Lk 18 - MKPAMAṄ AMVOE Nouveau Testament en langue Ewondo 2012

Nkana nkus mininga ban ntsigi-ntol

¹ Angabë akuu bò nkana na alëdë bò na bayean kogëlan mban, të tigbi,

² nyè na: Ntsigi-ntol ziṅan gabë a tisòn ziṅ, nyè ha të mbara Zamba, të kam mod.

³ Nkus mininga wa ongabë a tisòn te, ndò akarëga sòṅ a bë nyè, nyè na: Komo ma adzo mëbëlë ai nziziṅ wama.

⁴ Ndò eban engakog, nyè të yi kom adzo. A mvus hala, ndò abindi, nyè na: Tò anë mambara ki Zamba, ma të kam mod,

⁵ mbol nkus mininga hi waandëgëlë ma, mayi nyè tsig ntol asu yë na të adugan ma sòṅ ndëgëlë abim mban te.

⁶ Nti nyè na: vogëlan e dzam ndzodzongo ntsigi-ntol wadzo!

⁷ Yë Zamba ayi bò të tsig ntol e bod boe angatòb, a bayon nyè a mis ai alu, ai amos, tò abò të bò vol vòli?

⁸ Makad mina na ayi bò tsig ntol etye etye. Hë da, eyòṅ mòn mod ayi sò, yë ayi fò kòb ṅyëbë a si-ndon nga?

Nkana man farisea ban man nnòṅò ntòlò nnam

⁹ Ndò aku bod bëziṅ ya bëtsogo na bënë sosoo, bëbyandigi e bod bëvòg nkana hi:

¹⁰ Bod bëbè bëngabed a tempel na bakë kogëlan, mbòg man farisea, e nyò mbòg nnòṅò ntòlò.

¹¹ Ndò man farisea angatëbë, angakogëlan a nnëm etere na: A Zamba, makaṅ wa mbol masëki anë e bod bëvòg: bafadi, bënë dzongo, bandaman mëlug; masëki anë nnòṅò ntòlò nyò.

¹² Maki bidi a nguma sòndò biyòṅ bibè, mayaan toya a e dzom esë mëbëlë.

¹³ Mfa nnòṅò ntòlò, atëlë oyab nali, të të yi na abede mis a yob, dzam da angakud emen a nkug, nyè na: A Zamba, yënë ma nsëmë minsëm ngòl.

¹⁴ Makad mina: e nyò angadugan a nda dzie mfuban alodo e nyò mbòg. Amu e mod osë abede emen ayi dzòdiban, e nyò adzòdi emen ayi bedëban.

Yesus afubu ban bòngò

¹⁵ Ndò bazu ai nyè ban bòngò na anamba bò. Bëyègè bëngayi yen nala, bëngasog ai bò.

¹⁶ Ndò Yesus angaloe bòngò a fëfël, nyè na: Dzogan ban bòngò bëzu abë ma, të miakad kaman ai bò, amu edzoe Zamba yawoge ai kan te.

¹⁷ Amen, makad mina na: E nyò osë ayi ki soan ai edzoe Zamba anë man mòngò, ayi ki nyian ete.

Nkukuma ndzoe ziṅ

¹⁸ Ndò ndzoe ziṅ asili nyè na: A mbëmbë ṅyëgëlë, mayean bò dze asu yë na mëkyëbë ai enyiṅ kòm?

¹⁹ Yesus nyè ai nyè na: Asu dze wadzo na mënë mbëṅ? Mod ziṅ asëki mbëṅ, hë Zamba etam.

²⁰ Wayëm mëmvende: Të wabò bisog, të wawoe, të wadzib, të watsig mbë mvaa, olugu esoa ban nyoa.

²¹ Mod te nyè na: Mëbaala ya mam mëte mësë atarigi mëtoa mòngò.

²² Awog Yesus angawog nala, nyè ai nyè na: Dzom engënë edzëman wa dzia: Kuan ai e byem bisë obëlë, okab mimbubua, abog te wayi bi ntam mëbugban a yob, ozu wabie ma.

²³ Angayi wog nala, antoa fò olun; Amu angabë nkukuma eyëgan.

²⁴ Mbol Yesus angayen anë angavëṅan olun, nyè na: Layi hm bò aye o, na e bod bëbëlë akuma bënyian a edzoe Zamba!

²⁵ Amu anë ebugbu abui na kamele alod a alò ondondò, alodo anë nkukuma anyian a edzoe Zamba.

²⁶ E bod bëvogolo bò na: Ndò hm za anë dzam kodeban?

²⁷ Nyè na: E dzom yakad bod yakad ki Zamba.

²⁸ Petrus nyè na: Yënë, bingamana lig bisë, bisò biatoṅ wa.

²⁹ Nyè ai bò na: Amen, makad mina na: Mod ziṅ asë na angalig nda, ngë nyia, ngë babënyaṅ, ngë bivuvuman, ngë bòn, asu edzoe Zamba,

³⁰ ndò ayi bò të bi nala abui biyòṅ a enyiṅ dzi, abii fë enyiṅ kòm a enyiṅ yazu.

Yesus akad eyòṅ lala na ayi wu, akui fë a sòṅ

³¹ Ndò anòṅ bë awom ai bëbè, nyè ai bò na: Ma nyò mabed a Yerusalem, ndò e mam mësë mënë ntilan a bëprofèt mëtyan ai mòn mod mayi toban.

³² Amu ayi kaban a mò bëhaiden, bëkpëlë nyè, bëtè nyè, bëtui nyè mëtè a nyòl,

³³ bëyidi nyè, bëwoe fë nyè, dzam da, a amos lala, atëbë a sòṅ.

³⁴ Bò të wog tò dzom; ndò adzo te angalaṅan bò ndimba nala, bò të wog e dzam Yesus angadzo.

Yesus abò ndindim mod mvoè a Yeriko

³⁵ Ndò angabò na, mbol angabë asubugu a Yeriko, ndindim ziṅ otoa a mgbag ndzòṅ, adzaègè byem.

³⁶ Mbol angawog nkunda bod olodo hi, angasili e dzom yalod.

³⁷ Ndò bakad nyè na Yesus man Nazaret ṅnyè alod.

³⁸ Asò hm vë kiṅ, nyè na: A Yesus, man David, yënë ma ngòl.

³⁹ E ba bëkëlë osu ha bëngasog ai nyè, bò na atòbò evol; nyè hë abam a yob ete na: A man David, yënë ma ngòl.

⁴⁰ Ndò Yesus angakom etye, abende na bëzu ai nyè abë nyè. Eyòṅ angasubu babi, ndò asili nyè na:

⁴¹ Dze wayi na mëbò wa? Nyè na: a Nti, bò na mëyen!

⁴² Yesus nyè ai nyè na: Yënë! Ṅyëbë woe onyii wa.

⁴³ Etye etye te, angayen, angakë atoṅ nyè, alugu Zamba. Ayen bëngayen nala, bod bësë bëngavë Zamba duma.