Ekuli-mam 17 - MKPAMAṄ AMVOE Nouveau Testament en langue Ewondo 2012

Mininga ebamba nen ban tsit afan

¹ Ndò mbòg ya e benglès bëngabë bëbëlë kòb zamgbal angasò, ndò adzo ai ma na: Zaag, mayi wa lëdë nkat mininga ebamba nen ya atoa a abui mëndim a yob,

² ṅnyè minkukuma ya si mingabò bisog ai nyè, e bod bëtoa a si bëngasòg ai nyè mëyòg më ebamba dzie,

³ ndò angakë ai ma a nkod-nnam a nsisim. Ndò mëngayen mininga atoa a evëlë tsit a yob, atoa ndzalan ai moe më ebyandi, abëlë minlo zamgbal ai tòṅ awom.

⁴ Mininga angabë abëgë eyie eviege, etoa evëlë, atoa ndzaman ai mvòt, ai minsanga mi mòni, ai minsanga, abëlë kòb mvòt a wò woe, kòb etoa ndzalan ai mam më osòn, ai mam më mvit më enyiṅ ebamba dzie.

⁵ Ndò dzoe angabë nyè ntilan a mvòm-asu, ndimba, Babilon nen, nyia bininga bë ebamba ai mam më mvit ya si-ndon.

⁶ Ndò mëngayen mininga asògò mëki mimfufub ai mëki bëbòòlò bë Yesus. Ayen mëngayen nyè, ndò mëngakam eyëgan.

⁷ Ndò englès adzo ai ma na: Asu dze ohë kam? Ma, mayi wa kad ndimba mininga ai e tsit afan ebëgë nyè, a ebëlë minlo zamgbal ai tòṅ awom.

⁸ E tsit afan ohë yen, a ehë bë, yasëki fë, yayi sò a tolendoṅ, ekëlë a ndzaṅ. E bod bëtoa a si bayi kam, mbò dzoe daban andzëki tilban a kalara, atarigi a akomo-lë yob ai si, bëyënë tsit afan, amu engabë, ndò yasëki fë, ndò fë enë;

⁹ E di anë asu nlo obëlë fëg. Minlo zamgbal minë minkol zamgbal a mininga atoa etere. Minë fë minkukuma zamgbal.

¹⁰ Mitan miku ya. Mbòg anë, e nyò mbòg abë ki sò, ndò fë eyòṅ ayi sò, ayean tòbò hë man etun.

¹¹ E tsit engabë, a yasëki fë, endzò enë e nyi mwomo, etoa fë a taṅ e nyi zamgbal nyi, ndò yakë a ndzaṅ.

¹² Ndò e tòṅ awom ohë yen enë minkukuma awom, mbò babë ki nòṅ edzoe, dzam da bayi bi edzoe nkukuma a taṅ nguma awola fufulu ai tsit afan.

¹³ Bënë nnëm mbòg mbòg, ndò bavë tsit afan ngul ai edzoe dzaban.

¹⁴ Mbò bayi luman ai ntomba, ndò ntomba wayi bò tègè, amu anë Nti bëti ai nkukuma minkukuma, e bod bënë ai nyè fufulu bëtoa nloan, ntòban, bëtoa bod bë afidi.

¹⁵ Ndò adzo ai ma na: E mëndim ohë yen, e hom mininga ebamba atoa, mënë mvog ai minkunda ai mëyòṅ, ai minkòbò.

¹⁶ E tòṅ awom ya ohë yen ai tsit afan mbò bayi siṅ mininga ebamba, bayi nyè lig ekudi, ai nsò, bëngadi minson mie, bayi nyè digi a ndoan.

¹⁷ Amu Zamba angafudi bò a minnëm na bëdzala ṅyian woe, bëtoa nnëm mbòg mbòg ai na bëvë tsit afan edzoe dzaban, akëlë kui anë bibug bi Zamba biatoban.

¹⁸ E mininga ki ohë yen, anë tisòn nen ya ebëlë edzoe bidzoe ya si-ndon.