2 Korente 6 - Takarata pɛ Sɔ Mbombe Mbon

¹ Mɛgi, ɔ ka de tom hinɛ Sɔ, ɔ mbo ɛnɛ nde, ka ɛnɛ azɔk *dede sila ka Sɔ dea ha tɛ ɛnɛ tuka gbelemɔ na.

² Kpasawen, Sɔ batɔ: «Mi zea mɛ ha dede ngimɔ, mi gbakara mɛ ha swe kpasisi wi.» Ɛnɛ zɔk, kpasa dede ngimɔ lɛma kari, swe kpasisi wi lɛma kari.

³ Ɔ ngoy nde, ma wi ndang afɛngsi tom pɛ ɔ na. Yo nê ɛngi, ka ɔ de mɔ fɛt tuka nde, ma wi ndang akɔ nanga wa ha tɛ ɔ ha wal mɔ Sɔ na.

⁴ Ma, ha deamɔ pɛ ɔ fɛt, ɔ ha osa nde, ɔ nê hio wan-tom pɛ Sɔ: Ɔ ha yɔnga yini ha zang hio yeksamɔ, ha zang ngamɔ, nɛ ha zang ngɔtɛ.

⁵ Hio wi ha mɛla ɔ, mbwa ha pio ɔ ha twa zɔbhɔ, nɛ mbwa ha dea woto-wotomɔ ha tɛ ɔ. Ɔ ha dea hio ngatom, ɔ kpa wal mɛ ɔ la na, nɛ yɔngamɔ ha kɔpa ɔ.

⁶ Ma, sila ɔ nɛ saa, ɔ ingɔ tɛwen pɛ Sɔ, ɔ ha baa sila nɛ kɔ, ɔ ha dea ngay, sila ɔ dona nɛ *Nzɔy-Sɔtɛ, ɔ ha ngoya hio wi nɛ sila ndang,

⁷ nɛ ɔ ha bulo tɛwen nɛ wal ngatɛ pɛ Sɔ. Dea mɔ nzeng dung tuka mɔ-bibulo ha kɔ ɔ hazu sungiri nɛ hio kɔmbɛ, nɛ hazu pam nɛ tɛ ɔ fin.

⁸ Hio ma wi ha baa ɔ nɛ zioa, nɛ hio ma ha pio foy ha li ɔ. Hio ma wi ha tɔa dede lingtɛ ɔ, nɛ hio ma ha tɔa gdanga lingtɛ ɔ. Hio ma wi ha zɔka ɔ tuka wan-tɔ dalo, ma, ɔ nê hio wan-tɔ tɛwen.

⁹ Hio wi ha zɔka ɔ tuka wi ka mbwa ing na, ma, mbwa ingɔ ɔ nɛdedea. Hio wi ha zɔka ɔ tuka wi ka dung sanga nɛ fio, ma, ɔ bhɔna nɛ zutunɔ. Hio wi ha ndulso ɔ, ma, mbwa gbɛ ɔ na.

¹⁰ Hio wi ha haa ngɔtɛ ha ɔ, ma, ɔ ha dea totɛ swe fɛt. Ɔ dung tuka fabha wi, ma, ɔ ha yɛbhasa kpaamɔ pɛ hio dɔka wi. Ɔ dung tuka wi ka bo nɛ mɔ na, ma, ɔ kpaa mɔ fɛt kari.

¹¹ Ɛnɛ, hio wi mɛ Korente, ɔ tɔa mɔ fɛt long ha ɛnɛ. Ɔ gbosasa sila ɔ ha ɛnɛ.

¹² Pɛ ɔ, ɔ tɛ gdɔki sila ɔ ha ɛnɛ na, ma, ɛnɛ gdɔka sila ɛnɛ ha ɔ.

¹³ Mɛgi, mi wolmɔ ha ɛnɛ tuka ha hio bem pɔm nde, ɛnɛ agbosisi sila ɛnɛ ha ɔ, tuka ka ɔ gbosasa nɛ sila ɔ ha ɛnɛ kari.

Ɔ ade sɔy hinɛ hio * wan-kafi Sɔ na

¹⁴ Ka ɛnɛ adung ha ndanga litom ndang hinɛ hio wan-kafi Sɔ na. Nzengmɔ hinɛ gdangamɔ lɛma de sɔy hinɛ may mɛng? Saamɔ hinɛ tutum lɛma dung ha ndanga bhandi ndang mɛng?

¹⁵ Christ hinɛ *Satan lɛma dung nɛ ndanga sila ndang mɛng? Wan-mɛkiri Sɔ lɛma de sɔy hinɛ wan-kafi Sɔ mɛng?

¹⁶ Hio gbele sɔ lɛma kpa bhandi ha *gasa twa Sɔ mɛng? Kpasawen, ɔ nê twa pɛ tunɔ Sɔ, gbesi tuka wɛnɛ tɔa: «Mi bede le ha soko mbwa, nɛ mi beyal ha soko mbwa. Mi bedung nê Sɔ pɛ mbwa, nɛ mbwa bedung nê kandɔ pɔm.»

¹⁷ *Kongawan tɔa fin: «Ɛnɛ akɛtini soko hinɛ hio wi ndɔng, ɛnɛ adung nɛtɛ. Ka ɛnɛ andɔ ma mɔ nzing ndang na, nɛ mi beba ɛnɛ nɛ dede kɔ.

¹⁸ Mi bedung nê bafa ɛnɛ, nɛ ɛnɛ bedung nê hio bem pɔm. Yo nê Kongawan, wan-zu mɔ fɛt, ha tɔ wen mɛgi.»