2 Timothée 3 - Takarata pɛ Sɔ Mbombe Mbon

Mɔ ka behɔ ha hio kpogio yala

¹ Mɛ aing nɛdedea nde, hio nga ngimɔ behɔ ha hio kpogio yala.

² Hio wi bedung nê wan-kul, wan-ngoy mbɔli, wan-lukisi tɛ, wan-sutɛ, wan-fɛngsi Sɔ, wan-de kpandele sungiri nɛ gdibafa nɛ gdinana, wan-ing tɔa oeba na, wan-bhɛsiri nzɔy mɔ,

³ wan-nga sila, wan-tukili mɔ, wan-tɔ lingtɛ, wan-de ngamɔ, wan-nyalɔ, wan-sungiri dedemɔ,

⁴ wan-ha kasatɛ, wan-de ngambi, nɛ fin wan-ngbangsi tɛ. Ha bhandi ngoya Sɔ, mbwa bengoy nɛ mɔ ka ha totɛ ha mbwa.

⁵ Mbwa beosi tɛ tuka wan-lukisi Sɔ, ma, mbwa bemul pi ngatɛ ka tɛ nɛ wal mɛkara Sɔ. Mɛ ato gdong ha hio tili wi tuka ɛngi.

⁶ Hio ma ha soko mbwa ha lea twa nɛnɛ, nɛ mbwa ha baa ha pɔndɔ pɛ mbwa hio mɔka bhoko ndɔng ka dona nɛ dɔka gdangamɔ, nɛ ka hio tili hɛl mɔ gana zu mbwa.

⁷ Hio bhoko ndɔng ha yamba mɔ ngimɔ fɛt, ma, mbwa lɛm hɔ ha ingɔ tɛwen ndang na.

⁸ Hio wi ndɔng ha sungoro tɛwen pɛ Sɔ gbesi tuka ka Yanes hinɛ Yambres basungiri nɛ Moïse. Takaramɔ pɛ mbwa nɛ gdangaa, nɛ mɛkaramɔ pɛ mbwa bo nê kpasamɔ na.

⁹ Ma, mbwa lɛm kpɔtɛ nɛnɛ na, hazu hio wi fɛt being nɛdedea nde, mbwa nê yerawi gbesi tuka Yanes nɛ Yambres.

Kpogio mbɔla

¹⁰ Ma, pɛ mɛ, mɛ naka pata osamɔ pɔm, deamɔ pɔm, bhekamɔ pɔm, mɛkaramɔ pɔm, baa sila pɔm, ngoy pɔm, nɛ yikosila pɔm.

¹¹ Mɛ ingɔ hio namalamɔ ka hio wi namala nɛ mi, nɛ hio ngamɔ ka mbwa dea ha tɛ mi ha le Antioshe, ha le Ikoniom nɛ ha le Listre. Mbwa namala mi pentɛ, ma, *Kongawan gbosasa mi ha zang mɔ ndɔng fɛt yunɛ.

¹² Ey, hio wi benamili ɛ ndɔng fɛt ka ngoy dung nɛ mboazu ha li Sɔ nɛ wal dea sɔy hinɛ Jésus-Christ.

¹³ Ma, hio gdanga wi nɛ hio wan-osili wi, mbwa bebhɔn ha dea gdangamɔ nɛnɛ pen mɔ sɔngsi. Mbwa beosili hio wi, nɛ hio wi beosili mbwa fin.

¹⁴ Ka bo nê pɛ mɛ, mɛ bhɔn nɛ nɔa nging ha mɔ ka mɛ yamba, nɛ ka mɛ mɛkara nde, yo nê tɛwen. Hazu mɛ ingɔ wi ndɔng ka osa yo ha mɛ.

¹⁵ Mɛ ingɔ takarata pɛ Sɔ nisi ha ngimɔ bhobem. Takarata ɛngɛ lɛma ha mɛ mbaramɔ hazu kpasi nɛ wal mɛkara Jésus-Christ.

¹⁶ Hio wen zang takarata pɛ Sɔ fɛt gbo ha nu Sɔ. Nɛ hio wen ndɔng ndang ndang fɛt lɛma hazu osi mɔ, hazu gbasi ha wi gdanga deamɔ pɛa, hazu yolsi wi, nɛ hazu ngbɔsi wi ha dea nzengmɔ.

¹⁷ Mɛgi takarata pɛ Sɔ de nde, wi pɛ Sɔ alɛm wɛɛ, nɛ akpa ngatɛ hazu de nɛ hio tili dede tom fɛt.