Lk 5 - MKPAMAṄ AMVOE Nouveau Testament en langue Ewondo 2012

Yesus aloe e bëyègè bë osu

¹ Ntye bod bëvudu nyè edinga a nyòl ha, bëvogolo ebug Zamba, nyè angabë atëlë a ntsag maṅ më Genesaret,

² ndò ayen bifunga bibè babi ai kindig maṅ. Bëlòb bë kòs bëngasus ete bëngasob mvunda.

³ Ndò abed a efunga dzia, e dzi Simun, nyè ai nyè na akë ai nyè man ntye ai nkot si, ndò atòbò a si, angayëgëlë minkunda, atoa a efunga.

⁴ Amana angamana kòbò, nyè ai Simun na: Këlë mfa onë edòg, owoa mvunda dzan na obi kòs.

⁵ Simun nyè na: A ṅyëgëlë, biwu esye nguma alu të bi dzom. Dzam da mayi woa mvunda mbol okòbò.

⁶ A bëbò nala, ndò babi eyëgan abui kòs, mvunda engayi nyabi.

⁷ Ndò baloe bëmoe baban ya efunga evòg na bëzu bò vòli; ndò bëngasò, bëdzala bifunga bisë bibè, bingayi yimbi.

⁸ Simun Petrus angayi yen nala, ndò aku Yesus a mëbòṅ a si, nyè na: Kodogo të e hom mënë, a Nti, amu mënë nsëmë minsëm.

⁹ Amu wòṅ ongabi nyè ai e ba bësë bëngabë ai nyè asu abui nlòb kòs bëngalòb hi,

¹⁰ Yakob ai Yohannes, bòn bë Zebede a bëngabë fufulu ai Simun bò fë bëngakòn wòṅ nala. Yesus nyè ai Simun na, obë mbara. Akègè etoa dzi, bod mbò wayi lòb.

¹¹ Ndò bëngasò ai efunga a kindig, bëdzoge byem bisë, bëngabie nyè.

Yesus abò nzëzam mvoè

¹² Ndò labò na, atoa a tisòn ziṅ ha, mod antoa hala, zam ai nyòl esë. E mod nyò angayi yen Yesus, ndò aku, aluu asu a si, angakogëlan ai nyè, nyè na: A Nti, ngë wadiṅ, onë ma dzam fubu.

¹³ Ndò Yesus asam wò, anamba nyè, nyè na: Owe, mayi nala, bò mfuban. Etye te, ndò zam engakodo nyè a nyòl.

¹⁴ Ndò atëbëlë nyè na: Të wakad mod, dzam da këlë lëdë wamen abë fada, otuni fë akyaè ya Moses angabende asu mfuban woe, asu yë na bod bëbi mbòòlan.

¹⁵ Foe engakë yatsaman asu die, abui minkunda angazu na bazu wog, ai na bësyeban akòn daban.

¹⁶ Mfa woe, ndò atub a fëfël, e hom onë a yaaṅ, angakogëlan.

Yesus abò mbombog mvoè

¹⁷ Ndò labò na, amos ziṅ, Yesus ayëgëlë, bëfarisea ai bëyëgëlë bë mvende ya bëngakë basò a nkòṅ nnam Galilea osë ai Yudea bëtoa. Ngul Zamba engatindi nyè na asye bod.

¹⁸ Bod bëmbëgë mbombog a ondanga, bëngadzëṅ na banyian ai nyè, bëboe nyè nyè osu.

¹⁹ Mbol tègè ai afola ya alod ai nyè a nkunda ete ha, ndò babed a ndil a yob, bëngasuu nyè a ndil a zaṅ ha ai ondanga woe osu Yesus.

²⁰ Ndò ayen ṅyëbë waban, nyè na: a mod, minsëm mie midzuban ya wa.

²¹ Bësaṅa bëkalara ai bëfarisea bëkèè hm na balaṅëdan, bò na: Za abèan Zamba nyò? Za anë dzam vaè minsëm ngë së ki Zamba etam?

²² Mbol Yesus angayen minlaṅëdan miaban, nyè ai bò na: Dze miakë mialaṅëdan a minnëm mian?

²³ Dze enë ebugbu abui, yë adzo na: minsëm mie mihaban wa, yë adzo na: Kodogo a si, owulu?

²⁴ Ndò hm, asu yë na miyëm na mòn mod abëlë ngul ya avaè minsëm a si, nyè ai mbombog na: Wa madzo ai nyè, tëbëgë, onòṅ ondanga woe, okë a nda dzoe.

²⁵ Ndò atëbë etye te a mis maban, anòṅò e dzom ambë boo ete, akëlë a nda dzie, akë ataman Zamba.

²⁶ Bod bësë bëkuu fò ayaa, bëngalugu Zamba, wòṅ odzie bò a nyòl, bò na: biyen eyëṅ dzam ana.

Yesus aloe Levi

²⁷ A mvus hala, ndò akui, ayënë ṅnòṅò ntòlò dzoe na Levi atoa a nda toya, nyè ai nyè na: byege ma.

²⁸ Ndò alig byem bisë, akodo a si, angatoṅ nyè.

²⁹ Ndò Levi angabò nyè mod afaṅ a nda dzie, abui bod ya bënòṅò bë toya ai bod bëfë bëtoa ai nyè ha.

³⁰ Bëfarisea ai bësaṅa bëkalara baban bënganyiṅ, bò ai bëyègè boe na: Asu dze miadi, minyaa fë fufulu ai bënòṅò bë toya ai bësëm?

³¹ Yesus nyè ai bò na: E bod bënë mvoè bayaṅan ki ai mbëbala, minkokòn mmiè miayaṅan ai mbëbala.

³² Mandzëki sòṅ na maloe bësosoo, mëngazu loe bësëm na bëvëṅan.

Adzo eki bidi ai mënyu

³³ Bò ai nyè na: Bëyègè bë Yohannes bafëm ki bidi, ndò fë bakogëlan fufulu; tò fë bëyègè bëfarisea babò nala, dzam da emboe badi, bënyaa.

³⁴ Yesus nyè ai bò na: Dze yë miayi bò na bëlëdë bë nlugu bëki bidi ntye nlugu anë ai bò nga?

³⁵ Mëmos mazu, a bayi bò nòṅ nlugu waban, eyòṅ te bayi ki bidi a mëmos mëte.

³⁶ Ndò aku bò nkana na: Mod ziṅ asëki dzam tsig abaag ya mkpamaṅ eyie, afudi dò a nnomo eyie; ngë ahë bò dò, mkpamaṅ eyie wayi nyabi, abaag ya mkpamaṅ eyie të yëan ai nnomo.

³⁷ Ndò fë mod ziṅ asë ki dzam soe mimkpamaṅ mëyòg a minnom mëndëg. Ngë ahë bò nala, mimkpamaṅ mëyòg miayi boe mëndëg, mëyòg mësoeban a si, ndëg endaman.

³⁸ Dzam da, bayean fudi mimkpamaṅ mëyòg a mimkpamaṅ mëndëg.

³⁹ E mod anyu ya e mëyòg mënë nnom ayi ki na anyu e ma mënë mimkpamaṅ. Amu adzo na, e ma mënë nnomo mënë mbëṅ.