Ekuli-mam 7 - MKPAMAṄ AMVOE Nouveau Testament en langue Ewondo 2012

Bod bë zitam: ntèd tòzin ai tòzin mëwom mënyii ai mënyii

¹ A mvus hala, ndò mayen benglès bënyii bëtëlë a mëbug më si mënyii, bëyëmë ai bivundu binyii ya si na të evundu yadzimbi tò si, tò maṅ, tò ele ziṅ ki.

² Ndò mëngayen englès mfë abëdë a mëkui më dzobo, abëlë zitam vëvëë Zamba, ndò angakòbò a yob ete ai e benglès bënyii bëngavë ngul na bëbò ai si ai maṅ a be,

³ nyè na: Të miabò tò si, tò maṅ tò ele abe, akëlë kui anë biayi fudi bësye bë Zamba waan ndëm a mvòm asu.

⁴ Ndò mëngawog taṅ e bod bëngabi ndëm, ntèd tòzin ai tòzin mëwom mënyi ai enyii, a nda-bod esë ya bòn bë Israel.

⁵ A nda Yuda, tòzin awom ai bëbè bëbii ndëm, a nda Ruben tòzin awom ai bëbè, a nda Gad tòzin awom ai bëbè,

⁶ a nda Asèr tòzin awom ai bëbè, a nda Neftalim tòzin awom ai bëbè, a nda Manase tòzin awom ai bëbè,

⁷ a nda Simeon tòzin awom ai bëbè, a nda Levi tòzin awom ai bëbè, a nda Isakar tòzin awom ai bëbè,

⁸ a nda Zabulon tòzin awom ai bëbè, a nda Yosef tòzin awom ai bëbè, a nda Benyamin tòzin awom ai bëbè bëbii e ndëm nyi.

Etitib bod ya minnam misë

⁹ A mvus hala, mëyënë mod nkunda, a mod ziṅan gabë ki dzam laṅ, a ayòṅ asë, ai mënda më bod, ai mëyom, ai minkòbò, bëtëlë a etoa-ati osu, bëtëlë fë man ntomba osu, bëbëgë mimfum biyie, bëbëlë mëlen a mò,

¹⁰ bëngakòbò a yob ete bò na: Akode abòò ai Zamba waan ya atoa a etoa-ati, fufulu ai man ntomba.

¹¹ E benglès bësë bëngabë bëtëlë etoa-ati ai minnom mi bod ai tsit enyii edinga a nyòl bëngalaban ai mësu a si a etoa-ati osu, bëngakogëlan ai Zamba,

¹² bò na: Amen, maa, ai duma ai fëg, ngaṅ ai olugu ai ngul ai fim bibòò ai Zamba waan a kòm ya kòm esë, Amen.

¹³ Ndò mbòg ya minnom mi mod adzo ai ma na: E bod bëbëgë mimfum mindzòmbò biyie ba mbò bënë bëza, ndò ki basò ve?

¹⁴ Ma ai nyè na: A Nti wama, wa wayëm dò. Nyè ai ma na: Mbò basò a mod ndzug eyëgan, ndò bëngamana sob biwòman biaban, bëmana bò na bifum a mëki më ntomba.

¹⁵ Asu te ndò bëtëlë a etoa-ati Zamba osu, bëluugu nyè ai alu, ai amos a tempel woe, e mod atoa a etoa-ati ayi tòbò ai bò.

¹⁶ Bayi ki dugan wog zie ngë ekode, tò ki na nlo-dzobo adzimbi bò, ngë ayoṅ ziṅ ki,

¹⁷ amu ntomba wakala bò a zaṅ etoa-ati, ndò fë ayi bò lëdë zen a etam mëndim më enyiṅ; Ndò fë Zamba ayi bò fimi bibëga bisë a mis.