1 Korente 11 - Takarata pɛ Sɔ Mbombe Mbon

¹ Ɛnɛ zɔk deamɔ pɔm de nɛ pɛ ɛnɛ, tuka mi ha zɔka deamɔ pɛ Christ de nɛ pɔm.

Dungɔ pɛ wei nɛ bhoko ha li Sɔ

² Mi ha lukoso ɛnɛ hazu tazu ɛnɛ ha gbaa nɛ mi ngimɔ fɛt, nɛ ɛnɛ ha pama hio wen pɔm fɛt gbesi tuka ka mi osa nɛ ha ɛnɛ.

³ Ma, mi ngoya nde, ɛnɛ aing nde, Christ nê wan hazu wei fɛt, wei nê wan hazu ko pɛa, nɛ Sɔ nê wan hazu Christ.

⁴ Wei ka gɔ Sɔ mana ka tɔ kuliwen pɛ Sɔ, nɛ ka gok zu wa, wɛnɛ pio foy ha li Christ ka dung nê wan hazu wa.

⁵ Ma, bhoko ka gɔ Sɔ mana ka tɔ kuliwen pɛ Sɔ, nɛ ka gok zu wa na, wɛnɛ pio foy ha li wei, hazu ɛngi dung tuka a kpea zu wa kpe.

⁶ Ka ma bhoko ngoy gok zu wa na, lɛma nde, wɛnɛ agɔn bumɔzu wa. Ma, tuka yo nê mɔ foy hazu bhoko mɛ gɔn mana mɛ kpe bumɔzu wa, lɛma nde, wɛnɛ agok zu wa.

⁷ Ka wei agok zu wa na, hazu Sɔ dea wɛnɛ ba nɛ zizi tɛ wa, nɛ wɛnɛ nê yolo *lɛkɛ-lɛkɛmɔ pɛ Sɔ. Ma, bhoko nê yolo lɛkɛ-lɛkɛmɔ pɛ wei.

⁸ Hazu Sɔ tɛ ku ma gbakɔtɛ bhoko de nɛ wei na. Ma, a kuo ma gbakɔtɛ wei de nɛ bhoko.

⁹ Nɛ Sɔ tɛ de wei hazu bhoko na. Ma, a dea bhoko hazu wei.

¹⁰ Hazu ɛngi, nɛ hazu hio *telenge ha zɔk wɛnɛ, bhoko agok zu wa hazu osi nde, wɛnɛ nɛ ziomɔ mɛ gɔ Sɔ.

¹¹ Tangere, ha dea sɔy hinɛ *Kongawan, bhoko lɛm dung gbatɛ lak wei gde na, nɛ wei fin lɛm dung gbatɛ lak bhoko gde na.

¹² Hazu, gbesi tuka bhoko tɛ nɛ gbakɔtɛ wei, wei tɛ nɛ wal bhoko, nɛ mɔ fɛt tɛ nɛ wal Sɔ.

¹³ Ɛnɛ nɛ tɛ ɛnɛ agba soko deamɔ ɛngɛ: Bhoko ka gɔ Sɔ nɛ gbele zu, wɛnɛ dea mɔ nɛ wala nde?

¹⁴ Ndɔkitɛ mɔ fɛt ka Sɔ dea, osi nde, yo nê mɔ foy ka wei dung nɛ bɔya bumɔzu.

¹⁵ Ma, pɛ bhoko, bɔya bumɔzu nê mɔ gaga pɛa. Hazu Sɔ haa wɛnɛ bumɔzu tuka mɔ hɛl zu wa.

¹⁶ Ma, ka ma wi ngoy zang wen hazua, wɛnɛ aing nde, ngase hio giliwi mɔ hio eglize pɛ Sɔ, ngase ɔ fɛt, ɔ bo nɛ ma mbing ndɔkitɛ na.

Ndɔki deamɔ ha tabolo pɛ * Kongawan

¹⁷ Ka mi takiri hazu mɔ ka mi betɔ ha ɛnɛ sising, mi lɛm lukisi ɛnɛ na. Hazu ha wesara may pɛ ɛnɛ, ɛnɛ ha dea gdangamɔ pen dedemɔ.

¹⁸ Sɔngsi mɔ fɛt mi zea wen nde, ha wesara may mɔ eglize pɛ ɛnɛ, kɛtana soko ang. Nɛ mi takara nde, hio ma wena nê tɛ kpasawen.

¹⁹ Ey, lɛma nde, kɛtana soko adung ang ha soko ɛnɛ, hazu yo begbasi hio wi ha soko ɛnɛ ka dung nɛ mboazu ha wal mɔ Sɔ.

