Ekuli-mam 1 - MKPAMAṄ AMVOE Nouveau Testament en langue Ewondo 2012

Mëtari ai mësugan

¹ Ekuli-mam Yesus Kristus ya Zamba angavë nyè na alëdë bësye boe: e mam mëngayi ya bòban, abò na mëyëmban ai nloman angalom englès woe abë etuga dzie Yesus.

² Ṅnyè abòòlò e mam mësë angayen na mënë ebug Zamba ai mbòòlan Yesus Kristus.

³ Mvòm ai e mod alaṅ, ai e bod fë bawog bibug bi nkòbò-profèt, bënyiege fë e mam mënë ntilan ete. Amu abog antoa ya babi.

⁴ Ma Yohannes, matil mënda më Zamba zamgbal ya mënë a Azia. Maa ai mvoè bibòò ai mina, a biatye abë e nyò anë, a angabë, ndò fë ayi sò, bityege fë a minsisim zamgbal ya mitëlë a etoa-ati dzie osu,

⁵ ai abë Yesus Kristus, wusnèt, mod-afidi, ntol bëwu ai ndzoe minkukuma ya si. E mod angadiṅ mina, atii mina a minsëm mian ai mëki moe,

⁶ abòò na mibò nguma edzoe, bëfada asu Zamba ai esya woe, duma ai ngul bibòò ai nyè a bisëb bisëb. Amen.

⁷ Yënë sik, azu ai minkut, ndò dis asë layi nyè yen, tò ben e ba bëngatubulu nyè; abog te mëyòṅ mësë ya si mayi nyè yëb. Owe, amen.

⁸ Ma mënë Alfa ai Omega, Nti Zamba ṅnyè adzo nala, e nyò anë, e nyò angabë, e nyò azu, Ngul-mëse.

Yesus ayene

⁹ Mamen Yohannes, manyaṅ waan, a mëngabi ngab fufulu ai mina a mindzug ai a edzoe, ai a azombo abë Yesus, mëngabë a elon baloe na Patmos, etòm ebug Zamba ai mbòòlan ya mabòòlò Yesus.

¹⁰ Mëngabë anë a biyëyëm, Nsisim obëlë ma, a amos Nti, ndò mëngawog mod kiṅa mvus dzama anë kiṅ tòṅ,

¹¹ na: Tili e dzam wayen a kalara, olom mënda më Zamba zamgbal a Efesi, a Smirna, a Pergamom, a Tiatira, a Sarda, a Filadelfia ai a Laodisea.

¹² Ndò mëngakilan na mayen e kiṅ engabë ekòbògò ai ma; a makilan na, mëntala bitelëge mëlamba bi mvòt zamgbal,

¹³ a zaṅ bitelëge mëlamba, hë anë mòn mod abëgë edud, abëgë kanda mvòt a angëdëg.

¹⁴ Nlo woe ai mfum esil bingabë anë ten, mis moe mëngabë anë nkabag ndoan,

¹⁵ mëkol moe mëngabë anë ekye yasò a mbuṅ ndoan, kiṅ dzie hë anë kiṅ minsum mëndim,

¹⁶ angabë abëlë atitie zamgbal a wò mbo-nnomo, mod nyamëla okëṅ avolo, atoa minkòṅ mibè akui nyè a anyu, asu die atoa anë eyòṅ nlo-dzobo afyè a ngumaa.

¹⁷ Ayen mëngayen nyè, ndò mëngaku nyè a mëkol anë mbim, ndò abede ma wò mbo-nnomo a nyòl, nyè na: Të wambara. Ma mënë e mod osu ai e mod mvua,

¹⁸ e mod avëë, mëngabë ṅwuan, dzam da yënë, mëvëë a bisëb bisëb, ndò fë mëbëlë bidibiga ya awu ai e bi ya Hades.

¹⁹ Tili hm e mam ohë yen, e mam mënë ai e ma mayi bòòban a mvus e ma.

²⁰ Ndimba atitie zamgbal ya ohë yen a wò mbo-nnomo wama ai bitelëge mëlamba bi mvòt zamgbal. Atitie zamgbal anë benglès mënda më Zamba zamgbal, ndò bitelëge mëlamba binë mënda më Zamba zamgbal.