2 Korente 11 - Takarata pɛ Sɔ Mbombe Mbon

Paul hinɛ hio gdanga * wan-nɛtom

¹ Ɛnɛ aba sila ɛnɛ nɛ mi ka mi wolmɔ tikiring tuka wan-bili. Ey, ɛnɛ aba sila ɛnɛ nɛ mi wa!

² Mi ha dea gula tɛ ɛnɛ, nɛ gula ɛngɛ tɛ nɛ wal Sɔ. Hazu ɛnɛ dung tuka bhinzi bhoko ka mi gɔna nu mɛ ha ha ma wei ndang, ka dung nê Christ.

³ Mɛgi, mi ha yuo ke nde, hio ma wi betɛ gdangsi takaramɔ pɛ ɛnɛ nde, ka ɛnɛ alak mɛkara Christ nɛ saa sila nɛ mɛndi gde, gbesi tuka ka gɔk osala nɛ Eve nɛ wal likisi pɛa.

⁴ Hazu, ɛnɛ ha baa sila ɛnɛ nɛ hio wi ka tɛ tɛ bul wen pɛ ma Jésus nɛtɛ, ka ɔ tɛ bul wen pɛa na. Ɛnɛ mɛkara mɛ kpa ma sɔtɛ ka dung nɛtɛ nɛ *Nzɔy-Sɔtɛ ka ɛnɛ kpaa kari. Ɛnɛ mɛkara mɛ ze ma dede wen nɛtɛ, ka ɛnɛ tɛ ze ha nu ɔ na.

⁵ Mi ingɔ nɛdedea nde, hio gasa wan-nɛtom pɛ ɛnɛ tɛ pen mi ha ma mɔ ndang na.

⁶ Ngase ka mi nê gele wi ha wal tɔa wen, nɛ wal mbaramɔ mi bo nê gele wi ndang na. Ɔ gbasa yo ha ɛnɛ long ngimɔ fɛt nɛ tili wal nɛtɛ-nɛtɛ.

⁷ Ɛnɛ tɛ kpe mi ha bulo *Dede Wen pɛ Sɔ ha ɛnɛ na. Ɛngi osi nde, mi hilo nɛ mɛndi hazu gu ɛnɛ gde ha ngɔn. Mi ani ɛnɛ nde, mana nɛ wal dea mɛgi mi dea gdangamɔ nde?

⁸ Hio ma *giliwi mɔ eglize kpea mi, nɛ mi kuo mbɔlia de nɛ tom ha ɛnɛ.

⁹ Ka mi dungɔ ha pɛ ɛnɛ, mi tɛ dung nê zio toy ha zu ma wi ndang na, ngase ka mɔ kɔpa mi. Yo nê hio ya ha Christ mɔ Masedoane ka tɛa tɛ gbakiri mi nɛ mɔ ka kɔpa mi. Ha mɔ fɛt, mi pama tɛ mi tuka nde, mi adung nê zio toy ha zu ɛnɛ na. Nɛ mi bepam tɛ mi mɛgi swe fɛt.

¹⁰ Ha kandɔnu Akai fɛt, ma wi ndang lɛm dolsi mi mɛ sutɛ hazua na. Mi tɔ mɛgi nɛ wal tɛwen pɛ Christ ka dung ha tɛ mi.

¹¹ Hazu ge, mi tɔ mɛgi ge nde? Mana hazu mi ngoy ɛnɛ na? Way! Sɔ ingɔ nde, mi ngoya ɛnɛ gdang.

¹² Mi bebhɔn ha dea tom nɛ ndangtɛ wal ka mi ha dea nɛ sising. Mɛgi mi bedolsi hio wi ndɔng ka ki wal mɛ sutɛ nde, wal dea tom pɛ mbwa gbesi tuka pɛ ɔ.

¹³ Kpal hio wi ndɔng nê hio gdanga wan-nɛtom. Mbwa nê hio yambalazu wan-tom, ka osili wi nde, mbwa nê hio wan-nɛtom pɛ Christ.

¹⁴ Wi ndang lɛm yaksi hazua na, hazu *Satan nɛ pɛa tɛ lɛma osili hio wi nde, wɛnɛ nê *telenge pɛ saamɔ.

¹⁵ Mɛgi, ka hio wan-tom pɛ Satan osili hio wi nde, mbwa nê hio wan-tom ka de tom pɛ mbwa nzeng, ɛ lɛm yaksi ha yo na. Ma, ha kpogio ngimɔ, Sɔ bendulsi mbwa lɛm nɛ deamɔ pɛ mbwa.

Hio yeksamɔ nɛtɛ-nɛtɛ ka kpaa Paul

¹⁶ Mi tɔ fin ze ndang nde, ka ɛnɛ azɔk mi tuka wan-bili na. Ma, ka ɛnɛ zɔk mi tuka wan-bili, lɛma nde, ɛnɛ aba mi tuka ɛnɛ ba hio olo wan-bili fɛt, nɛ ɛnɛ aha wal ha mi mɛ lukisi tɛ mi tikiring.

