Kolosi 4 - MKPAMAṄ AMVOE Nouveau Testament en langue Ewondo 2012

¹ Mina bëdzoe, lëdëgan bëlò baan sosoo ai tëtëlë, miyëmë na mina fë mibëlë Nti a yob.

Mëlëbëga

² Boan mban a ngogëlan, tòbògan evie ete ai mvëṅan ngaṅ,

³ mikogëlan fufulu asu daan asu yë na Zamba ayaè bia mbè yë na bikad ebug, ndimba Kristus, a mëtii ai dzò a mësuṅ,

⁴ asu yë na mëkuli dzò a ngëëṅ a kyaè ya mayean kòbò.

⁵ Wulugan a fëg asu bëhaiden, mitoan bëlan ai abog.

⁶ Nkòbò waan obò kòm esë hë nkòbò mgba, e hi bëfudi nku, na miyëm akyaè miayean yalan mod osë.

Mësugan më mvua

⁷ Tukikos, ndindiṅ madzaṅ, ai mbò esye afidi ai mvoe esye dzama abë Nti ayi mina mana lèè minlaṅ miama,

⁸ ṅnyè malom mina asu adzo di na miyëm e mam mabëbë bia, avòli mina minnëm,

⁹ fufulu ai Onezimus mod afidi, ai ndindiṅ madzaṅ, ya anë mod ya abë mina. Bayi mina lèè e mam mësë ya mu.

¹⁰ Bod basug mina na: Aristarkus ya anë ai ma a mbog, Markus, manyaṅ Barnabas, (mëngatil ya mina adzo die, ngë asò abë mina, bëlan ai nyè mbëṅ),

¹¹ ai Yesus ya baloe na Yustus, bod bëte basò a akele. Hë bò etam mbò masye ai bò asu edzoe Zamba, ndò fë bëngavòli ma abui.

¹² Epafras, mod ya abë mina, asug mina; anë mbò esye Kristus Yesus, aluman fò asu dan kòm esë a ngogëlan asu yë na mitëbë a kpiim, mitòbò fë tègè ai bisoo a ṅyian Zamba osë.

¹³ Mënë nyè wusnèt na asye abui asu daan ai asu bod ya Laodisea ai e ba ya Yerapolis.

¹⁴ Lukas, ndindiṅ mod bëbëla ai Demas basug mina.

¹⁵ Sugan e babëdzaṅ ya Laodisea, ai Nimfas, ai e nda Zamba yakoan a nda dzie.

¹⁶ Eyòṅ miayi mana laṅ e kalara nyò, boan na bëlaṅ fë nyè a nda Zamba ya Laodisea, ai na mina fë minaṅ e kalara ya bëngatil nda Zamba ya Laodisea.

¹⁷ Kadan Arkipus na: Odzëṅ na odzala esye ya ongabi abë Nti.

¹⁸ Mësugan mënë ntilan ai wò wama, ma Paulus. Tsogan mësuṅ mama. Maa abòòg ai mina.