Tito 1 - Jiñi Tsiji' bʌ Wen T'añ cha'añ Estudio

I yutslel i t'añ

¹ Pablojon, i wiñicon Dios, apóstolon i cha'añ Jesucristo cha'añ mi' ñopob jiñi yajcʌbilo' bʌ i cha'añ Dios, cha'añ mi' cʌñob isujmlel mu' bʌ i yʌc'onla ti ajñel ti ch'ujul,

² yic'ot cha'añ mi' tajob i cuxtʌlel mach bʌ añic mi' jilel, woli bʌ lac pijtan. Come Dios mach yujilic lot, tsi' wʌn ac'ʌ i t'añ che' maxto añic pañimil,

³ che' bʌ tsa' c'oti i yorajlel, Dios tsi' yʌc'ʌ ti tsictiyel i t'añ che' bʌ tsi' yʌq'ueyon que'tel ti subt'añ jiñi la caj Coltaya.

⁴ Mic ts'ijbubeñet ili juñ Tito, mero calobilet ti jiñi wen t'añ mu' bʌ laj comol ñop: Ch'ʌmʌ i yutslel yic'ot i ñʌch'tʌlel a pusic'al yic'ot a p'untʌntel ti Dios lac Tat, yic'ot ti lac Yum Jesucristo jiñi xColtaya lac cha'añ.

Che' bajche' yilal yom jiñi x'e'telob i cha'añ lac Yum

⁵ Jiñi cha'añ tsa' j cʌyʌyet ya' ti Creta, cha'añ ma' toj-esan jiñi yom bʌ toj-esʌntel yic'ot cha'añ ma' wa'chocon ancianojob ti jujump'ejl tejclum che' bajche' tsa' c su'beyet;

⁶ jiñi anciano mach yomic añ i mul ti' tojlel i pi'ʌlob, yom juntiquil jach i yijñam; i yalobilob yom ñopol i cha'añ Dios, mach yomic jiñi woli bʌ ti jojp'elob i mul cha'añ mach tojic woli i ñusañob q'uiñ cha'añ ti' caj xñusa mandarob.

⁷ Come wersa yom mi' wa'chocontel xcʌntaya mach bʌ añic i mul cha'añ mi' cʌntan i cha'año' bʌ Dios; mach yomic mi' chañ-esan i bʌ, mach yomic ora mi' mich'an, mach yomic mi' mulan vino, mach yomic mi' jats' i pi'ʌlob, mach yomic mi' mulan taq'uiñ mach bʌ tilemic ti ye'tel.

⁸ Yom mi' ch'ʌm ti uts'at i jula' ti' yotot, yom mi' mulan i mel chuqui uts'at yic'ot chuqui toj yic'ot chuqui ch'ujul, yom mi' ña'tan pañimil, yom mi' tic' i pusic'al,

⁹ yom xuc'ul mi' yajñel ti jiñi toj bʌ t'añ che' bajche' cʌntesʌbil, cha'añ che' jiñi mi mejlel i xic'beñob ti toj bʌ cʌntesa jiñi woli bʌ i contrajiñob jiñi wen t'añ, cha'añ mi' sutq'uiñob i bʌ.

¹⁰ Come añ ca'bʌl xñusa mandarob, mi' cha'leñob lolom jach bʌ t'añ, xlotob, cojco jiñi woliyo' bʌ ti cʌntesa cha'añ tsep pʌchʌlel, mi' socbeñob i pusic'al yaño' bʌ,

¹¹ yom mi' tijq'uelob; come ti' caj i t'añ woli' laj cʌyob jiñi wen t'añ ti ca'bʌl otot tac, woli' cʌntesañob chuqui mach tojic cha'añ mi' tajob taq'uiñ.

¹² Juntiquil x'alt'añ loq'uem bʌ ti' tojlelob tsi' yʌlʌ: “Xlotob ti pejtelel ora jiñi año' bʌ ti Creta, lajalob bajche' jontol bʌ bʌte'el, xts'u'lelob, xwo'lelob”, che'en.

¹³ Isujmʌch tsa' bʌ i yʌlʌ; jiñi cha'añ yom tsʌts ma' tic'ob cha'añ mi' wen xuc'chocoñob i pusic'al ti jiñi mu' bʌ lac ñop,

¹⁴ mach yomic mi' chʌn jac'beñob sojquem bʌ i su'bal judíojob mi jiñic i mandar wiñicob tsa'ix bʌ i cʌyʌyob isujmlel.

¹⁵ Jiñi sʌco' bʌ i pusic'al mi' q'uelob ti uts'at pejtelel chuqui añ, pero jiñi bi'bi'o' bʌ yic'ot jiñi mach bʌ añic mi' ñopob lac Yum, ma'añic chuqui mi' q'uelob ti uts'at, bi'bi'ob i ña'tʌbal, come mach yujilobic i tic'ol i bʌ.

¹⁶ Mi' lon alob i cʌñʌyob Dios, pero yic'ot leco bʌ i melbal mi' su'bob mach isujmic Dios; sojquemob, xñusa t'añob, ma'añobix i c'ʌjñibal cha'añ i melol chuqui uts'at.