Mt 20 - MKPAMAṄ AMVOE Nouveau Testament en langue Ewondo 2012

Bëbò bisye ya afub wayn

¹ Amu edzoe ya yob yafulan ai mod dzal ya angakui ai ndib kidi na ayoe bod bëkë nyè sye a afub wayn.

² Ndò angayili ai bëbò bisye taṅ mòni asu amos, alomo bò a afub wayn die.

³ Ndò angakui, dzam bò a awola lala, ayënë bod bëfë bëtëlë a nsëṅ angara, tègè ai e dzom babò.

⁴ Nyè ai bò na: Mina fë kaṅan a afub wayn dama, mayi yaan ai mina mbol wayean.

⁵ Bò fë bëkëë. Ndò angadugan kui, dzam bò a awola samëna, ai awola ebulu, abò fë hë dzam dëda.

⁶ Abog awola awomo ai da, ndò angakui, ayënë bod bëfë bëtëlë, nyè ai bò na: Asu dze mitëlë të bò tò dzom ha nguma amos?

⁷ Bò ai nyè na: Amu tò mod andzëki bia yoe. Nyè ai bò na: Kaṅan a afub wayn.

⁸ A ngoge ekëlë vin, ndò nti afub akad nkala byem woe na: «Loege bod bisye, ovë bò maan, akaègè ai e ba bë mvua, akëlë kui e ba bë osu».

⁹ Bod ya awola awomo ai da bësòò, bënòṅò anë mod nsaṅ woe.

¹⁰ A bod bë osu bëzaa va, bëdzoo na bayi bi alodo nala. Ndë ave, ba bëbii fë hë nsaṅ mbòg.

¹¹ Abog bënòṅò nsaṅ vi, bëwomëṅan ai mod dzal,

¹² bò na: E bod bë mvua ba bësye hë awola da, ndò otele bia ai bò etye dzia, e bia ya bihë dzugi ai esye, binyamiṅi a vian.

¹³ Ndò angayalan mbòg ya abë bò, nyè ai nyè na: A moe, mandzëki wa di maan. Biandzë yili nsaṅ mbòg a?

¹⁴ Nòṅò engoe, okë. Mamen mëyi na mavë enyò mvua anë wa.

¹⁵ Nga mënë fë na mëbòò ai akuma dama mbol madiṅ? Dze yë wawog abe mbol mënë dzam mbëṅ?

¹⁶ Nala ngò hm bod bë osu bayi vëṅan e ba bë mvua, bod bë mvua bëvëṅan e ba bë osu.

Yesus akad eyòṅ lala na ayi wu, akui fë a sòṅ

¹⁷ Yesus angabed a Yerusalem ha, ndò angaloe bawom ai bëbè a mgbag, angakad bò a zen ha na:

¹⁸ Bëbëgan, bia ba biabed a Yerusalem; Mòn mod ayi vëëban a mò bëfada bënen ai bësaṅa bëkalara, bayi tsig na ayean ai awu,

¹⁹ abog te bayi nyè vë a mò bëdzin asu yë na bëkpëlë nyè, bëyit nyè, bëbom fë nyè a klos, hë da, ayi kui a sòṅ a mos lala.

Nyia bòn bë Zebede ayi etoa osu asu bòn boe

²⁰ Abog te, ndò hm nyia bòn bë Zebede angasò ai bòn boe abë Yesus, angadzaè nyè dzom ziṅ.

²¹ Yesus nyë ai nyè na: Wayaan ai dze? Nyè na: Bendëge të na, e bòn bama ba bëtòbò, mbòg a mbo-nnomo e nyò mbòg a mbo-ngal woe a etoa nkukuma dzoe.

²² Yesus nyè na: Miayëm ki e dzam miadzaè dili. Yë minë dzam nyu e kòb mayi nyu? Bò na, owe.

²³ Nyè ai bò na: Miayi hm fò nyu kòb dzama; dzam da, mfa yë na miatòbò ma a mbo-nnomo ai mbo-ngala, së ki ma makab bitoa bite; Tara angamana ya tòb bod.

²⁴ B'awom bëvòg bëngayi wog, bëliṅan ai e babënyaṅ bëbè ba.

²⁵ Ndò Yesus angaloe bò nyè na: Miayëm na bëdzoe ya mëyòṅ badzoe mëyòṅ, eyë fë mimfaṅ mi bod miadzoe nala.

²⁶ Të layenan nala abë mina, dzam da, ngë mod ayi na abò mfaṅ mod, avëṅan mina olò.

²⁷ E nyò ayi na abò e mod osu a zaṅ dzan, asye mina.

²⁸ Nala hm fë ngò mòn mod andzëki sòṅ na bësye nyè, angasò na asye, alig fë enyiṅ dzie eban asu abui bod.

Yesus abò mindindim mibè mvoè

²⁹ A bëkodogo a Yeriko, abui bod angabie nyè.

³⁰ Mindindim mibè mitoa a mgbag ndzòṅ; bëngayi wog na Yesus alod, bëngayon, bò na: Yënë bia ngòl, a man David.

³¹ Nkunda bod ongasog ai bò va na bëtòbò bivol, hë bò bëbama na: A Nti, a mòn David, yënë të bia ngòl.

³² Ndò Yesus angatëbë, aloe bò, nyè na: Miayi na mëbò ai mina ya?

³³ Bò na: Biayi na oyaa bia mis.

³⁴ Ndò Yesus angayen bò ngòl, anamba bò mis, etye etye te, bëngadugan yen, mbò bakë babie nyè ba.