Lk 9 - MKPAMAṄ AMVOE Nouveau Testament en langue Ewondo 2012

Yesus alom bë awom ai bëbèè

¹ Ndò angaloe bë awom ai bëbèè, avëë bò ngul ai edzoe a nyòl bëbë minsisim bësë, ai na bësye akòn,

² ndò angalom bò na bëyedan edzoe Zamba, ai na bëlëdë akòn,

³ nyè ai bò na: Të mianòṅ dzom ziṅ a miakë a zen, tò ntum, ngë mfëg, ngë mbaṅëla, ngë mòni, tò ki na mibi biwòman bibè.

⁴ Ndò fë, e nda miayi nyian, eyë tòbògan ete, eyë fë mityege ete.

⁵ E ba bandzëki soan ai mina, eyòṅ miakodo a tisòn te, sasan mbulug onë mina a mëkol asu mbòòlan waban.

⁶ Ndò bëngatye, bëngakë bakë a bëtisòn, bëtisòn, bëyedëgan mbëmbë foe, bëlëdëgë fë bod hom osë.

Herodes akòn Yesus wòṅ

⁷ Ndò Herodes Tetrarka, angawog e mam mësë mëlodo ma, fëg engadzaṅ nyè ai mbol bod bëziṅ bëdzoo na Yohannes ahëbë a bëkon,

⁸ bëvòg ki bëdzoo na Elias ayene, bëvòg bò na mbòg ziṅ ya bëprofet ahëbë a sòṅ.

⁹ Herodes nyè na: Mamen mëngatsig Yohannes nlo. Za ben hm mawog abui mam di mëtyan ai nyè? Angadzëṅ hm na ayen nyè.

Yesus avë bod bakuda bëtan bidi

¹⁰ Adugan apostel bëngadugan, ndò balèè nyè e mam mësë bëngabò. Ndò anòṅ bò, akëlëg ai bò, hë bò bò a e tisòn enë dzoe na Betsaida.

¹¹ Minkunda mingayi yëm nala, bëngatoṅ nyè. Ndò angasoan ai bò, angakad bò mam më edzoe Zamba, angalëdë fë e ba bëyaṅan ai evovoe.

¹² Amos ongakë hm wayimbi. Ndò bë awom ai bëbèè badzo ai nyè na: Soege nkunda bod asu yë na bëkë e mal mal ya ngòdò ha, bëdzëṅ mëdzogobo, bëdzëṅ fë e dzom badi, amu binë a nkod-nnam ha.

¹³ Nyè ai bò na: Mina bëben vaan bò e dzom ya adi. Bò na: Biabëlë ki abui, hë bëmbaṅëla bëtan ai kòs ebè, së na bia bëben bikë kus bidi asu e bod bësë ba.

¹⁴ Amu bëngabë dzam bò bakuda bëtan. Ndò hm adzo ai bëyègè boe na: Toan bò a si a mëngoe, anë angoe bod mëwom mëtan.

¹⁵ Ndò bëngabò nala, bëmana toa bò bësë a si.

¹⁶ Ndò anòṅ e bëmbaṅëla bëtan ai kòs ebè nyi, abede mis a yob, afubu biè, amana bëg, akalan bëyègè na bëvë bod.

¹⁷ Ndò bësë bëngadi, bëdzie, ndò bëngakoan e bi bingaligi, biad bitun bëmbaṅëla awom ai bibè.

Petrus amëm: Yesus anë Messias. Yesus akad awu die ai akui-lë sòṅ

¹⁸ Ndò hm labò na, mbol angabë akogëlan nyè etam, bëyègè bëtoa ai nyè, ndò asili bò na: Bod badzo na mënë za?

¹⁹ Ndò bayalan na: Yohannes ndu-bodo; bëvòg badzo na onë Elias, bëvòg na onë profèt ziṅ ya okoba ya adugan hëbë a sòṅ.

²⁰ Nyè ai bò na: Mina hm ki, miadzo na mënë za? Ndò Petrus ayalan na: Onë Kristus Zamba.

²¹ Ndò angatëbëlë bò na të bakad tò mod ziṅ adzo te,

²² nyè na, mòn mod ayean dzugi abui, bënyia-bodo-mvia bësie nyè, ai bëfada ai bëtili bëkalara, bëwoe nyè, dzam da ahëbë a sòṅ a amos lala.

²³ Ndò adzo ai bò bësë na: Ngë mod ziṅ ayi na azu abie ma, asiege nyè emen, abëgë klos dzie amos osë, azu atoṅ ma.

²⁴ Amu e nyò ayi na abaala enyiṅ dzie, ayi dzò dzèè. E nyò ki adzèè enyiṅ dzie asu dama, e nyòlò te ayi dzò kode.

²⁵ Mfi dze onë na mod akyëbë ai si esë, ngë adzèè nyè emen?

²⁶ Amu e nyò awog osòn asu dama ai asu bibug biama, mòn mod nyè fë ayi nyè wog osòn eyòṅ ayi sò a duma die ai e di esya ai e di mimfufub benglès.

²⁷ Makad mina bëbëla, bod bëziṅ bëtëtëlan ha a bayi ki nyumulu awu së na bëtari yen edzoe Zamba.

Yesus atsende nyòl a nkol a yob

²⁸ Ndò hm labò na, dzam bò mëlu awom a mvus e bibug bi, ndò anòṅ Petrus ai Yohannes ai Yakobus, abëdë a nkol na akogëlan.

²⁹ Abog akogëlan ha, ndò asu die angatsende, eyie dzie engafum hë anë ten.

³⁰ Bod bëbè bëngalèè ai nyè, bëngabë na Moses ai Elias;

³¹ E bod bëngayene ba bëngalèè adzo awu die ya angabë na layene a Yerusalem.

