Tito 3 - Jiñi Tsiji' bʌ Wen T'añ cha'añ Estudio

Mi laj q'uejlel ti toj ti' yutslel jach

¹ Su'ben xñopt'añob cha'añ uts'at mi' yajñelob ti' wenta yumʌlob yic'ot año' bʌ i ye'tel ti gobierno, la' i jac'beñob ti uts'at yic'ot ja'el la' i melob chuqui wen,

² mach yomic mi' cha'leñob u'yaj t'añ ti' tojlel yaño' bʌ, mach yomic mi' cha'leñob leto, yom utsob jax, yom mi' pʌsob i yutslel i pusic'al ti' tojlel pejtelel wiñicob x'ixicob.

³ Come joñonla ja'el ti yam bʌ ora ma'añic lac pusic'al, xñusa t'añonla, tsa' laj cʌyʌ jiñi toj bʌ bij, tsa' jach lac jac'be pejtelel i colosojlel lac pusic'al yic'ot yan tac bʌ yom bʌ lac pusic'al, tsa' lac lon ñusa q'uiñ ti ts'a'leya yic'ot ti' tsʌytsʌyñʌyel lac pusic'al, tsa' ts'a'lentiyonla, tsa' lac ts'a'le lac bʌ.

⁴ Pero che' bʌ tsa' tsictiyi i yutslel yic'ot i c'uxbiya Dios la caj Coltaya ti' tojlel wiñicob x'ixicob,

⁵ tsi' coltayonla, mach cha'añic toj lac melbal pero cha'añ ti' p'untaya tsi' coltayonla, tsi' pocoyonla cha'añ mi la cʌq'uentel tsiji' bʌ laj cuxtʌlel, tsi' cha' meleyonla ti' p'ʌtʌlel Ch'ujul bʌ Espíritu,

⁶ come Dios tsi' wen aq'ueyonla Ch'ujul bʌ Espíritu ti Jesucristo, la caj Coltaya,

⁷ cha'añ mi lac ch'ʌjmel ti' wenta cha'añ ti' yutslel i pusic'al, tsi' yotsayonla ti yalobil cha'añ mi la cʌq'uentel i yumʌntel yic'ot laj cuxtʌlel woli bʌ lac pijtan.

⁸ Isujmʌch ili t'añ, jiñi cha'añ wen su'beñob tsa' bʌ i ñopoyob Dios cha'añ xuc'ul mi' yʌc'ob i bʌ ti wen bʌ i melbal, come jiñʌch yom bʌ, añʌch i c'ʌjñibal ti' tojlel pejtelel wiñicob x'ixicob.

⁹ Mach a wotsan a bʌ ba' woli' cʌlʌx pejcañob i bʌ ti lolom t'añ, yic'ot ca'bʌl t'añ cha'añ i c'aba' tac i ñojte'el, yujilob a'leya, yic'ot cʌlʌx t'añ cha'añ jiñi mandar; come lolom jach pejtelel iliyi, ma'añic i c'ʌjñibal.

¹⁰ Tiq'ui jiñi woli bʌ i t'ox hermañujob, mi ma'añic mi' jac' i tic'ol che' ti' cha'yajlel mach ma' chʌn q'uel che' bajche' hermano,

¹¹ come ña'tʌbil a cha'añ sojquemix jiñi wiñic, woli ti mulil, bʌjʌch i bʌ woli' bajñel ac' i bʌ ti tojmulil.

Pablo tsi' bajñel cʌntesa Tito

¹² Che' mic chocbeñet tilel Artemas, o mi Tíquico, yom ora ma' tilel ba'añon ti Nicópolis, come ya' com c ñusan i yorajlel tsʌñal.

¹³ Wen coltañ Zenas jiñi xcʌntesa mandar, yic'ot Apolos cha'añ uts'at mi' majlelob, q'uele cha'añ ma'añic chuqui añ to yom i cha'añob.

¹⁴ La' i melob wen bʌ i melbal lac pi'ʌlob, cha'añ mi' coltañob jiñi añ to bʌ chuqui yom i cha'añob, cha'añ mach lolomic jach mi' to'ol ñusañob q'uiñ.

I yujtibal i yutslel i t'añ

¹⁵ Pejtelel hermañujob wʌ' bʌ añob quic'ot mi yʌq'ueñet cortesía. Aq'ueñob cortesía pejtelel mu' i c'uxbiñon lojon cha'añ jiñi wen t'añ mu' bʌ lac ñop. La' ajñic la' wic'ot i yutslel i pusic'al Dios ti la' pejtelel. [Amén.]