Ekuli-mam 2 - MKPAMAṄ AMVOE Nouveau Testament en langue Ewondo 2012

Mbanda asu Efesi

¹ Tili englès ya nda-Zamba ya Efesi na: E mod abëlë atitie zamgbal a mbo-nnomo woe akòbò e mam ma, ṅnyè awulu a zaṅ bitelëge mëlamba bi mvòt zamgbal.

² Mayëm mimboan mie, ai tuṅ dzoe ai azombo doe, ai na wadzibi ki e bod bënë abe, ndò fë ongakyègè e bod badzo na bënë apostel, ndë bò basëki apostel, ndò ongayen na bënë bod minnal.

³ Onë fin, ongazombo mindzug asu dama, ndò waandzëki ku sòm.

⁴ Dzam da, mawog ai wa olun na ongadzoge ediṅ ongabë obëlë osusua a si.

⁵ Tsogo hm e hom ongaku mbëg, ovëṅan, obò e mimboan mi osu. Ngë tegè ai nala, mayi sò abë wa, mëvaè etëlëge alamba dzoe e hom yakad tëbë, ngë waandzëki tsende enyiṅ.

⁶ Dzam da, wabò mbëṅ na, wafëm mimboan mi bod bë Nikolas ya mamen mafëm.

⁷ E mod abëlë mëlò, awogo e dzam Nsisim wadzo ai mënda më Zamba. E mod ayi kui zingi, mayi nyè vë ngul ya adi ebuma ya ele enyiṅ, a etëlë a Paradis Zamba.

Mbanda asu Smirna

⁸ Otili hm englès ya nda-Zamba ya Smirna na: E mam ma mmò e mod osu ai mod mvua akòbò. Ṅnyè angabë ṅwuan, ndò fë angabi enyiṅ.

⁹ Mayëm ndzug woe ai mëbua moe, dzam da onë nkukuma, mayëm mgbalan e bod badzo na bënë Yuden bamgbali wa, ndë basëki Yuden. Bënë ekoan Satan.

¹⁰ Të hm wambara e mam wayi dzugi. Satan ayi woa bod bëvòg ya abë mina a mbog, asu yë na mibi mëbobëla, ndò miayi bi ndzug mëlu awom. Bòò mod-afidi, akëlë kui a awu, mëvë wa ekadi-duma enyiṅ.

¹¹ E mod abële mëlò awogo e dzam nsisim wadzo ai mënda më Zamba. E mod anë zingi aangabi ki nkat ya awu bèè.

Mbanda asu Pergama

¹² Tili englès ya nda-Zamba ya Pergama na: e mod abëlë nyamëla okëṅ yavol, a enë minkòṅ mibè, adzo e mam ma na:

¹³ Mayëm e hom otoa, awe ngò etoa-ati Satan enë, dzam da ndò walad ai dzoe dama, ndò fë waandzëki sie na wayëbë ma, tò ben a mëlu më Antipas, mbòòlò wama, mod-afidi wama, a bëngawoe a tisòn dzaan, e hom Satan anyiṅ.

¹⁴ Hë da, mawog olun ai wa ai ban mam, amu onë ai e bod bayëbë ayëgëlë Balaam, nyè angayëgëlë Balak na asogolo bòn bë Israel na bëdi tsit ya bëngatuni bëzëzë bëzamba, ai na bëbò bisog.

¹⁵ Nala ngò fë waanyiṅ fufulu ai e bod bayëbe ayëgëlë bod bë Nikolas.

¹⁶ Tsendëge hm enyiṅ. Ngë tègè ai nala, mayi sò abë wa avol, mëzu luman ai bò ai nyamëla okëṅ ya anyu dama.

¹⁷ E nyò abëlë mëlò, awogo e dzam Nsisim wakad mënda më Zamba. Mayi vë zingi e manna asòlò, mayi fë nyè vë man ngòg afumu, mkpamaṅ dzoe ya mod ziṅ mfë ayëm ki, sësala hë e nyò anòṅ dzò, atoa ntilan a man ngòg te.

Mbanda asu Tiatira

¹⁸ Tili englès ya nda-Zamba ya Tiatira na: E mam ma mmò mòn Zamba akòbò; ṅnyè abëlë mis anë nkabag ndoan, ndò fë mëkol moe mënë anë ekye yasò a mbuṅ ndoan.

¹⁹ Mayëm mimboan mie ai ediṅ, ai ṅyëbe, ai esye, ai fin dzoe, ndò fë mimboan mi mvua mie mialod e mi mi osu.

²⁰ Dzam da, mawog olun ai wa na wadzoge e mininga anë dzoe na Yezabel, a adzo na anë profèt, ayëgëlë, akëlë fë ai bësye bama a ndimi, bëngabò bisog, bëdzaa e tsit bëngatuni bëzamba.

²¹ Ndò mavë ya nyè abog na atsende enyiṅ, ndò ayi ki na avëṅan a bisog bie.

²² Mazu hm nyè lum okòn a enòṅ, mëbò fë na e bod bandaman alug ai nyè bëbi abui mindzug, ngë bandzëki tsende a mimboan mi mininga te,

²³ mayi fë woe bòn boe mfaṅ a wu. Abog te mënda më Zamba mësë mayi yëm na mamen matsas miṅyian ai minnëm, ndò fë mayi vë mina bësë, anë mod akyaè mimboan mie.

²⁴ E mina bëvòg ya Tiatira, a mibëlë ki ayëgëlë di, a miayëm ki ndimba mam më Satan anë badzo, mina makòbò ai bò: Mabag ki mina mbëgë mfë,

²⁵ hë na e dzi ya mimbëlë ya, baalan dzò akëlë kui anë mayi sò.

²⁶ E mod anë zingi, e nyò abaala mimboan miama akui a mëmana, mayi nyè vë edzoe a mëyòṅ,

²⁷ ayi bò dzoe ai ntum ekye, anë eyòṅ bisoa bi ekòn biabole,

²⁸ akyaè ya mamen mënganòṅ abë tara, ndò mayi nyè vë otitie kidi.

²⁹ E nyò abëlë mëlò, awogo e dzam Nsisim wakad mënda më Zamba.