²⁰ Pɛ ɛnɛ, ka ɛnɛ wesiri may ha tabolo pɛ Kongawan, yo bo nê yɔngamɔ pɛa ka ɛnɛ yɔng na.

²¹ Hazu, ha ngimɔ yɔngamɔ, wi fɛt ha hasa tɛ mɛ yɔng kanɛ mɔ pɛ mbwa. Mɛgi, hio ma bhɔna pɛ mbwa nɛ wɔ, nɛ hio ma ha fea dɔkɔ.

²² Bo nê ɛnɛ nɛ twa mɛ yɔng nɛ nɔ mɔ ang, na nde? Ɛnɛ ngoy bhɛsiri *giliwi mɔ eglize pɛ Sɔ nde? Hio wi ndɔng ka bo nɛ mɔ na, ɛnɛ ngoy mɛ pi foy ha li mbwa nde? Mi betɔ nɛ nge wen ha ɛnɛ ge? Ɛnɛ takiri pɛ ɛnɛ nde, mi belukisi ɛnɛ? Way, mi lukisi ɛnɛ ndang na.

²³ Kpasawen, osamɔ ka Kongawan baosi ha mi, mi osa yo ha ɛnɛ kari, yo nde: Ha zang zɛ ka ɛ haa kasatɛ wa, Kongawan Jésus baa mampa,

²⁴ a lukoso Sɔ hazua, a gbinɔ yo, nɛ a tɔa: «Ɛngɛ nê tɛ mi ka mi ha hazu ɛnɛ. Ɛnɛ de ɛngɛ mɛ gba tazu ɛnɛ nɛ mi.»

²⁵ Gbesi tuka ɛngi fin, a baa kɔpɔ hapata yɔngamɔ, nɛ a tɔa: «Kɔpɔ ɛngɛ nê mbombe nɔa *mbon ha soko Sɔ hinɛ wi nɛ wal tɔktɛ mi. Ngimɔ fɛt ka ɛnɛ benɔ mɔ mɛgi, ɛnɛ de yo mɛ gba tazu ɛnɛ nɛ mi.»

²⁶ Kpasawen, ngimɔ fɛt ka ɛnɛ yɔng mampa ɛngɛ nɛ nɔ mɔ ha zang kɔpɔ ɛngɛ, ɛnɛ ha tɔa wen fio pɛ Kongawan, kanɛ wɛnɛ kiforo.

²⁷ Hazu ɛngi, wi ka yɔng mampa pɛ Kongawan nɛ nɔ mɔ ha zang kɔpɔ pɛa, nɛ ka ba yo nɛ zioa na, a dea gdangamɔ sungiri nɛ kilitɛ Kongawan nɛ sungiri nɛ tɔktɛ wa.

²⁸ Lɛma nde, wi ndang ndang fɛt aing sila wa nɛ pɛa tɛ ing ki, a tɛ yɔng mampa ɛngɛ nɛ nɔ mɔ ha zang kɔpɔ ɛngɛ.

²⁹ Hazu, wi ka yɔng mampa ɛngɛ nɛ nɔ mɔ ha zang kɔpɔ ɛngɛ, ma, a zɔk yo tuka kilitɛ Kongawan na, wɛnɛ daka kita pɛ Sɔ pi ha zu wa nɛ wal yɔnga mɔ nɛ nɔa mɔ.

³⁰ Yo nê hazu ɛngi, ka dɔka wi ha soko ɛnɛ nɛ zɛlɛ nɛ mɔka tɛ, nɛ ka hio ma mbinga fea.

³¹ Ka ɔ ing sila ɔ sɔngsi, Kongawan lɛm gɔn kita ha zu ɔ mɛgi na.

³² Ma, Kongawan gɔn kita ha zu ɔ, nɛ a ndulsi ɔ yu nde, a betɛ gɔn kita ba nɛ ɔ gbesi hinɛ hio wi mɔ nzan.

³³ Mɛgi, hio ya mi, ka ɛnɛ wesiri may ha tabolo pɛ Kongawan, ɛnɛ akeri may sɔngsi yɔnga mɔ.

³⁴ Nɛ ka ma wi nɛ wɔ, wɛnɛ ayɔng mɔ ha twa pɛa yu nde, ha wesara may pɛ ɛnɛ, ɛnɛ betɛ dak kita pɛ Sɔ pi ha zu ɛnɛ. Ka mi hɔa ha soko ɛnɛ kari, mi bebhɔngiri hio olo wen.