Ekuli-mam 22 - MKPAMAṄ AMVOE Nouveau Testament en langue Ewondo 2012

¹ Ndò angalëdë ma osoe mëndim më enyiṅ, ofyè a ngen ngen ngen, okui a etoa-ati Zamba ai man ntomba.

² A zaṅ nnom ndzòṅ woe ai osoe, mfag hi ai mfag mbòg, ele enyiṅ ebye bibuma awom ai bibè, ewumu ebuma ngòn esë, kye bile etoa mëbala asu mëyòṅ.

³ Ekag yayi ki fë bò. Etoa-ati ai man ntomba yayi tòbò abë nyè, bësye boe bëngalugu nyè,

⁴ abog te bayi yen asu die, dzoe die atoa bò a mvòm-asu.

⁵ Alu layi ki fë bò, bayi ki fë yaṅan ai mfyè alamba ngë mfyè nlo-dzobo, amu Nti Zamba avë bò mfyè, ndò fë bayi dzoe anë minkukuma a bisëb bisëb.

Asò-lë Kristus

⁶ Nyè ai ma na: E bibug bi binë bibug bi afidi ai bibug bi bëbëla, ndò Nti Zamba minsisim bëprofèt alom englès woe na alëdë bësye boe e mam mayean vol bòban.

⁷ Yënë, mëngavol ya zu. Mvòm ai e nyò abaala bibug bi esye profèt ya e kalara nyò.

⁸ Mfag wama, ma Yohannes, mëngawog, mëyënë fë e mam ma. Ndò eyòṅ mëngawog, mëyënë fë, ndò mëngalaban a si na makogëlan a mëkol më englès ya angabë alëdëgë ma mam mëte.

⁹ Nyè ai ma na: Të wabò dò! Mabò esye te fufulu ai wa, ai babënyòṅ bëprofèt ai e ba babaala bibug ya e kalara nyò. Zamba ṅnyè olugu.

¹⁰ Nyè ai ma na: Të wafèd bibug ya e kalara nyò ai zitam, amu abog antoa ya babi.

¹¹ Mod nkòt akëlë ai nkòt osu, mod mvit akëlë ai mvit osu, mod sosoo abò sosoo hë mboan, mfufub odugan fububan.

¹² Yënë, mëngavol ya zu; mëbëlë maan mama a mavë mod osë anë mimboan mie minë.

¹³ Mënë Alfa ai Omega, e mod osu ai e mod mvua, mëtari ai mëmana.

¹⁴ Mvòm ai e ba basob biwòman biaban, asu yë na bëkyëbë ai ele enyiṅ, bënyian fë a mimbè a tisòn.

¹⁵ Bayi ligi a nsëṅ na: mvu, bod mëbiaṅ, bod bë ebamba, bëwoe bë bod, e ba balugu bëzamba, e nyò osë adiṅ minnal, abòò fë minnal.

¹⁶ Ma, Yesus, mëngalom mina englès wama ai mbòòlan hi asu mënda më Zamba. Ma mënë nkaṅ ai nda-bod David; mënë otitie kidi ya wafyè.

¹⁷ Nsisim ai nlugan mininga badzo na: Zaag. E mod awog adzo na: Zaag. E mod awog ekode azaag, e nyò adiṅ, anòṅò mëndim më enyiṅ a zëzë.

¹⁸ Mabeme e mod osë awog e bibug bi nkòbò profèt ya e kalara nyò. Ngë mod ziṅ ahë bag dzom ziṅ ete, Zamba nyè fë ayi bag e bindëgëlë ya binë ntilan e kalara nyò;

¹⁹ Ngë mod ziṅ ahë vaè ebug ziṅ ya e kalara nkòbò profèt nyò, Zamba ayi nyè vaè ngab a ele enyiṅ ai a mfufub tisòn a binë ntilan e kalara nyò.

²⁰ E nyò abòòlò e mam ma adzo na: Owe, vologo zu. Amen. Zaag, a Nti Yesus.

²¹ Maa Nti Yesus abòò ai mina bësë.