2 Jean 1 - Takarata pɛ Sɔ Mbombe Mbon

Fanamɔ

¹ Mi, kotowi mɔ eglize, mi ngɛriki takarata ɛngɛ ha mɛ, Kongabhoko ka Sɔ weka, nɛ ha hio bem pɛ mɛ, ka mi ngoya nɛ tɛwen. Yo bo sɔna nê mi gbatɛ ha ngoy ɛnɛ na, ma, yo nê hio wi fɛt ka ingɔ tɛwen.

² Hazu tɛwen ang ha tɛ ɔ, nɛ yo bebhɔn ang kpoo.

³ Sɔ, Bafa ɔ, hinɛ Jésus-Christ, Bewei pɛa, bede *dede sila ha tɛ ɔ. Mbwa bede kobhe tɛ ɔ, nɛ mbwa beha ɔ gaamɔ. Mbwa bede mɛgi tuka nde, tɛwen nɛ ngoy adung ha tɛ ɔ.

Wen hazu tɛwen nɛ ngoy

⁴ Mi dea totɛ pentɛ ka mi zea nde, hio ma bem pɛ mɛ ha deamɔ lɛm nɛ tɛwen, gbesi tuka Sɔ, Bafa ɔ, haa ɔ *mbonga mɛ de.

⁵ Mɛgi, sising mi ha nu ha mɛ, Kongabhoko, nde, ɔ angoy may. Wen ɛngɛ ka mi ngɛriki ha mɛ, yo bo nê ma mbombe mbonga na. Yo nê mbonga ɛngɛ ka ɔ baze nisi ha angara.

⁶ Wi ka de mɔ lɛm nɛ hio mbonga pɛ Sɔ, yo nê wɛnɛ ka ngoy Sɔ nɛ hio wi. Nɛ ɛnɛ baze mbonga ɛngɛ nisi ha angara nde, ɛnɛ ade mɔ lɛm nɛ ngoy ɛngɛ.

Wen hazu wan-sungiri Christ

⁷ Dɔka hio wan-osili wi dama nzan fɛt. Mbwa tɛ mɛkiri nde, Jésus-Christ yola tɛ wi na. Tili wi mɛgi nê wan-osili wi, nɛ fin wan-sungiri Christ.

⁸ Ɛnɛ pangay nɛ tɛ ɛnɛ tuka nde, ɛnɛ ayɔsisi waya tom pɛ ɔ na, ma, ɛnɛ akpa mɔ-kɛ ɛnɛ fɛt hɛrr.

⁹ Wi fɛt ka pam osamɔ pɛ Christ na, mana ka gde ma mɔ nɛtɛ ha zua, tili wi mɛgi bo ha dea sɔy hinɛ Sɔ na. Ma, wi ka pam osamɔ pɛ Christ, tili wi mɛgi ha dea sɔy hinɛ Sɔ, Bafa, nɛ hinɛ Bewei pɛa.

¹⁰ Ka ma wi ka osi ma mɔ nɛtɛ, tɛa ha pɛ ɛnɛ, ka ɛnɛ aba wɛnɛ nɛ dede kɔ ha twa pɛ ɛnɛ na, nɛ ka ɛnɛ afan wɛnɛ na.

¹¹ Hazu, wi ka fan wɛnɛ, ha dea sɔy hinɛ wɛnɛ ha zang gdanga deamɔ pɛa.

¹² Mi nɛ mɔ nɛdɔka mɛ tɔ ha ɛnɛ. Ma, mi ngoy ngɛriki yo fɛt ha zang takarata na, hazu mi ngoy mɛ nɛ ha pɛ ɛnɛ ka ɔ awolmɔ ha li may, nɛ ka totɛ pɛ ɔ alɛm wɛɛ.

¹³ Hio bem pɛ ya mɛ mɔ bhoko ka Sɔ weka, fana mɛ.