2 Korente 5 - Takarata pɛ Sɔ Mbombe Mbon

¹ Hakɛ ha zu nu tɛ ɔ dung tuka gbamsa ka beyangili. Kpasawen, ɔ ingɔ nde, ha ngɔn Sɔ beha ɔ ma mbing twa ka tɛ nɛ wal wi na, ma, ka bebhɔn kpoo nɛ kpoo.

² Sising ɔ ha gɔfa hazu ɔ nɛ hɛl mɛ le ha zang mbombe twa mɔ ngɔn.

³ Ka bo nde, ɔ lɛm le ha zang mbombe twa ɛngɛ na, ki ɔ bedung nɛ sɔngɛrɛ hapata fio.

⁴ Ha ngimɔ fɛt ka ɔ ha zang gbamsa, ɔ ha gɔfa hazu yo ha yimtɛ nɛ yeksamɔ ha ɔ pentɛ. Yo bo nde, ɔ ngoya gbo ha zang gbamsa ɛngɛ na, ma, ɔ ngoya le ha zang mbombe twa mɔ ngɔn, tuka nde, mɔ ka befe akifiri ha mɔ ka bebhɔn nɛ zutunɔ.

⁵ Sɔ haa *Nzɔy-Sɔtɛ ha ɔ hazu osi long nde, yo nê wɛnɛ nɛ pɛa tɛ ka bhɔngara mɔ mɛgi hazu ɔ kari.

⁶ Ɔ ingɔ nde, ha bhɔna nɛ tɛ ɛngɛ, ɔ bhɔna ka nɛ yɛa nɛ *Kongawan. Ma, ngase ɛngi, sila ɔ dona nɛ da ngimɔ fɛt.

⁷ Ey, ɔ ha dea mɔ fɛt nɛ wal mɛkaramɔ, ɔ tɛ hɔ ka ha ngimɔ zɔka mɔ na.

⁸ Sila ɔ dona nɛ da, nɛ ɔ nɛ hɛl mɛ lak tɛ ɛngɛ gde, hazu nɛ nɛ dung hapɛtɛ Kongawan.

⁹ Ma, ngase ka ɔ bhɔna ka nɛ tɛ ɛngɛ, ngase ka ɔ laka yo gde, ɔ ngoya sɔna nde, ɔ ade nɛ mɔ ka ha totɛ ha wɛnɛ.

¹⁰ Hazu, lɛma nde, ɔ hinɛ ɛnɛ fɛt ahɔ ha li Christ tuka nde, wɛnɛ agɔn kita ha zu ɔ. A bekɛ ɔ ndang ndang fɛt lɛm nɛ dedemɔ mana nɛ gdangamɔ ka ɔ dea ha ngimɔ ka ɔ dungɔ nɛ tɛ ɛngɛ.

Sɔ bhɔngara mɔ ha soko wa hinɛ ɔ nɛ wal Christ

¹¹ Ɔ ingɔ wal mɛ yu ke *Kongawan. Yo nê ɛngi ka ɔ ki wal mɛ de mɔ fɛt tuka nde, hio wi amɛkiri wɛnɛ. Sɔ ingɔ ɔ nɛdedea, nɛ ɔ gdea tazu ɔ ha tɛ ɛnɛ nde, ha zang sila ɛnɛ, ɛnɛ ingɔ ɔ nɛdedea fin.

¹² Ɔ tɔ fin dede lingtɛ ɔ ha ɛnɛ nɛ pɛ ɔ tɛ na. Ma, ɔ ngoya sɔna mɛ ha ɛnɛ wal mɛ sutɛ hazu ɔ. Mɛgi, ɛnɛ lɛma gdɔki nu wi ndɔng ka sutɛ hazu mɔ pɛ mbwa ka gbo long, ha bhandi mɔ ka dung ha zang sila mbwa.

¹³ Ka hio ma wi tɔ nde, ɔ bo nɛ zu fin na, yo nê hazu Sɔ. Ma, ka ɔ nɛ dede zu, yo nê hazu gbakiri nɛ ɛnɛ.

¹⁴ Ngoy ka Christ ngoya nɛ ɔ, ha ngbɔsa ɔ ha deamɔ pɛ ɔ fɛt. Ɔ ingɔ nɛdedea nde, ma wi ndang, yo nde Christ, fea gɔn zu wi fɛt. Ɛngi osi nde, wi fɛt fea.

¹⁵ A fea gɔn zu wi fɛt tuka nde, hio wi ka kpaa mbombe tunɔ, ade fin mɔ hazu mbwa nɛ pɛ mbwa tɛ na, ma, hazu wɛnɛ, ka fea gɔn zu mbwa, nɛ ka guotɛ ha soko hio fiowi.

¹⁶ Hazu ɛngi, ɔ lɛm ing fin wi nɛ wal ndɔkitɛ mɔ nzan na. Sɔngsi, ɔ ingɔ Christ mɛgi, ma, sising, ɔ ing wɛnɛ mɛgi fin na.

¹⁷ Mɛgi, wi ka de sɔy hinɛ Christ, tɛ bo nê mbombe wi. Mɔa mɔ pena, nɛ mbombe mɔ hɔa kari.

¹⁸ Mɔ ndɔng fɛt tɛa nɛ wal Sɔ, ka bhɔngara mɔ ha soko wa hinɛ ɔ nɛ wal Christ. Sɔ gdea ɔ ha tom mɛ yɛbhisi dɔka hio wi ka wɛnɛ bhɔngara mɔ hinɛ mbwa.

¹⁹ Kpasawen, Sɔ bhɔngara mɔ ha soko wa hinɛ hio wi mɔ nzan nɛ wal Christ. A tɔl gdangamɔ pɛ mbwa na. Nɛ wɛnɛ tomsa ɔ mɛ bul wen bhɔngaramɔ ɛngɛ.

²⁰ Hazu ɛngi, ɔ tɔ wen ha olo nu Christ. Sɔ nɛ pɛa tɛ mbo ɛnɛ nɛ wal wen nu ɔ. Mɛgi, nɛ ling Christ, ɔ ba nanga ɛnɛ nde, ɛnɛ agde Sɔ abhɔngiri mɔ ha soko wa hinɛ ɛnɛ.

²¹ Christ tɛ de ma gdangamɔ ndang na. Ma, ngase ɛngi, Sɔ kuo gdangamɔ pɛ ɔ gde ha zu Christ tuka nde, ɔ adung nzeng ha li wa nɛ wal wɛnɛ.