1 Korente 13 - Takarata pɛ Sɔ Mbombe Mbon

Ngoy pena olo mɔ fɛt

¹ Ka mi wol mɔ nɛ nu pɛ hio wi nɛ pɛ hio *telenge, ma, ka mi ngoy hio wi na, gɛl mi tɛ bo nê kenge keng-keng, mana bio ngbum-ngbum.

² Ka Sɔ ha mi ngatɛ mɛ tɔ nɛ kuliwen pɛa, ka mi ing goto mɔ wuso pɛ Sɔ fɛt, ka mi nɛ ingɔmɔ fɛt, ka mi gu ngari gde ha ma bhandi nɛ wal mɛkaramɔ pɔm, ma, ka mi ngoy hio wi na, mi nê gombo mɔ.

³ Ka mi kapini hio mɔ pɔm fɛt ha hio fabha wi, ka mi ha tɛ mi hazu kpa fio ha we, ma, ka mi ngoy hio wi na, mɔ ndɔng fɛt lɛm gbakiri mi ndang na.

⁴ Wi ka ngoy hio wi, wɛnɛ nɛ yikosila, wɛnɛ de ngay ha tɛ mbwa, wɛnɛ de silamɔ na, wɛnɛ lukisi tɛ na, wɛnɛ sutɛ na,

⁵ wɛnɛ de mɔ foy na, wɛnɛ zɔk sɔna nɛ tɛ wa na, wɛnɛ de yimsila na, nɛ wɛnɛ gde wi ha sila wa na.

⁶ Wɛnɛ bo nɛ totɛ hazu kalbho-kalbho deamɔ na, ma, wɛnɛ nɛ totɛ hazu deamɔ ka lɛm nɛ tɛwen.

⁷ Ha zang mɔ fɛt, wɛnɛ ha baa sila nɛ kɔ, wɛnɛ ha mɛkara Sɔ, wɛnɛ ha gdea tazu wa ha tɛ Sɔ, nɛ wɛnɛ ha yɔnga yini.

⁸ Ngoy lɛm kari na. Tɔa kuliwen pɛ Sɔ bekari. Wolamɔ nɛ hio nu pɛ *Nzɔy-Sɔtɛ, yo bepen. Nɛ ingɔmɔ fin beyɛmili.

⁹ Kpasawen, ɔ ing mɔ dam na, nɛ ɔ tɔ kuliwen pɛ Sɔ dam na.

¹⁰ Ma, ha ngimɔ ka mɔ ka dam wɛɛ behɔ, mɔ ka tɛ dam na, beyɛmili.

¹¹ Ha ngimɔ ka mi dungɔ nê bhobem, mi wola mɔ tuka bhobem, mi takara mɔ tuka bhobem, nɛ mi gbaa soko mɔ tuka bhobem. Ma, ka mi tɛ bo nê zɔma wi, mi laka mɔ bhobem gde.

¹² Sising, ɔ zɔk mɔ tuka ha li faya-fuyɛ mɔ-zɔk li. Ma, ha ngimɔ bin, ɔ bezɔk mɔ fɛt ngɛlɛ-ngɛlɛ. Sising, mi ing mɔ dam na. Ma, ha ngimɔ bin, mi being mɔ dam wɛɛ gbesi tuka ka Sɔ ingɔ nɛ mi fɛt.

¹³ Mɛgi, yo nê mɔ tar ka bebhɔn: Mɛkara Sɔ, gdea tazu ha tɛ Sɔ, nɛ ngoy. Ma, ngoy pena oloa bwa fɛt.