Mt 4 - MKPAMAṄ AMVOE Nouveau Testament en langue Ewondo 2012

Satan abobolo Yesus a nkod-nnam

¹ Ndò hm Nsisim ongakë ai Yesus a nkod-nnam asu yë na Satan abobolo nyè.

² Angatòbò tègè di mëlu mëwom mënyii ai mëmos mëwom mënyii. A mvus hala, ndò hm azu wog zie.

³ Ndò mbobëlo azu dzo ai nyè na: Ngë onë mòn Zamba, dzoo na e ngòg nyi evëṅan bëmbaṅëla.

⁴ Ndò afèd, nyè na: «Anë ntilan na : Mod ayi ki nyiṅ hë ai mbaṅëla etam, anyiṅ ai ebug esë yakui Zamba a anyu.»

⁵ Ndò Satan angakë ai nyè a mfufub tisòn, atëlë nyè a ndil tempel

⁶ nyè ai nyè na: Ngë onë man Zamba, suman a si. Amu anë ntilan na: Ayi vë benglès boe tëbëga asu doe; bayi wa bëgë a mò asu yë na të akol doe lakë tobe a ngòg.

⁷ Yesus nyè ai nyè na: «Anë fë ntilan na: Të wabobolo Nti Zamba woe»

⁸ Satan adugan fë nyè nòṅ, akëlë ai nyè a mod nkol a yob, ndò alëdë nyè bidzoe bisë ya si ai duma ya ete

⁹ nyè ai nyè na: «Mayi wa vë e byem bisë bi, ngë walaban a si, olugu ma.»

¹⁰ Ndò Yesus adzo ai nyè na: «Kodogo ma va, a Satan, amu anë ntilan na: Nti Zamba woe ṅnyè olugu, ṅnyè etam osye.»

¹¹ Ndò Satan angadzoge nyè, benglès bëhama, bëngasye nyè.

Yesus atari esye dzie a Galilea

¹² Awog angawog na bëkab ya Yohannes, ndò akë a Galilea.

¹³ Aligi dzal die Nazaret, ndò azu loṅ mvog a Kafarnao, a ntsag maṅ, a minkol mi Zebulon ai Neftali;

¹⁴ Asu yë na ebug profèt Isaias etoban na:

¹⁵ A si Zebulon ai Neftali, zen maṅ, nnam Yordan ayat, Galilea efulu mëyòṅ.

¹⁶ Ayòṅ lëmbë toa a dibi, lëyen mfyè nen. Eba bëmbë toa a nnam nkut awu, mfyè otole bò a mis.

¹⁷ Atarigi hala, ndò Yesus azu tari na ayedan na: «Tsendëgan enyiṅ amu edzoe ya yob esubu ya babi».

Yesus aloe bëlòb bë kòs bënyii

¹⁸ Akëlë awulu a ntsag maṅ më Galilea, ndò ayen babënyaṅ bëbè, Simun, ya bëloege na Petrus ai Andreas manyaṅ woe, bëwoaga mvunda a maṅ: bëngabë bëlòb bë kòs.

¹⁹ Nyè ai bò na: Zaan miatoṅ ma, mayi bò na mivëṅan bëlòb bë bod.

²⁰ Etye etye te, ndò bëngadzoge mëvòd maban, bëngatoṅ nyè.

²¹ Ndò angakë osu, antala babënyaṅ bëfë bëbè, Yakob, man Zebede ai Yohannes, manyaṅ, bëbëdë a efunga ai esya waban Zebede, bëkomo mvunda dzaban, ndò aloe bò.

²² Etye te, ndò balig efunga dzaban ai esya waban, bëngatoṅ nyè.

Yesus asye mod nkunda bod

²³ Angakë awulu a nkòṅ nnam Galilea osë, ayëgëlë a mënda-bikoan maban, ayëdëgan Mbëmbë Foe edzoe Zamba, alëdëgë akòn asë ai mintye misë a zaṅ bod.

²⁴ Mindum mie miyaman hm fò a nnam Siria osë. Bëngazu ai nyè e ba bësë bëngabë bëlë mintye mi okòn kan esë, ai e ba bëmbë bëlë bëbë bivu, e ba bëkònò a nlo, ai mimbobog, angasye bò.

²⁵ Abui minkunda ya Galilea, ai Dekapolis (Bëtisòn-Awomo), ai Yerusalem, ai Yudea, ai nnam Yordan a yat mingatoṅ nyè.