¹⁷ Kpasawen, mɔ ka mi betɔ sising, yo tɛ nɛ wal *Kongawan na. Mi betɔ yo tuka wan-bili. Mi ingɔ nɛdedea nde, mi nɛ mɔ ka mi lɛma lukisi tɛ mi hazua.

¹⁸ Dɔka wi ha lukoso tɛ hazu tom ka mbwa lɛmsara nɛ pɛ mbwa tɛ. Mɛgi, mi fin, mi belukisi tɛ.

¹⁹ Ɛnɛ ha zɔka tɛ ɛnɛ tuka wan-ingmɔ, ma, ɛnɛ nɛ sanga mɛ ba sila ɛnɛ nɛ hio wan-bili.

²⁰ Kpasawen, ɛnɛ ha baa sila ɛnɛ ka mbwa ba ɛnɛ tuka bala, ka mbwa yɔng ɛnɛ, ka mbwa ba mɔ pɛ ɛnɛ nɛ nga mbanzi, ka mbwa bhɛsiri ɛnɛ, nɛ ka mbwa mɛl li ɛnɛ.

²¹ Mi nɛ foy mɛ tɔ yo nde, ɔ tɛ de mɔ nɛ ngasila tuka mbwa na, ma, ɔ dea mɔ nɛ mɔka sila. Mi bewol fin mɔ tuka wan-bili ndɔng. Mbwa nɛ da mɛ lukisi tɛ, ma, mi fin, mi nɛ da mɛ lukisi tɛ gbesi.

²² Mbwa nê kandɔ *Hebro nde? Mi fin fɛt. Mbwa nê bem pɛ *Israel nde? Mi fin fɛt. Mbwa nê bezang pɛ Abraham nde? Mi fin fɛt.

²³ Mbwa nê wan-tom pɛ Christ nde? Mi nê yo pen mbwa! Mi wol mɔ tuka wan-bili na nde? Mi dea tom pen mbwa, mi dungɔ ha twa zɔbhɔ pen mbwa, ɛ mɛla mi pen mbwa, nɛ mi kpɔya ha fio ze nɛdɔka pen mbwa.

²⁴ Ze mɔrkɔ, hio nasara *zuife zuro mi nɛ zambala ze bhukɔa tar zanga mɔrkɔ gbala nar.

²⁵ Ze tar, hio nasara mɔ Rome zuro mi nɛ zambala. Ze ndang, hio wi loa mi nɛ ta hazu gbɛ mi gbɛ. Ze tar, mi gɔya ha li nɛ kuga, nɛ ma ngimɔ, mi ɔa ha zang li swe ndang nɛ zɛ ndang.

²⁶ Ha hio dɔka yali pɔm, mi kpaa yeksamɔ ha mbeng li, mi kpɔya ha fio ha kɔ hio nagbɛwi, mi kpaa ngamɔ ha kɔ hio zuife, kandɔ pɔm, nɛ ha kɔ hio olo kandɔ, mi kpaa yeksamɔ ha hio gasa le, ha kpɛnu, ha li nana-litɔng, nɛ ha kɔ wi ndɔng ka tɔ nde, mbwa nê hio ya mi.

²⁷ Tɛ mi kata fɛt hazu ngatom pena tɛ mi. Ngimɔ nɛdɔka, mi tɛ kpa wal mɛ ɔ la na. Ngimɔ nɛdɔka mi fea wɔ, li nɛ yɔngamɔ kɔpa mi. Nɛ ngimɔ nɛdɔka la kɔpa mi, nɛ mi fea gangmɔ.

²⁸ Mi lɛm tɔ wen hio olo yeksamɔ pɔm na. Ma, ma gasa mɔ ndang ang fin, yo nde, swe fɛt mi nɛ nɔzang hazu hio giliwi mɔ hio eglize fɛt.

²⁹ Ka ma wi nɛ mɔkaa, mi fin dung tuka mɔka wi. Ka ma wi dak ma wa pi ha dea gdangamɔ, sila mi ha yimɔa pentɛ.

³⁰ Ka mi lɛma mɛ lukisi tɛ mi, mi belukisi tɛ hazu mɔ fɛt ka osi nde, mi nê mɔka wi.

³¹ Sɔ, Bafa mɛ Kongawan Jésus, ka lukosomɔ nê pɛa kpoo nɛ kpoo, wɛnɛ ingɔ nde, mi tɔ dalo na.

³² Ha ngimɔ ka mi dungɔ ha gasa le Damas, gɔfɔrma pɛ *kongapora Aretas gdea hio wan-bibulo ha nu kin lea hazu ba mi.

³³ Ma, hio ma wi haki gdea mi ha zang gasa gɛsɛ. Mbwa kpoa pɛl ha nua, nɛ mbwa zilso yo ha ma tolo mɔ kin gde ha gdonga. Nɛ wal ɛngi, mi kpasa ha kɔ gɔfɔrma.