Ebrea 6 - MKPAMAṄ AMVOE Nouveau Testament en langue Ewondo 2012

¹ Asu te, ntaman dzoge e mam ya mëtari a mabëbë Kristus, bikë a e mam mëwon ya, tègè fë ai na biadugan tele tin mfim asu ntsendan enyiṅ, a mimboan ya minë ṅwuan, ai asu ṅyëbë biayëbë Zamba,

² ai asu dòkten, asu mëwòbò, mbëdan mò, akui-lë sòṅ bëwu ai nkat mvua.

³ Biayi hm dò bò ngë Zamba ayëbë.

⁴ Amu lasëki dzam bòban na e bod ya mfyè ongafyè ya eyòṅ dzia, bëyëmë fë efaè ya yob, bëbii fë ngab abë Mfufub Nsisim,

⁵ a bëngayëm ya abë ebug Zamba ai ngul ya enyiṅ yazu,

⁶ ngë bod bëte bëhë sie ṅyëbë, na bëdugan bò na bod bëte bëkèè ai ntsendan enyiṅ, amu nala onë na badugan bomë mòn Zamba a klos asu daban, bëngakub nyè osòn a nlo.

⁷ Amu e si yanyu mëndim më mvëṅ ya makad ku ete, engabye e bibëbëga binë ai e bod babè biè mfi, si te ebëlë ngab a nsalan Zamba.

⁸ Ngë ebò hm na biyò ai sas binaṅ, yasëki ai mfi, ndò fë bayi dzò yòg; mëmana moe mënë hë ndoan.

⁹ A babëdzaṅ, mfag ya abë mina, biayëm mbëṅ mbëṅ e mam mënë mbëṅ asu akode, tò anë biakòbò akyaè di.

¹⁰ Amu Zamba asëki abim nkòt te na akë voan esye dzaan, ai ediṅ mingalëdë asu die, mbol mingasye mimfufub ndò fë mingënë misye bò.

¹¹ Amu biayi du na mod osë ya abë mina alëdë osësa ya abi afidi daan akui a mëmana,

¹² asu yë na të miabò ndzëm, dzam da, na mibie mvulna e bod banòṅ ngab-elig a ngaga asu ṅyëbë waban ai afu-nnëm.

Mfaṅ ngaga Zamba

¹³ Amu Zamba angakag Abraham, ndò hm mbol angabë bëlë ki e mod alodo nyè na akani sòṅ a bë nyè, ndò angakani sòṅ a bë nyè emen

¹⁴ nyè na: Bëbëla emen, mayi fò wa kub nsalan, mëbò fë na obye abui bod.

¹⁵ Nala ngò hm angabò fin, ndò angabëlë ngaga.

¹⁶ Amu bod bakani sòṅ a dzoe e mod alod bò, ndò eyòṅ esë badoan, nkanan sòṅ ngò wabòòlò mësë.

¹⁷ Ndò hm, mbol Zamba angabë ayii na alëdë bòn bë elig na ngaga yayi ki tsende, ndò hm angakani sòṅ ete,

¹⁸ asu yë na, asu mam mëbè ya matsende ki, a Zamba asëki dzam kad evus ete, na e bia ya bingabë sòbò abë nyè, bibi mfaṅ a wonòṅ ya ayëm a kpiim ai afidi ya adzogo bia osu di.

¹⁹ Bibëlë afidi te anë mfaṅ ekye mal; enë ngul asu nnëm, afidi ya lanyian a etun-nda Zamba ya a nnëm ete, a mvus tende,

²⁰ mfag ya Yesus angakë bia mbil osu, anyian, abò fada-nen a kòm ya kòm a nkoṅ Melkisedek.