Ekuli-mam 18 - MKPAMAṄ AMVOE Nouveau Testament en langue Ewondo 2012

Babilon aku a si

¹ A mvus te, ndò mëngayen englès mfë asòò a yob, atoa ngul abui, si engafyè ai duma die.

² Ndò angabam ai ngul esë na: Aku ya, Babilon nen aku ya, ndò fë avëṅan ya mvog bësatan, mbog nsisim mvit osë, ai mbog onòn mvit osë, ai mbog mvit tsit esë a bavini nnëm,

³ amu mëyòṅ mësë mënganyu wayn ngoṅ bisog dzie, minkukuma ya si mibò bisog ai nyè, bod bë makit ya si bëmana big a ngul ya enyiṅ akuma dzie.

⁴ Ndò mëngawog kiṅ fë esòò a yob na: A ayòṅ dama, kui a nsëṅ abë nyè, asu yë na ozaa bi ngab a minsëm mie, ai na ozaa bi ngab a bindëgëlë bie.

⁵ Amu minsëm mie mimana ya koan akëlë kui a yob, ndò fë Zamba adugan ya tsog nkòt woe.

⁶ Dugan nyè anë angabò mina, miyaan ai nyè biyòṅ bibè asu mimboan mie, e kòb ya angabaman mënyu, baman dzò asu die biyòṅ bibè;

⁷ Akyaè angalugu emen, anyiṅi fë enyiṅ endaman, vaan nyè endëgëlë ai mëlunga. Amu adzo a nnëm woe na: Mëtoa ha, mënë nkukuma, masëki nkus, maangayen ki mëlunga.

⁸ Asu te bindëgëlë bie biayi sò hë amos mbòg, awu ai mëlunga ai zie; ayi dig a ndoan, amu e nyò atsig nyè ntol anë ngungul Nti Zamba.

⁹ E minkukuma mibòò bisog ai nyè, minyiṅi fë enyiṅ endaman ai nyè miayi nyè yon, mintoa fë a mëlunga, eyòṅ bayi yen otsida ya mbol adig,

¹⁰ bëtëlë oyab nali ai e wòṅ bambara endëgëlë dzie bò na: Amala, amala, a mod tisòn, a Babilon, ngungul tisòn, amu nkat woe osò hë a nguma awola.

¹¹ Bod bë makit ya si bayon, bëbëgë mëyëb asu die, amu tò mod ziṅ akus ki fë byem biaban,

¹² makit më mvòt ai silba ai ngòg mòni, ai minsanga, ai bifus biyie, ai biyie biavie, ai silik, ai biyie bivëlë, ai bile bisë bianyum mbëṅ, ai byem bisë binë nkoman ai mimbaṅ mi zòg, byem bakom ai bile bi mòni, byem bikye, byem bi ngòg mòni,

¹³ bikidëga kan kan, otu, mbòn alobinda, mbòn waanyum mbëṅ, wayn, mbòn badi, ovug, oles, ozele, mintomba, bikabëli, tò bikalig, tò bëlò, bod bisye.

¹⁴ Ebuma ya nnëm woe ongabë oyii du ekë ya wa, enyiṅ endaman ai miṅyene bidzaṅ ya wa, biayi ki dugan yene.

¹⁵ Bod bë makit ya bëkuan ai e byem bi, a bëngamana big ete, bayi tëbë oyab ai e wòṅ bambara endëgëlë dzie, bëyono, bëbëgë mëyëb,

¹⁶ bò na: Amala, amala, tisòn nen ya engabë mbòdan efus eyie ai eyie yavie, ai evëlë eyie, etoa ndzaman ai mvòt, ai ngòg mòni, ai minsanga,

¹⁷ amu akuma asë di amana dzaṅ hë a awola dëda. Abog te bëkomo bëtitima, e bod bawulu a maṅ maṅ, e bod basye a titima ai e ba bësë basye a maṅ, bëngatëbë oyab,

¹⁸ bëngabam eyòṅ bayen otsida ya mbol adig, bò na: Tisòn fe engabë evëgan ai tisòn nen?

¹⁹ Bëngakub mbulug a minlo miaban, bëbama, bëyono, bëtoa a mëyëb, bò na: Amala, amala, tisòn nen, ya e bod bësë bëbëlë bëtitima bëngamana big a akuma die, amana dzaṅ hë a awola dëda!

²⁰ Taan a nyòl dzie, a yob, mina mimfufub ai apostel ai bëprofèt, amu Zamba akun mina ai nkat abò nyè.

²¹ Ndò ngungul englès mbòg ongabede ngòg hë anë e nyi batsag bidi ete, awoa a maṅ, nyè na: Na ngò Babilon, tisòn nen, ayi woaban ai fim, baangayen ki fë nyè.

²² Baangabad ki fë wog kiṅ bëbomo bë mvèt ai bëbomo mëzik, ai bëbomo mindi, ai bëlòṅò bë tòṅ abë wa, bëngabad ki fë bò esye akëṅ ziṅ abë wa, tègè fë wog eduṅ nsina ekòg-ovug,

²³ mfyè alamba të fë bad fyè abë wa, të fë wog kiṅ bëlug abë wa, amu bod bë makit boe bëngabë mimfaṅ mi bod ya si, amu mëyòṅ mësë mëngakë a ndimi ai mëbiaṅ moe,

²⁴ ndò fë bëngakòb mëki bëprofèt ai mimfufub abë wa, ai mëki më e bod bësë bëngawoe a si.