Ekuli-mam 21 - MKPAMAṄ AMVOE Nouveau Testament en langue Ewondo 2012

Mkpamaṅ yob ai mkpamaṅ si

¹ Ndò mëngayen mkpamaṅ yob ai mkpamaṅ si. Amu e yob osu ai e si osu bingamana lod, ndò fë maṅ masëki fë.

² Ndò mëngayen mfufub tisòn, mkpamaṅ Yerusalem, osòò a yob; Zamba angamana wò komëzan anë nlugan mininga onë ndzaman asu nnom woe.

³ Ndò mawog kiṅ esòò a etoa-ati na: Ebëm Zamba ai bod dzi, ayi tòbò ai bò, bayi bò bod boe, ndò fë Zamba emen ayi bò ai bò.

⁴ Ayi fimi bibëga bisë a mis maban, awu layi ki fë bò, tò mëyëb, tò ṅyon, tò tuṅ ziṅ, amu ebi bi osu bilod ya.

⁵ Ndò e mod angabë atoa a etoa-ati adzo na: Yënë, mabò byem bisë mimkpamaṅ, nyè na: Tilig, amu e bibug bi binë bëbëla, bitoa fë bibug bi afidi.

⁶ Nyè ai ma na: Abòban ya. Ma mënë Alfa ai Omega, mëtari ai mëmana. Ma mayi vë e mod awog ekode mëndim më etam, mëndim më enyiṅ a zëzë.

⁷ Zingi yayi nòṅ mam mëte anë ngab-elig; mayi bò Zamba woe, nyè fë abò ma mòn.

⁸ Mfag miṅwowòṅ a i e ba bayëbë ki, e ba babò bëbe bë mam, bëwoe bë bod, bod bë ebamba, bod mëbiaṅ ai e ba balugu bëzamba ai e ba bësë babò minnal, ngab dzaban enë etëtag yadig ndoan ai sulfur; awu bèè dili.

Mkpamaṅ Yerusalem

⁹ Ndò mbòg ya benglès zamgbal ya bëbëlë kòb enë ndzalan ai bindëgëlë bi mvua zamgbal angasò, nyè ai ma na: Zaag, mayi wa lëdë mininga alug man ntomba.

¹⁰ Ndò angabëgë ma a nsisim, a mod nkol atoa a yob, ndò angalëdë ma mfufub tisòn Yerusalem osòò a yob abë Zamba,

¹¹ obëlë duma Zamba, ofyè hë anë ngòg mòni, hë anë ngòg mëtabi, a ngen ngen ngen.

¹² Angabë abëlë mod mfim atoa a yob, abëlë mimbè awom ai mibè, benglès awom ai bëbè bëtoa a mimbè, moe mëtoa ntilan a mimbè, mënë moe mënda më bod awom ai mëbè më bòn bë Israel.

¹³ Mfag nlo-dzobo atye, mimbè milè, a akoe mimbè milè, a nkyè mimbè milè, mfa nlo-dzobo ayimbi mimbè milè.

¹⁴ Mfim obëlë tin mimfim awom ai ebè, moe awom ai mëbè më apostel awom ai bëbè; Moe mëte mëtoa ntilan ete.

¹⁵ E nyò angabë akòbògò ai ma angabë abëlë engëṅ mvòt, avëgë byem ete, asu yë na avëg tisòn ai mimbè mie, ai mfim woe.

¹⁶ Tisòn engabë nloṅan, abim ntye ndò ndam. Ndò angavëg tisòn ai engëṅ, mintye tòzin ai awom ai mibè, ntye, ndam ai ntye ya a yob binë dzam dëda.

¹⁷ Ndò angavëg mfim woe, bitun bi ntye ntèd ai mëwom mënyii ai mënyii, akyaè ya mod avëg, nala onë na englès ṅnyè avëg.

¹⁸ Mfim ongabë nkoman ai akòg yaspa, tisòn eben etoa mfaṅ mvòt, hë anë mfuban eyèt.

¹⁹ Tin mimfim mi tisòn nloṅan ai kan abëṅ mëkòg esë. E tin osu: yaspa; e nyi bèè: safir; e nyi lala: kalsedon; e nyi nyiina: maragda;

²⁰ e nyi tana: sardonik; e nyi samëna: sardion; e nyi zamgbala: akòg silba; e nyi mwomo: beril; e nyi ebulu: topaz; e nyi awomo: krizopas; e nyi awom ai dzia: yasint; e nyi awom ai bèè: ametis;

²¹ Mimbè awom ai mibè mingabë minsanga awom ai mibè, anë mbè otoa nkoman ai dis nsanga da; Nnom ndzòṅ tisòn angabë mfaṅ mvòt hë anë eyèt ya yayene.

²² Mandzëki yen tempel etere, amu Nti Zamba ngul mësë anë tempel woe ai mfaṅ ntomba fë.

²³ Ndò fë tisòn yayaṅan ki ai nlo-dzobo ngë ki na ngòn asu yë na bifyè nyè, amu duma Zamba lavë nyè mfyè, ndò fë man ntomba anë alamba die.

²⁴ Mëyòṅ mayi wulu a mfyè woe, minkukuma ya si miayi sò ai duma die abë nyè;

²⁵ bayi ki fèd mimbè mie ai amos, amu alu layi ki bò we;

²⁶ bayi sò ai duma, ai olugu mëyòṅ abë nyè.

²⁷ Dzom mvit ziṅ, ngë e mod osë abò mam më mvit, ngë mod minnal aanganyian ki ete, hë e ba bënë ntilan a kalara enyiṅ man ntomba mbò banyian we.