Titus 3 - MKPAMAṄ AMVOE Nouveau Testament en langue Ewondo 2012

Obòò hë mimbëmbë mi mam

¹ Dugan bò tsog na bëbò mintomba ai bidzoe mëwog, bëwog bò, bëtòbò a ngomëzan asu abëṅ dzam asë,

² të bamgbali mod ziṅ, të badzëṅ bitòm, bëbò evovoe, bëlëdëgë bod bësë afu-nnëm daban;

³ Amu bia bëben fë bingabë mëkud, mëlò, bitoa a ndimi, bisye miṅyian mian ai kan ngoṅ esë, binyiṅi a abe, a mëkomëṅa, bibòò mam më ziṅ, bisiṅan fë bia bia.

⁴ Eyòṅ hm bingayen abëṅ-nnëm ai ediṅ Zamba nkode waan adiṅ bod,

⁵ së ki asu mimboan ya mëkyëbë ya bingabò, dzam da hë asu ngòl dzie, ndò angakode bia ai mëwòbò më abyali bèè, ai ntsendan ya abë Mfufub Nsisim

⁶ ya angasoe bia a nyòl abui abui abë Yesus Kristus nkode waan,

⁷ asu yë na bibëlë mëkyëbë a maa woe, bibò fë bòn bë elig asu afidi enyiṅ kòm.

⁸ Ebug enë bëbëla; Mayi na matoan wa baala e mam ma, na e bod bëngafudi afidi daban abë Zamba bëdzëṅ na bëmvaman ai mimbëmbë mi mam. Mam mëte mënë mbëṅ, mëtoa fë ai mfi asu bod.

⁹ Saala ntsogan akud, ai minlaṅ mëbonde mënda më bod, zuṅa ai bitòm asu mam më mvende; Amu masëki ai mfi ndò fë mënë dzëdzaa.

¹⁰ Osaala e mod atye ṅyëbë mfë, ngë obeme ya nyè eyòṅ dzia ngë bibè,

¹¹ oyëmë na kan mod te enë ndaman, mod minsëm, ndò fë avë emen mëku.

Mëbende ai mësugan

¹² Eyòṅ mayi lom Artemis ngë Tikikus abë wa, ovol ma sòṅ kòb a Nikopolis, amu awe ngò mëyili na mayi tòbò a abog oyon.

¹³ Otoan yaan ai Zenas ya anë man loya, ai Apollos, asu yë na të badzëman ai dzom ziṅ.

¹⁴ Bod baan bëtoan yègè mvaman ai mimbëmbë mi mam, asu mimfaṅ mëyaṅan, asu yë na të batòbò nala të bò esye.

¹⁵ E bod bësë bënë ai ma ha basug wa. Sugu e bod bësë badiṅ bia a ṅyëbë. Maa abò ai mina bësë.