Ekuli-mam 12 - MKPAMAṄ AMVOE Nouveau Testament en langue Ewondo 2012

Mininga ban ngaṅ -mëdzaa

¹ Ndò mod ndëm angayene a yob: mininga abëgë nlo-dzobo a nyòl, ngòn etoa nyè a mëkol a si, a nlo woe, abëgë ekadi atitie awom ai abè,

² atoa abum, angatad ai mintye mi nkogolo, asaṅan na ayi bye.

³ Ndò ndëm fë engayene a yob: mod ngaṅ-mëdzaa aviege, abëlë minlo zamgbal ai tòṅ awom, abëlë fë mintom mi nkukuma a minlo zamgbal mi,

⁴ ngëm dzie engavoe efas lala ya atitie ya yob, awoa dò a si. Ndò e ngaṅ-mëdzaa nyò angatëbë e mininga ayigi bye nyò osu, asu yë na, ṅnyie anë abye, amana nyè di mòn.

⁵ Ndò angabye mòn fam; ṅnyè ayi dzoe mëyòṅ mësë ai ntum ekye; Ndò bënganòṅ e mòn nyò, bëkëlë ai nyè abë Zamba ai a etoa-ati dzie.

⁶ Ndò mininga angatub a nkod-nnam, awe ngò abëlë afola ya Zamba angakomëzan nyè, asu yë na bëtòṅ nyè we mëlu tòzin ai mintèd mibè ai mëwom mësaman.

⁷ Ndò bita bingabò a yob; Mikael ai benglès boe bëngayidan ai e mod ngaṅ-mëdzaa nyò. E ngaṅ-mëdzaa nyò ai benglès boe bëngayidan,

⁸ ndò bëngatègè bò, tègè fë ai afola asu daban a yob.

⁹ Ndò bëngawoe e ngaṅ-mëdzaa nyò, mod nnomo nyò, ṅnyè baloe na Satan, ṅnyè adug si-ndon esë, ndò bëngawoa nyè a si, ndò fë bëngawoa benglès boe fufulu ai nyè a si.

¹⁰ Ndò mëngawog mod kiṅa yob adzoo na: Etoa dzi, akode ai ngul ai edzoe Zamba waan ai fim Kristus woe bisò ya, amu e mod angabë asòman babëdzaṅa woaban ya a si, e nyò angabë asòman bò a mis më Zamba waan ai alu ai amos.

¹¹ Ndò bëngatègè nyè asu mëki më ntomba ai asu ebug mbòòlan dzaban, ndò bandzëki diṅ enyiṅ dzaban akui a awu.

¹² Asu te fonan, mina yob ai e bod mitoa ete; Amala ai si, ai maṅ, amu e Satan asus abë mina anë mfaman abui, mbol ayëm na abog anë nyè etun.

¹³ Eyòṅ ngaṅ-mëdzaa angayen na bëwoa ya nyè a si, angatoṅ e mininga angabye mòn fam nyò.

¹⁴ Ndò bëngavë mininga mëfab mëbè më e ndoe yanen abui, asu yë na ayële, atub e nyò nyi a nkod-nnam, a etòbògò dzie, awe ngò batòṅ nyè nguma abog, ai mëbog ai etun abog.

¹⁵ Ndò nyò engayo mëndim hë anë osoe a anyu die na yatoṅ mininga, asu yë na osoe okë ai nyè.

¹⁶ Ndò si engavòli mininga, si eyaa anyu die, ndò yamana min osoe ya ngaṅ-mëdzaa angayo a anyu die.

¹⁷ Ndò ngaṅ-mëdzaa angafam ai mininga, angakë na akë luman ai e bòn boe bëvòg ya babaala mëbende më Zamba, bëbëlë fë mbòòlan Yesus.

¹⁸ Ndò angatëbë a nsëlëg ya maṅ.