1 Korente 9 - Takarata pɛ Sɔ Mbombe Mbon

Paul osa wal tom ka wɛnɛ dea

¹ Bo nê mi dung sɛɛ hazu de mɔ ka sila mi ngoya, na nde? Bo nê mi nê *wan-nɛtom, na nde? Bo nê mi zɔka Jésus, *Kongawan pɛ ɔ, na nde? Bo nê mɛkaramɔ pɛ ɛnɛ nê waya tom ka mi de ha Kongawan, na nde?

² Hio ma wi zɔk mi tuka wan-nɛtom pɛ Kongawan na, ma, ngase ɛngi, ɛnɛ ingɔ nɛkpasa nde, mi nê wan-nɛtom. Hazu, ɛnɛ tɛ bo ha dea sɔy hinɛ Kongawan nɛ wal tom pɔm. Ɛngi gbasi long nde, mi nê kpasa wan-nɛtom pɛa.

³ Mɛgi, wen ka mi betɔ hazu gdɔki nɛ nu hio wan-tɔ gdanga lingtɛ mi, yo nê ɛngɛ:

⁴ Bo nê mi lɛma mɛ yɔng mɔ nɛ nɔ mɔ ha kɔ ɛnɛ hazu tom ka mi dea, na nde?

⁵ Bo nê mi lɛma mɛ si ma bhoko, nɛ yal hinɛ wɛnɛ gbesi tuka hio olo wan-nɛtom, hio bebe ya mɛ Kongawan, nɛ Pierre ha dea, na nde?

⁶ Mi hinɛ Barnabas ha dea tom nɛ kɔ ɔ hazu gbakiri nɛ tɛ ɔ. Yo sɔna nê ɔ ka mɔ nɔsisi mɛ de mɛgi nde?

⁷ Wi ka nɛ ha bio bulo, a beyɔng mɔ nɛ mbɔli ngobho pɛa, mɛng? Wi ka gɔm fɔ, a beyɔng wayaa, na nde? Nɛ wi ka day namdalɛ, a benɔ li belea, na nde?

⁸ Mi tɔa wen ɛngi bo sɔna nɛ wal ndɔki deamɔ pɛ wi na, ma, *mbonga pɛ Moïse tɔ fin gbesi.

⁹ Hazu Moïse ngɛraka ha zang mbonga pɛa: «Nday ka um zik kpalmɔ hazu gbosisi gbalaa, ka mɛ ahɛl nu wa na.» Sɔ tɔa wen ɛngi hazu hio nday sɔna nde?

¹⁰ Mana Sɔ tɔa yo hazu ɔ, nde? Kpasawen, a ngɛraka yo hazu ɔ. Lɛma nde, wan-gɔm fɔ hinɛ wan-pɛfi kpalmɔ akpa ma nu yɔngamɔ ka mbwa dea toma.

¹¹ Ɔ bulo wen Sɔ ha ɛnɛ gbesi tuka ka hio wi gun nɛ kpalmɔ. Mɛgi, ka ɔ kpa ma mɔ ha kɔ ɛnɛ, ɛngi bo nɛ wala na nde?

¹² Ka hio mbing wi lɛma mɛ kpa mɔ ha kɔ ɛnɛ, bo nê ɔ lɛma mɛ kpa yo pen mbwa, na nde? Ma, ɔ tɛ ani ma mɔ ha kɔ ɛnɛ na. Ɔ ha yɔnga yini ha zang hio yeksamɔ fɛt yu nde, ɔ betɛ de ma mɔ ka gdɔki wal ha *Dede Wen pɛ Christ.

¹³ Hio wi ndɔng ka de tom ha zang *gasa twa Sɔ, mbwa kpa yɔngamɔ ha mɔ-kɔ ka hio wi ha haki. Nɛ hio wi ndɔng ka de tom ha bhandi ha sadaka, mbwa kpa fin ma bhalkɔ sadaka mɛ yɔng. Ɛnɛ ingɔ yo, na nde?

¹⁴ Yo fin gbesi nê hio wan-bul Dede Wen. Kongawan haa nu nde, hio wi ka ze Dede Wen, mbwa aha yɔngamɔ ha hio wan-bul yo.