³² Petrus ai e ba bëngabë ai nyè bëngaku oyò. Ahëbë angahëbë, ndò bayen duma die ai e bod bëbè bëngabë tëlë ai nyè.

³³ Eyòṅ bëngasolan, Petrus nyè ai Yesus na: A ṅyëgële, anë mbëṅ na bitòbò ha; ndò ṅloṅan bibëm bilè, dzia asu doe, dzia asu Moses, dzia asu Elias; emen të yëm e dzam adzo.

³⁴ Akòbògò nala, ndò nkut ongasus bò a nyòl. Bëngakòn wòṅ a bënyian a nkut ha.

³⁵ Ndò kiṅ yasò a nkut ete na: Mòn wama ya mëngatòb nyòlò, vogolan nyè.

³⁶ Amana kiṅ engamana kòbò, Yesus antoa etam. Bò fë hë bivol, ndò fë mëlu mëte, bandzëki kad tò mod e mam bëngayen.

Yesus asye mòngò ya abëlë mbë nsisim a nyòl

³⁷ A amos otsaag hala, ndò basus a nkol a si, mod nkunda atoban ai bò.

³⁸ Mod ziṅan gabam a nkunda ete ha na: A ṅyëgëlë, makogëlan ai wa, vòligi te mòn wama, anë ma mbaṅ mòn.

³⁹ Mbë nsisim akad nyè bi, etye etye angabam, awoa nyè a si, avul angakui nyè a anyu; anë të nyè dzoge së na abò nyè mbë dzam.

⁴⁰ Mëkogëlan ya ai bëyègè boe na bëtsidan nyè, bò tègè ai ngul te.

⁴¹ Yesus nyè na: A mvòṅ bod minë tègè ai ṅyëbë, mitoa fë dzongo, mayi tòbò ai mina akui ve, mëdzibigi mina? Zaag ai nyò mòn ha.

⁴² Ṅnyie anë angasubu, ndò fë mbë nsisim awundi nyè, awoa nyè a si. Yesus abama ai mbë nsisim, abò mòngò mvoè, ndò avë nyè esya.

⁴³ Bësë bëngakam duma Zamba. Mbol bod bësë bëkama e mam abòòg, ndò adzo ai bëyègè boe na:

Yesus akad eyòṅ bèè na ayi wu

⁴⁴ Toan nyili e bibug bi a mëlò man, amu mòn mod ayi kuan a mò më bod.

⁴⁵ Dzam da, bandzëki wog ebug te, ndò fë engabë bò ndimba e kan yë na bò të wog, hë bò bëmbarëga nyè sili adzo ebug te.

Za anë e mod osu?

⁴⁶ Ndò minlaṅëdan miakui bò a zaṅ ha na za anë mfaṅ a lodo e ba bëvòg.

⁴⁷ Mbol Yesus ayëmë mintsogan ya minnëm miaban, ndò anòṅ man mòngò, atele nyè babi ai emen,

⁴⁸ nyè ai bò na: E mod osë asoan ai e man mòngò nyò a dzoe dama, ma asoan ai nyè. E mod ki asoan ai ma, asoan ai e nyò angalom ma. Amu e nyò anë mëligi-mvua a mina bësë, ṅnyè anë mfaṅ a bui.

E mod asë mina e ngam ya ayat, anë ai mina ngam dzia

⁴⁹ Ndò Yohannes adzo ai nyè na: A ṅyëgëlë, biyen mod atsidëgan bëbë minsisim a dzoe doe, ndò bidzo na biakaman ai nyè dò, amu asëki ai bia esamba.

⁵⁰ Yesus nyè ai nyè na: Mibë kaman ai nyè dò. E nyò asëki mina e ngam y'ayat anë ai mina ngam dzia.

YESUS ABED A YERUSALEM Dzal samaritan laben soan ai Yesus

⁵¹ Eyòṅ mëlu yë na anòṅëban a yob mëngakui, ndò angatye na akë a Yerusalem.

⁵² Ndò angalom bod osu; ndò bakë, bënyian a tisòn bësamaritan na bakomëzan nyè etoa ete.

⁵³ Hë da, bandzëki soan ai nyè, mbol angabë akëlë ai dulu osu a Yerusalem.

⁵⁴ Ayënë bëyègè boe Yakobus ai Yohannes bëngayen nala, bò na: A Nti, yë wayi na bibò na ndoan esus a yob, emana bò?

⁵⁵ Ndò avëṅan ai mvus, akaman ai bò dò.

⁵⁶ Ndò bëngakë dzal afë.

E bod bayi na batoṅ Yesus a zut

⁵⁷ A bëkëlë a zen ha, ndò mod ziṅ a kad nyè na: Mayi wa toṅ tò okë ve!

⁵⁸ Yesus nyè ai nyè na: Mvag ebëlë mimbil, anòn ya yob abëlë mumba, hë da mòn mod abëlë ki e hom aboo nlo.

⁵⁹ Nyè ai mod mfë na: Zaag wabie ma. Mod te nyè na: A Nti, dzoge të ma mëtari kë dzëb tara.

⁶⁰ Nyè ai nyè na: Dzoge mimbim midzëb mimbim miaban; mfa woe, zaag kë wayedan edzoe Zamba.

⁶¹ Mod mfë nyè na: Mazu mabie wa, a ṅyëgëlë. Hë da, tarigi ma dzoge na mëkë yaan ai nda-bod dzama.

⁶² Yesus nyè ai nyè na: Mod afufudi wò a ebag esye, angadugan bëbë a mvus. E nyòlò te ayean ki ai edzoe Zamba.