1Kor 16 - MKPAMAṄ AMVOE Nouveau Testament en langue Ewondo 2012

Batogan mòni asu mimfufub ya Yerusalem

¹ Ndò hm, asu ntogan mòni asu mimfufub: Akyaè ya mëngabende mënda më Zamba ya Galati, nala ngò fë mibòòg.

² Amos osu ya sabbat osë, mod osë ya abë mina anyiege man dzom a nda, abim asë abëlë ngul, asu yë na të etogan mòni yabò eyòṅ mayi sò.

³ Eyòṅ mayi sò, e bod miayi tòb, mayi bò lom ai kalara a mò na bëkë ai efaè dzaan a Yerusalem.

⁴ Ngë anë ai mfi na mëkë, bayi kë ai ma eyòṅ.

E mulu ya Paulus abui mëfëg

⁵ Mayi sò abë mina eyòṅ mayi lod a Masedonia. Amu mayi lod a Masedonia,

⁶ mënë dzam tòbò abë mina, eyòṅ ziṅ ben na mayi tòbò hala abog oyon asë, asu yë na miyaan ai ma e hom osë mënë tye na makë.

⁷ Amu mayi ki na mayen mina etoa dzi a ntulan, mbol mafidi na mayi tòbò abë mina man eban, ngë Nti ayëbë.

⁸ Mayi tòbò a Efesi akui a Pentekoste.

⁹ Amu mod mbè ayoo ma we, ayene mbëṅ oyab; abui minziziṅ minë we.

¹⁰ Ngë Timoteus asò, dzëṅan na të adugan kòn wòṅ. Amu nyè fë abò esye Nti anë ma.

¹¹ Të mod ziṅ afëm nyè. Miyaan ai nyè mvoè, asu yë na azu abë ma. Amu mayanga nyè ai babëdzaṅ.

¹² Mfag madzaṅ Apollos, mëkogëlan ya ai nyè abui na azu abë mina ai babëdzaṅ. Ndò hm ṅyian woe ohë bë ki na azu etoa dzi. Ayi sòṅ eyòṅ ayi bi afola.

Nsili mvua ai mësugan

¹³ Vëbëgan, boan nkanga a ṅyëbë, boan fam, toman nyòl.

¹⁴ E dzam asë miabò abòò hë ediṅ.

¹⁵ Makogëlan ai mina, a babëdzaṅ. Miayëm nda-bod Stefanas. Endzò enë ntol bëyëbë ya Akaia, ndò bënganyian a esye mimfufub.

¹⁶ Boan kan bod te mëwog, ai e mod osë asye ai bò, awaa fë ndzug.

¹⁷ Mawog mintag na Stefanas ai Fortunatus ai Akaikus bësò, amu bënë a mëyian ya mbol miadzëman ma a mis.

¹⁸ Bëngavòli ma nnëm, ai minnëm mian fë. Mikama akyaè bod te.

¹⁹ Mënda më Zamba ya Azia masug mina. Akila ai Priska, ai e nda-Zamba yakoan a nda dzaban bëmana mina sug abui abui.

²⁰ Babëdzaṅ bësë basug mina. Sugan mina mina, miwuban mimfufub mëwuban.

²¹ Mamen Paulus matil mësugan ai wò wama.

²² Ngë mod ziṅ adiṅ ki Nti, amala ai nyè. Maranatha (Zaag a Nti).

²³ Maa Nti Yesus abò ai mina.

²⁴ Ediṅ dzama ebòò ai mina bësë abë Kristus Yesus.