1Tim 3 - MKPAMAṄ AMVOE Nouveau Testament en langue Ewondo 2012

¹ Ebug enë bëbëla Ngë mod ayi na abed bisòb, atoṅ fò mbëmbë dzam.

Etye bëbisòb

² Bisòb ayean hm bò e mod anë të ai akalëga, abëlëgë hë mininga mbòg mbòg, tègè nyu mëyòg, abindigi mam, atoa akomëdo, afaṅ, akëṅa yëgëlë bod,

³ tègè diṅ wayn, tègè diṅ bitòm, dzam da atòbògò evovoe, mod mvoè,

⁴ atoan tele nda dzie mbëṅ, abòò na bòn boe bëbò mëwog, abòò dzin abui;

⁵ -ngë mod ziṅ ayëm ki dzoe nda dzie, eyë ayi nòni nda-Zamba ya?-

⁶ Të abò mod ya andëmë nyian a ṅyëbë, aza kud ongon, akuu a ntol Satan.

⁷ Bod ya nsëṅ bayean tsig na akyëbë ai dò, azaa ku a bidzo biaban, nala onë na, a mëlam më Satan.

Etye bëdiakon

⁸ Dzam dëda fë, bëdiakon bëbòò bod bë olugu, tègè ai mësu mëbè, tègè diṅ wayn abui, tègè bò bingat a mam më akuma,

⁹ bëbëlëgë ndimba ṅyëbë a mfuban sosoo nnëm.

¹⁰ Bëtarigi bò lom a mëbobëla, a mvus hala, bëzu bò esye diakon bëtoa të ai atòn.

¹¹ Dzam dëda fë, bininga bëbòò bod bë olugu, tègè ai bò mfòb, tègè diṅ mëyòg, bëbòò bod bë afidi a mam mësë.

¹² Bëdiakon bëbòò fam ya ebëlë hë mininga mbòg, bëtoan dzoe bòn baban ai mënda maban.

¹³ Amu e bod basye esye diakon mbëṅ banòṅ bëben mbëmbë etoa ai abui azombo ya anë a ṅyëbë abë Kristus Yesus.

Ndimba ya ṅyëbë waan

¹⁴ Matil wa e mam ma, mëfidigi na mayi vol sòṅ a bë wa.

¹⁵ Ngë mëtëgëlan, oyëm hm mbol wayean bò a nda-Zamba, endzò enë nda e Zamba avëë, nnom andie ai tin bëbëla.

¹⁶ Ndimba olugu Zamba enë hm fò anen bëbëla: Akulan a ngëëṅ a minson, abii mëkyëbë a nsisim, ayene benglès, bëyedan nyè a bëhaiden, bëyëbë nyè a si-ndon, akëlë a yob a duma ete.