Ekuli-mam 15 - MKPAMAṄ AMVOE Nouveau Testament en langue Ewondo 2012

Benglès ai bindëgëlë bi mvua

¹ Ndò mëngayen mod eyëgan ndëm fë a yob: benglès zamgbal bëbëlë e bindëgëlë bi mvua zamgbal, amu olun Zamba ongadzie abë bò.

² Ndò mayen hë anë maṅ më eyèt, mbaman ai ndoan. E bod bëngatègè tsit afan ai evëgëlë dzie, ai nòmbò woe, ai dzoe die, bëtëlë a maṅ më eyèt, bëbëlë mëmvèt më Zamba.

³ Bëyiègè dzia Moses, mbò-esye Zamba, ai dzia ntomba, bò na: Mimboan mie minë anen, minë adzo minkamaṅ, a Nti Zamba ngul mëse. Mëzen moe mënë sosoo ai bëbëla, a nkukuma mëyòṅ.

⁴ Za ayi wa bò të mbara, alugu fë dzoe doe? Amu wa etam onë mfufub, amu mëyòṅ mësë mayi sò, mëngalugu a mis moe, amu mimboan mi sosoo mie miayi kui a ngëëṅ.

⁵ A mvus hala, ndò mëngayen anë tempel Emëm-ṅyëbë ayaaban a yob,

⁶ ndò benglès zamgbal ya bëbëlë bindëgëlë bëngakui a tempel a nsëṅ, bëbëgë efus eyie etoa mfuban, efumu anë ten, bëbëgë bëkanda bë mvòt a nkug.

⁷ Ndò tsit dzia ya tsit enyii yavë benglès zamgbal kòb mvòt zamgbal, etoa ndzalan ai olun Zamba ya avëë a bisëb bisëb.

⁸ Ndò tempel angadzie ai otsida wasò a duma Zamba ai a ngul dzie, ndò mod ziṅan dzëki bi ngul ya anyian a tempel akëlë kui anë bindëgëlë zamgbal ya benglès zamgbal bëbëlë, biamana toban.