Ekuli-mam 20 - MKPAMAṄ AMVOE Nouveau Testament en langue Ewondo 2012

Tòzin mimbu

¹ Ndò mëngayen englès asòò a yob abële edibiga tolendoṅ ai byem mësuṅ a wò woe.

² Ndò angavë ngaṅ-mëdzaa mò, nnomo nyò, ṅnyè anë Satan, ndò angafaṅ nyè ngadag a taṅ tòzin bisëb,

³ awoa nyè a tolendoṅ, abudi ai zitam asu yë na të abada kë ai mëyòṅ a ndimi akëlë kui anë tòzin mimbu yatoban. A mvus hala, bayean nyè tii man etun abog.

⁴ Ndò mëngayen bitoa bi ati, bod bëtoa ete, a bëngavë bò nkat, ai minsisim mi e bod bëngatsig minlo asu mbòòlan ya babòòlò Yesus ai asu ebug Zamba; Bò bandzëki lugu tsit afan ngë evëgëlë dzie, ndò fë bandzëki nòṅ ndëm a mvòm-asu dzaban ngë a wò waban. Ndò bënganyiṅ, bëdzoe ai Kristus anë minkukuma a taṅ tòzin bisëb.

⁵ E bëwu bëvòg bandzëki nyiṅ a këlë kui anë tòzin bisëb yatoban. Akui-lë sòṅ osu dili;

⁶ e mod abëlë ngab a akui-lë sòṅ osu anë mvòm, atoa fë mfufub. Awu bèè abëlë ngul a nyòl dzaban, dzam da bayi bò bëfada bë Zamba ai Kristus, ndò fë bayi dzoe anë minkukuma ai nyè tòzin bisëb.

Satan atëgëban

⁷ Eyòṅ tòzin bisëb bimana ya, bayi tii Satan a mbog woe,

⁸ abog te ayi kui, akë adug mëyòṅ a mëbug më si mënyii, Gog ai Magog, angakoan bò asu bita. Taṅ dzaban enë anë nsëlëg ya maṅ.

⁹ Ndò bëngabed a mbama dzal, bëloṅo nkunda bëzimbi mimfufub ai ndindiṅ tisòn edinga a nyòl, ndò ndoan engasò a yob, emana bò digi.

¹⁰ Ndò e Satan angadug bò angawoaban a etëtag ndoan ai sulfur e hom tsit afan ai profèt minnal bënë, bëngatibili bò tò ai alu, tò ai amos a bisëb bisëb.

Batsig ntol a mod mfum etoa-ati

¹¹ Ndò mëngayen mod etoa-ati afumu, ai e mod angabë atoa ete, si ai yob bingatub nyè, tègè yen hom mfë asu daban.

¹² Ndò mëngayen mimbim, tò bòngò tò bënyia-bodo, bëtëlë etoa-ati osu. Ndò bëkalara bëngayaaban, ndò fë kalara mfë angayaaban, ṅnyè anë kalara enyiṅ, ndò bëngatsig bëwu ntol ai e mam mëngabë ntilan a bëkalara, akyaè ya mimboan miaban mingabë.

¹³ Ndò ma mëngavë e mimbim mingabë ete, ndò awu ai tolendoṅ bingavë e mimbim mingabë abë bò, ndò mod osë angatsigban ntol akyaè ya mimboan mie.

¹⁴ Ndò awu ai tolendoṅ bingawoaban a etëtag ndoan. Awu bèè dili: etëtag ndoan.

¹⁵ Ngë bandzëki kòb mod atoa ntilan a kalara enyiṅ, bawoa nyè a etëtag ndoan.