Ekuli-mam 11 - MKPAMAṄ AMVOE Nouveau Testament en langue Ewondo 2012

Bëwusnèt bëbè

¹ Ndò bëngavë ma engëṅ etoa hë anë ntum, bò na: Tëbëge, ovëg tempel Zamba ai alatar ai e bod bakogëlan ete.

² Dzoge mfag abaa ya nsëṅ tempel, të wavëg wò, amu anë asu bëhaiden, ndò fë bayi wulu a mfufub tisòn a yob ngòn mëwom mënyii ai ebè.

³ Mayi tele bëbòòlò bama bëbè, bayi bò esye bëprofèt a taṅ mëlu tòzin ai mintèd mibè ai mëwom mësaman, bëbëgë minkut a nyòl.

⁴ Mbò bënë bile bi mbòn bibè ai bitelëge mëlamba bibè ya bitëlë Nti si-ndon osu.

⁵ Ndò ngë mod ziṅ ayi na abò bò abe, ndoan yayi bò kui a anyu, emana digi minziziṅ miaban. Ndò ngë mod ziṅ ayi na abò bò abe, nala ngò ayean wu.

⁶ Bò bëbëlë ngul ya afèd yob, na të mvëṅ yanòṅ a mëmos babò esye profèt dzaban, bëbëlë fë ngul ya abò na mëndim mëvëṅan mëki, ai abò na si eyen bidim e taṅ esë bayi.

⁷ Eyòṅ hm bayi mana mbòòlan waban, e tsit afan yasò a tolendoṅ yayi bò ndum ai bò, ewoe bò.

⁸ Bayi dzoge mimbim miaban a mbam nsëṅ mod tisòn; tisòn te ndzò baloe a mvulna na Sodoma ai Egipten, e hom Nti waban angabomban a klos.

⁹ Mëlu mëlu mëlè ai etun, bod ya mëyom ai mënda më bod, ai minkòbò ai mëyòṅ, bayen mimbim miaban, tègè ṅyëbë na bëboe mimbim miaban a sòṅ.

¹⁰ E bod bëtoa a si bayi tag a nyòl dzaban, bëngafon, bëvaan bò a bò bifaè, amu bëprofet bëbè bëte bëngatibili bod ya bëtoa a si.

¹¹ Abog te, a mvus mëlu mëlè ai etun, nsisim enyiṅ ya abë Zamba onganyian abë bò, bëngatëbë bëtëtëlë, abog te e bod bëngayen bëngakòn wòṅ eyëgan.

¹² Eyòṅ te bëngawog mod kiṅa sòò a yob adzoo ai bò na: Bedan mu. Ndò bëngabed a yob a nkut, minziziṅ miaban mibëbëgë bò.

¹³ Awola te ben, ndò si engatigëdan eyëgan, efas lala ya tisòn ekuu a si, ndò bod tòzin zamgbal bëngawu a si etigëdan ha, e bod bëvòg bëntoa a mësis ete, bëngavë Zamba ya yob duma.

¹⁴ Bidim bi bèè bilod ya. Yënë sik, bidim bi lala bili biazu avol.

E tòṅ zamgbala

¹⁵ Ndò englès zamgbala angalòṅ tòṅ. Ndò kiṅ engasò abui a yob na: Edzoe si-ndon ebò ya edzoe Nti waan ai Kristus woe, ayi dzoe a bisëb bisëb.

¹⁶ Ndò e minnom mi bod mintèd minyii mitoa Zamba osu a bitoa bi ati biaban bëngalaban ai mësu maban a si, bëngakogëlan ai Zamba,

¹⁷ bò na: Biavë wa ngaṅ, a Nti Zamba ngul mësë, wa ya onë, wa ya ongabë, amu onganòṅ mod ngul woe, ndò fë ongadzoe.

¹⁸ Ndò mëyòṅ mëngafam, olun woe osòòg, ai abog ya bëwu babëlë nkat, ai na wavë bëbò bisye boe bëprofèt maan, ovaa fë mimfufub ai e bod bambara dzoe doe maan, tò bòngò tò bënyia-bodo, ai na waandaman e bod bandaman si.

¹⁹ Ndò e tempel Zamba anë a yob angayaaban, arka elad-amvoe woe angayene a tempel woe, antoa ha ai zeyaṅ ai biduṅ, ai nkulu, si etigëdan, ai abui mëtaag.