Lk 16 - MKPAMAṄ AMVOE Nouveau Testament en langue Ewondo 2012

Nkana nkala-byem mëdugan

¹ Angabë adzoo ai bëyègè na: Nkukuma mod ziṅ ongabë bëlë nkala-byem; ndò bazu sòman nkala-byem nyò na amana ndaman akuma.

² Ndò aloe nyè, nyè na: Dze mawog dzi etyan ai wa? Zaag ma bò zitòg esye dzoe, amu wasëki dzam kë ai nkalan byem osu.

³ Nkala-byem angabindi, nyè na: Mazu bò ya, eyòṅ esya-nti wama angadali ya ma nkalan byem a mò di? Afag si, ma tègè ai ngul; akë adzaè, abim osòn te!

⁴ Mëyëm ya mbol mazu bò, asu yë na bod bësoan ai ma a mënda maban eyòṅ bayi ma vaè a esye nkalan byem.

⁵ Ndò hm akèè na aloe e bod bëmbë bëlë esya-nti woe bikola, bò bësë mbombòg mbombòg; nyè ai e nyò osu na: Obëlë esya-nti wama taṅ ya?

⁶ E mod nyò nyè na: Bëfonda bë mbòn ntèd. Nyè ai nyè na: Nòṅò kalara woe nyò, otòbò a si, ovol til na mëwom mëtan.

⁷ Nyè ai e nyò mbòg na: Mfa woe, obëlë ekola taṅ ya? Nyè na: Minkud mi oles ntèd. Nyè ai nyè na: Nòṅò kalara woe, otil na mëwom mwom.

⁸ Ndò esya-nti angataman ndzodzongo nkala-byem hi, amu angasye ai mëkëṅ. Amu bòn bë e si nyi balod bòn bë mfyè a fëg eyòṅ bënë a zaṅ mvòṅ dzaban.

⁹ Ndò makad mina: Boan mëmvoe ai akuma dzongo, asu yë na eyòṅ lakë mana, bësoan ai mina a bibëm bi kole.

¹⁰ E nyò anë mod afidi a ban mam ayi fë bò mod afidi a mam mënen; e nyò ki anë dzongo a ban mam, ayi fë bò dzongo a mam mënen.

¹¹ Ndò hm, ngë miayëm ki sye ai akuma dzongo, za ayi mina vë mfaṅ a kuma?

¹² Ngë mibò tègè ai afidi a miakala eza akuma, za ayi mina vë e di lawoge ai mina?

¹³ Mòngò bisye ziṅ asë ki dzam sye bëti bëbè. Amu ayi siṅ mbòg, angadiṅ e nyò mbòg, ngë ki na alada ai mbòg, angabyandi e nyò mbòg. Miasëki dzam sye Zamba ai akuma.

Mvende ai edzoe Zamba

¹⁴ Bëfarisea ya bëngabë bëlë akuma, bëdiṅi mòni, bëngayi wog nala, bëngamgbali nyè.

¹⁵ Nyè ai bò na: Mina mialëdë a mis më bod e kan minë sosoo, ndë Zamba nyè ayëm mina minnëm. Amu e dzi ya bod bakam enë zëzë a mis më Zamba.

¹⁶ Mvende ai bëprofèt binë aza kui abë Yohannes. Akèègè abog te, bayedan edzoe Zamba, ndò fë mod osë ayi na anyian ete a ngul a yob.

¹⁷ Anë ebugbu abui na yob ai si bimana a fii, alodo anë man atòn mbòg ya mvende aku.

¹⁸ E mod asoe ngal, alugu mfë, abò bisog; e nyò fë alug e mininga nnom woe angasoe, abò bisog.

Nkukuma mod ban Lazarus

¹⁹ Mod ziṅan gabë nkukuma mod, akarëga bòd biyie bi mòni, anyiṅi fë a mintag ha amos osë.

²⁰ Mbubua ziṅ dzoe na Lazarus ongabë odzogo nyè a mbè nda a si, ntèd ntèd, mëfol ai nyòl esë,

²¹ ayi të du na adzie të ai e mënyuṅ ya maku a tëbëlë bidi nkukuma mod hi. Së hm ki hë nala, mvu engazuzu nyè nyie mëfol.

²² Ndò hm lazu bò na, awu mbubua hi ongawu, ndò benglès bëngakë ai nyè a mëbè më Abraham. Nkukuma mod hi wa owuu, bëdzëbë nyè.

²³ Atoa a tolendoṅ, ndò abede mis, abëlë mintye ha eyëgan, ndò ayen Abraham oyab nali, Lazarus atoa nyè a mëbè.

²⁴ Ndò avë kiṅ, nyè na: A tara Abraham, yënë ma ngòl, olom Lazarus na adu onyu a mëndim, azu ma vë evovoe a oyëm, amu madzugi abui a minkabag mi ndoan mi.

²⁵ Abraham nyè na: A mòn, tsogo na ongabi mvòm a enyiṅ dzoe, Lazarus abëlë abe. Abog hm di, ambëlë ya evovoe, wa ombëlë mintye.

²⁶ Abadan, afëdan fë na, mod mbimbiṅ anë bia a zaṅ, e kan yë na e ba bayi na badaṅ, bëzu abë mina, basëki dò dzam bò; mina fë miasëki dzam daṅ a binë mu.

²⁷ Nyè na: Madzaè të wa, a tara, na olom nyè a nda esya wama,

²⁸ amu mëbëlë babënyaṅ bëtan, asu yë na akë bò beme, bëza sòṅ a e mod etòbògò mintye nyò.

²⁹ Abraham nyè na: Bëbëlë Moses ai bëprofèt; bëvogolo bò.

³⁰ Nyè na: Kokoa, a tara Abraham; ngë mod ahë kë bò sòṅ a bëkon, bayi vëṅan.

³¹ Nyè ai nyè na: Ngë bavogolo ki Moses ai bëprofèt, tò mod afyaṅan kë tëbë a bëkon, bayi ki yëbë.