Roma 13 - MKPAMAṄ AMVOE Nouveau Testament en langue Ewondo 2012

Abò bëdzoe mëwog

¹ Mod osë abòò edzoe nen mëwog. Amu edzoe yasò hë abë Zamba, ndò Zamba ṅnyè atele bidzoe bisë.

² Asu te, e mod abò ki edzoe mëwog, aluman ai tëbëga Zamba; e bod bësë babò mëlò nala bayi ku a nkat.

³ Amu e mod asye mbëṅ a mbara ki bëdzoe. E nyò asye abe ṅnyè ambara bëdzoe. Ngë wayi ki na ombara edzoe, bòò mbëṅ, wayi bi mëtamëna ete.

⁴ Amu bëdzoe basye Zamba asu mbëṅ woe. Ngë obò hm e dzam anë abe, mbarëga. Amu abëgë ki nyamëla a zëzë. Amu anë mbò-esye Zamba, abaala ntol woe, olun ontoa asu e mod abò abe.

⁵ Wayean bò mëwog, së ki hë asu olun, dzam da asu sosoo ya nnëm fë.

⁶ Asu te, yaan toya. Amu e bod babò esye nnòṅan toya bënë bësye bë Zamba a ete.

⁷ Yaan ai mod osë ekola dzie, miyaan toya ai e mod anë ai nyè, miyaan ntòlò abë e mod awoge ai nyè; e mod miayean kam, mingakam, e mod miayean lugu, mingalugu.

Ediṅ yadzala mvende

⁸ Të miabi mod ziṅ ekola ziṅ, së na ekola na miadiṅan mina mina. Amu e mod adiṅ e nyò mbòg adzala ya mvende.

⁹ Amu e mëmvende ma: Të wabò bisog, të wawoe, të wadzib, të wayi ezaa dzom, ai e memvende mëvòg, mënë hë a ebug dzia dzi: Odiṅi e mod mbòg anë wamen.

¹⁰ Ediṅ wadiṅ e mod mbòg yabò ki abe. Ediṅ enë nguma mvende osë.

Amos Kristus ongasubu ya babi

¹¹ Kë miatoan hm yëm abog di na awola akui ya bia na bihëbë a oyò, amu akode antoa ya bia babi abui alodo eyòṅ bingasò a ṅyëbë.

¹² Alu angakë ya, amos ongasubu ya. Ndzogan bisye bi dibi, bibòd bikpëlë bi mfyè.

¹³ Wulugan tëtëlë anë biawulu ai amos, tègè ai abui ndian ngë mënyu, tègè ai adzo bibòn ngë ebamba, tègè ai zuṅa ngë mëkomga,

¹⁴ bòdan fò Nti Yesus Kristus; të miandëṅa i ntsogan mam më nyòl ya madzugulu mina miṅyian.