɛ ba zikiri mi kpɛluɛ-kpɛluɛ.

⁷ Mi teka ha nu nɛ zea ma gɛl ka ana mi: ‹Saul, Saul, mɛ namili mi hazu ge?›

⁸ Mi kɔa nɛ anamɔ: ‹*Kongawan, mɛ nê o?› Gɛl ɛngɛ kiforo wen ha mi: ‹Mi nê Jésus, wi mɔ Nazaret, ka mɛ ha namala.›

⁹ Hio wi ndɔng ka nɛa hinɛ mi ha liwal, mbwa zɔka saamɔ, ma, mbwa ze gɛl wi, ka wolamɔ ha mi na.

¹⁰ Nɛ mi anamɔ: ‹Kongawan, mi bede mɛng?› Kongawan kiforo wen ha mi: ‹Mɛ gutɛ, mɛ nɛ ha Damas. Haki, ɛ beosi ha mɛ mɔ fɛt ka Sɔ weka nde mɛ ade.›

¹¹ Yolo gasa saamɔ ɛngɛ gdɔka li mi. Mɛgi, hio sɔy-yali pɔm baa kɔ mi, nɛ ngbɔsa mi nɛnɛ ha Damas.

¹² «Ma wi dungɔ haki ling wa nde, Ananias. Wɛnɛ nɛ mboazu ha li Sɔ, nɛ wɛnɛ ha pama *mbonga pɛ Moïse. Hio *zuife mɔ Damas fɛt ha tɔa dede lingtɛ wa.

¹³ Wɛnɛ tɛa ha pɔm nɛ a tɔa: ‹Saul, ya mi, mɛ zɔk mɔ nɛ mbinga!› Nɛ ha ndangtɛ ngimɔ mi zɔka wɛnɛ nɛ saa.

¹⁴ A tɔa fin: ‹Sɔ pɛ hio ngbabafa ɔ weka mɛ sɔngsi hazu nde, mɛ aing mɔ, ka wɛnɛ ngoya, nɛ nde, mɛ azɔk Jésus, *nzeng wi pɛ Sɔ, nɛ ze gɛl wa.

¹⁵ Mɛ bekɛ wen pɛa ha li wi fɛt, nɛ mɛ betɔ wen mɔ, ka mɛ zɔka nɛ ka mɛ zea.

¹⁶ Mɛ keri fin nɛ ge nde? Gutɛ mɛ, mɛ tɛ ka mi agdumsi mɛ ha li. Mɛ sa ling Jésus nɛ wɛnɛ bezosi *sɛmbɔ pɛ mɛ.›

Sɔ weka Paul hazu bul wen ha hio mbing kandɔ

¹⁷ «Hapata ɛngi mi kiforo si ha Jérusalem. Ka mi ha gɔa Sɔ ha zang *gasa twa Sɔ, mi zɔka ma zizimɔ.

¹⁸ Mi zɔka *Kongawan ha tɔa ha mi: ‹Mɛ gbo ha Jérusalem nɛhasa pen, hazu hio wi hakɛ lɛm mɛkiri wen, ka mɛ begbasi ha zu mi na.›

¹⁹ Ma, mi tɔa: ‹Kongawan, mbwa ingɔ nɛdedea nde, mi dungɔ ha nɛa ha hio *twa gɔ Sɔ, nɛ mi pio ha twa zɔbhɔ hio wi ndɔng ka mɛkara mɛ, nɛ mi dea nde, ɛ amɛl mbwa.

²⁰ Nɛ ha ngimɔ gbɛa Etienne, wan-kɛwen pɛ mɛ, mi fin dungɔ ang. Mi mɛkara yo, nɛ mi pama la pɛ wi ndɔng, ka gbɛa wɛnɛ.›

²¹ Mɛgi, Kongawan tɔa ha mi: ‹Mɛ pen, hazu mi ngoy tomsi mɛ nɛ yɛa ha soko hio mbing kandɔ!›»

Paul hinɛ gasa kagama-bulo mɔ Rome

²² Giliwi zea Paul tee kanɛ ngimɔ ka wɛnɛ tɔa wen ɛngɛ. Mbwa gdɔra nɛ ngagɛl: «Gbɛ wɛnɛ yunɛ! Lɛm nde, wɛnɛ adung nɛ zutunɔ na!»

²³ Mbwa gdɔra, nɛ mbwa pio gasa la pɛ mbwa nɛ kay gbutunu a ngɔn.

²⁴ Mɛgi, gasa kagama-bulo haa nu mɛ ku Paul nɛnɛ ha zang kin, nɛ zuri wɛnɛ nɛ zambala tuka nde, wɛnɛ atɔ gotomɔ, ka hio giliwi ha gdɔra sungiri nɛ wɛnɛ.

²⁵ Nɛ ka hio wan-bibulo ha sanga wɛnɛ hazu zuri, a tɔa ha kagama-bulo, ka dungɔ hapɛtɛ wa: «Ka ɛ tɛ gɔn ka kita ha zu ma bele mɔ Rome na, ɛnɛ lɛma zuri wɛnɛ nde?»

²⁶ Ka kagama-bulo zea wen ɛngɛ, a nɛa nɛ tɔ wena ha gasa kagama-bulo, a tɔa: «Mɛ de mɛgɛ nɛ ge? Zɔk, wi kɛ nê bele mɔ Rome!»

²⁷ Gasa kagama-bulo tɛa tɛ ani Paul: «Mɛ tɔ ha mi, mɛ nê bele mɔ Rome?» Nɛ a kiforo wen: «Ey, yo mɛgi.»

²⁸ Nɛ gasa kagama-bulo tɔa: «Pɔm, mi kpea nɛ dɔka mbɔli mɛ tɛ nɛ bele mɔ Rome.» Paul tɔa: «Pɔm, ɛ bhɛa mi nɛ bele mɔ Rome.»

²⁹ Sising wi ndɔng, ka ngoya zuri Paul tuka nde, wɛnɛ atɔ wen, tiko nɛ pata lak wɛnɛ gde. Gasa kagama-bulo fin dungɔ nɛ ke, hazu a ingɔ nde, wɛnɛ sanga ma bele mɔ Rome.

Paul ha li hio * wan-kpo zuwen pɛ hio zuife

³⁰ Ka mɔ saa, gasa kagama-bulo ngoya ing ngbak gotomɔ ka hio zuife fundo nɛ Paul. Wɛnɛ bulo pɛl ha tɛ Paul, nɛ a haa nu ha hio gasa wan-hasadaka nɛ hio wan-kpo zuwen nde, mbwa awesiri may. Nɛ wɛnɛ kuo Paul tɛ gde ha li mbwa.