Tito 2 - Jiñi Tsiji' bʌ Wen T'añ cha'añ Estudio

Jiñi toj bʌ cʌntesa

¹ Pero jatet, yom uts'at ma' cha'len t'añ yic'ot toj bʌ cʌntesa cha'añ mi' yajñelob ti uts'at.

² Su'beñob jiñi ñoxix bʌ wiñicob cha'añ mi' tic'ob i pusic'al, cha'añ mi' wen ña'tañob chuqui wen yic'ot chuqui mach weñic, yom toj mi yajñelob ti jiñi mu' bʌ lac ñop yic'ot i c'uxbiya yic'ot i xuc'tʌlel i pusic'al.

³ Che' ja'el su'beñob jiñi ñoxix bʌ x'ixicob cha'añ uts'at mi' yajñelob yic'ot i pi'ʌlob; mach yomic mi' cha'leñob jop't'añ, mach yomic mi' mulañob vino, yom mi' cha'leñob cʌntesa ti wen bʌ i melbal;

⁴ yom mi' cʌntesañob jiñi xch'oc to bʌ x'ixicob cha'añ mi' c'uxbiñob i ñoxi'al yic'ot i yalobilob,

⁵ cha'añ mi' tic'ob i pusic'al, cha'añ sʌc mi' yajñelob, cha'añ uts'at mi' melob i ye'tel ti' yotot, yom uts mi' pʌsob i bʌ ti' tojlel i ñoxi'al cha'añ ma'añic mi' wajlentel i t'añ Dios.

⁶ Che' ja'el, xic'beñob jiñi ch'itoñ wiñicob cha'añ mi' ña'tañob pañimil.

⁷ Ti pejtelel a melbal pʌsʌ a bʌ ti uts'at ti' tojlelob; cha'len cʌntesa ti toj, ti jump'ejl a pusic'al yic'ot ti isujmlel,

⁸ yom toj a t'añ ti pejtelel cha'añ mi' yu'bin quisin a contra che' ma'añic chuqui mi' taj ti a tojlel.

⁹ Xic'ben jiñi x'e'telob cha'añ mi' jac'beñob i t'añ i yumob, cha'añ uts'at mi' q'uejlelob ti pejtelel i melbal, cha'añ ma'añic mi' letsañob i t'añ;

¹⁰ mach yomic mi' cha'leñob xujch', ti pejtelel i melbal yom mi' pʌsob i bʌ ti xuc'ul ti' tojlel i yumob cha'añ uts'at mi' yu'biñob i cʌntesa Dios, xColtaya lac cha'añ.

¹¹ Come i yutslel i pusic'al Dios tsa'ix tsictiyi, che' bʌ tsi' colta pejtelel wiñicob x'ixicob,

¹² mi' cʌntesañonla cha'añ mi laj cʌy pejtelel chuqui mach tojic, yic'ot i colosojlel lac pusic'al yic'ot i cha'añ bʌ pañimil, cha'añ mi lac wen ña'tan chuqui yom, cha'añ toj mi la cajñel ti ili ora che' bajche' i cha'año' bʌ Dios,

¹³ che'ʌch yom mi la cajñel che' woli to lac pijtan jiñi c'ax uts'at bʌ mu' bʌ caj laj q'uel che' mi' pʌs i ñuclel jiñi ñuc bʌ Dios yic'ot Jesucristo xColtaya lac cha'añ.

¹⁴ Tsi' yʌc'ʌ i bʌ ti chʌmel cha'añonla cha'añ mi' mʌñonla loq'uel ti pejtelel lac jontolil, yic'ot mi' sʌc-esañonla, cha'añ mi' yotsañonla ti' jump'ejl i tejclum, cha'añ mi lac bʌx-añ ti' melol pejtelel chuqui wen.

¹⁵ Su'beñob ili t'añ, xic'beñob, tiq'uiyob ti pejtelel a p'ʌtʌlel ti ili e'tel. Mach yomic mi' q'ueletob ti lolom mi juntiquilic.