¹⁵ Ma, pɔm, ngase ka mi lɛma mɛ kpa mɔ ha kɔ ɛnɛ, mi tɛ ani yo ndang na. Nɛ mi ngɛriki takarata ɛngɛ hazu ani nɛ mɔ ha kɔ ɛnɛ na. Hazu, ka mi fea, ɛngɛ nɛ dedea pen nde, hio wi agdangsi dede lingtɛ mi ka mi sutɛ ang.

¹⁶ Tom bulo Dede Wen ka mi ha dea, mi lɛm mɛ sutɛ ang na, hazu yo nê Sɔ ka nɔsisi mi mɛ de tom ɛngɛ. Oee, ngɔtɛ ha mi ka mi bul Dede Wen na.

¹⁷ Ka bo se nde, mi nɛ pɔm tɛ aweki mɛ de tom ɛngɛ, ki mi lɛma mɛ kpa mɔ-kɛ mi. Ma, yo bo nê mi ha weki mɛ de toma na. Mi de kanɛ tom ka Sɔ gdea ha kɔ mi.

¹⁸ Mɛgi, mɔ-kɛ mi nê nge tɛ mɔ ge? Mɔ-kɛ mi, yo nde, mi bul Dede Wen ha hio wi nɛgbelea, nɛ mi ani mɔ ha kɔ hio wi ka ze Dede Wen ɛngɛ na, ngase toma ha wal mɛ de mɛgi.

Paul kio wal nde, dɔka wi amɛkiri Christ

¹⁹ Mi dung sɛɛ, mi bo nê bala pɛ ma wi na. Ma, mi gdea tɛ mi tuka bala pɛ hio wi fɛt hazu de nde, hio wi nɛdɔka nɛnɛ amɛkiri Christ.

²⁰ Ka mi dung ha soko hio *zuife, deamɔ pɔm tuka pɛ hio zuife hazu nde, mbwa amɛkiri Christ. Mi dung fin ha si *mbonga pɛ Moïse na. Ma, ka mi dung ha soko wi ndɔng ka dung ha si mbonga, deamɔ pɔm ka fin tuka pɛ mbwa hazu nde, mbwa amɛkiri Christ.

²¹ Nɛ ka mi dung ha soko wi ndɔng ka ing mbonga pɛ Moïse na, deamɔ pɔm ka fin tuka pɛ mbwa hazu nde, mbwa amɛkiri Christ. Ka mi de mɛgi, mi tukili mbonga pɛ Sɔ na, hazu mi dung ha si mbonga pɛ Christ.

²² Nɛ ka mi dung ha soko hio mɔka wi ha wal mɔ Sɔ, deamɔ pɔm ka fin tuka pɛ mbwa hazu nde, mbwa amɛkiri Christ. Ha soko hio wi fɛt, mi tɛ bo tuka mbwa ndang ndang fɛt nde, ka mi akpasisi hio ma ha soko mbwa.

²³ Mi ha dea mɔ fɛt mɛ yɛbhisi *Dede Wen tuka nde, mi akpa dedemɔ ndɔng ka tɛ nɛ wal Dede Wen.

²⁴ Ɛnɛ ingɔ nde, yo nê dɔka wi ha sɔwi ha kpakpay. Ma, wan-gan kpakpay ka kpa kɛamɔ, wɛnɛ nê ndang sɔna. Mɛgi, ɛnɛ ngasisi tɛ ɛnɛ tuka nde, ɛnɛ akpa kɛamɔ.

²⁵ Hio wi fɛt ka de kpakpay, mbwa de mɔ fɛt hazu bhɔngiri tɛ mbwa nɛdedea tuka nde, mbwa agan ha dea kpakpay. Mbwa de yo hazu kpa kɛamɔ ka begdang nɛhasa. Ma, pɛ ɔ, ɔ de yo hazu kpa kɛamɔ ka bebhɔn kpoo.

²⁶ Yo nê ɛngi ka mi sɔ pɔm wi nɛtum na. Mi dung fin tuka wan-sɔm wi ka kɔpi na.

²⁷ Hazu ɛngi, mi bhɔngiri tɛ mi nɛngaya, nɛ mi gan zu tɛ mi nɛkpasa, yu nde, hapata bulo Dede Wen ha hio wi, Sɔ betɛ il mi yunɛ.