Ekuli-mam 9 - MKPAMAṄ AMVOE Nouveau Testament en langue Ewondo 2012

¹ Ndò englès tana angalòṅ tòṅ. Ndò mayen otitie otyege a yob, okpaa a si, ndò bëngavë wò ediiga ya ebe tolendoṅ,

² ndò angayaè ebe tolendoṅ, otsida ongakui a ebe ha anë otsida mod ndoan, ndò nlo-dzobo ai evundu bingaku dibi etòm otsida ya ebe.

³ Bitandak bikui hm fò a otsida, bintoa a si, ndò bavë bò ngul anë bëkara-olërë ya si.

⁴ Ndò bëngakad bò na të babò kye ngë elòg ngë ele ziṅ abe, bëbò hë e bod babëlë ki ndëm Zamba a mvòm asu abe.

⁵ Ndò bëngavë bò ngul na të bawoe bò, dzam da na bëtibili bò ngòn etan, etibili te ebò anë etibili kara-olërë eyòṅ alob mod.

⁶ Mëlu mëte, bod bayi dzëṅ awu, tègè dò yen, bayi yi du na bawu, awu angatub bò.

⁷ Bitandak bingabë bifulan ai bikabëli ya binë nkomëzan asu bita, bëbëlë a minlo hë anë bikadi bi olugu bifulan ai mvòt, mësu maban hë anë mësu më bod,

⁸ bëbëlë esil hë anë esil bininga, mësoṅ maban mëtoa hë anë e ma më emgbëm,

⁹ ongon hë anë eben ekye, eduṅ mëfab maban etoa anë eduṅ bikalik bikye eyòṅ abui bikabëli biakë a bita.

¹⁰ Bëbëlë ngëm anë kara, ai mëbonga. A ngëm dzaban ngò bëngabë bëbëlë ngul ya abò bod abe a taṅ ngòn etan,

¹¹ bëbëlë ndzoe waban, englès ya tolendoṅ, dzoe die anë a nkòbò ebrea na Abaddon, abëlë dzoe a nkòbò grek na Apolluon.

¹² Bidim bi osu bilodo. Bidim bifë bibè biazu a mvus hala.

¹³ Ndò englès samëna angalòṅ tòṅ. Ndò mëngawog kiṅ dzia esòò a mëbug më alatar mvòt ya anë Zamba osu,

¹⁴ edzoo ai englès nyiina ya angabë abëlë tòṅ na: Tiigi e benglès ya bëngabë a ngomëzan asu awola, ai amos, ai ngòn, ai mbu, asu yë na bëwoe efas lala ya bod.

¹⁵ Ndò e benglès bënyii ya bënë nkomëzan asu awola, ai amos ai ngòn ai mbu bëngatiiban, asu yë na bawoe efas lala ya bod.

¹⁶ Ndò taṅ nkunda bita ya bikabëli a yob engabë bakuda bakuda. Mamen mëngawog taṅ dzaban.

¹⁷ Na ngò mëngayen bikabëli a nlo, ai e bod bëngabë bëtoa ete, bëbëlë biben biviege, ai nyòl ten, ai nyòl zoṅ, minlo bikabëli mitoa anë minlo bimgbëm, ndoan ai otsida ai sulfur bikui bò a anyu.

¹⁸ A mvus e bindëgëlë bi, ndò efas lala ya bod engamana wu hë a ndoan ai otsida ai sulfur ya bikui bò a anyu.

¹⁹ Amu ngul bikabëli enë bò a anyu ai a ngëm dzaban. Amu ngëm dzaban enë anë nyò, bëbëlë minlo, ete ngò babò abe.

²⁰ E bod bëvòg, a bandzëki wu a bindëgëlë bi, tègè vëṅan a bëbe mimboan baban, asu yë na të badugan lugu bësatan, ngë bëzamba bë mvòt, ngë e ba bë silba, ngë e ba bikye, ngë e ba mëkòg ngë ele, a babëlë ki ngul ya ayen, ngë awog, ngë awulu,

²¹ ndò fë bandzëki lum mvus a ṅwoan bod waban ai mëbiaṅ, tò a bisog, tò a wub waban.